بەناوی خودای بەخشندە و میهرەبان
مامۆستایانی ئایینیی بەڕێز
ئەندامانی شەشەمین کۆنگرەی یەکێتیی زانایانیی ئایینی
میوان و ئامادەبووانی خۆشەویست
سڵاوی خوداتان لێ بێت..
بەبۆنەی بەستنی شەشەمین کۆنگرەی یەکێتیی زانایانیی ئایینی دەستخۆشی لە یەکێتیی زانایانی ئایینیی کوردستان و هەموو مامۆستا بەڕێزەکان دەکەم و هیوای سەرکەوتنتان بۆ دەخوازم.
ڕۆڵ و کاریگەریی مامۆستایانی ئایینی لە قۆناغە جیاجیاکانی مێژووی ڕزگاریخوازی گەلەکەمان لە پارێزگاریکردن لە ڕەسەنایەتی و ڕەوشتبەرزی و خواناسی و نیشتیمانپەروەری و پاراستنی پێکەوەژیان و تەباییدا ڕۆڵێکی پڕشنگدار و بەرچاوە و جێگەی پێزانینە و لە مێژووی گەلەکەماندا هەمیشە بە بەرزی یاد دەکرێتەوە. جگە لەوەیش بەشی هەرە زۆری شۆڕشەکانی گەلەکەمان بۆ بەدیهێنانی ئازادی و ڕزگاربوون لە داگیرکاری لەسەر دەستی زانایان و گەورە پیاوانی ئایینیی گەلەکەمان بووە و ئەوە خۆی لە خۆیدا بەڵگەیەکی ڕوونە لەسەر پێگە و سەرقافڵەبوونی زانایانی ئایینی لە خەبات و تێکۆشانی گەلی کوردستان.
چەکهەڵگرتنی مامۆستایانی ئایینی لە شۆڕشەکاندا وانەیەکی گرنگ بوو بۆ هەموومان کە ئازادیخوازی و بەرگریکردن لە خاک و نیشتیمان نەک تەنیا ئەرکێکی نەتەوەیی بەڵکو ئەرکێکی ئایینییش بووە.
ئامادەبووانی بەڕێز
لە قۆناغی ئێستادا ڕۆڵی مامۆستایانی ئایینی لە ژیانی کۆمەڵگەدا ڕۆڵێکی گرنگ و یەکلاییکەرەوەیە بە تایبەت کە پەتای تیرۆر و توندڕۆیی و تێکدانی بنەماکانی پێکەوەژیان و هەروەها دەرکەوتنی تاییفەگەری لە عێراق و ناوچەکەدا هەڕەشەی گەورەن بۆ سەر پێکەوەژیان و لێبوردەیی و پەیامی ئاشتیخوازانەی ئایین. وشککردنی ڕەگوڕیشەی هزری تیرۆر و شەڕی ئایدیۆلۆژیای تیرۆر بە دەرەجەی یەکەم ئەرکی ئێوەی بەڕێزە. هەموو چینوتوێژەکانی کۆمەڵگە بۆ ڕەواندنەوەی مەترسییەکانی هزری تیرۆر و کارکردن بۆ تەبایی ئایینی و مەزهەبی چاویان لە هیمەت و ڕۆڵی مامۆستایانی ئایینییە و ئەوەی تا ئێستا لەو بوارەدا ئەنجامتان داوە جێگەی دەستخۆشییە.
لەگەڵ ئەوەیشدا ئەرکی پارێزگاری لە باوەڕ و دینداری لەسەر بنەمای زانستی و پەروەردەیی و هەروەها قووڵترکردنی خۆشەویستیی خاک و نیشتیمان لەسەر شانی ئێوەی بەڕێزە. لەو کەشە ئاڵۆز و پڕ لە تەحەدییاتەی ئێستادا نابێ ڕێگە بدرێ کە هزر و فەرهەنگی نامۆ کە دژی دینداری و نیشتیمانپەروەرییە هزر و هۆشی کۆمەڵگە داگیر بکات.
بەڕێزان..
هەستی نەتەوەیی و نیشتیمانی لای هەر کەسێک و بە هەر بیانوویەک خەلەلی تێبکەوێت نابێ لای زانای ئایینی بە قەدەر زەررەیەک خەلەل و کەمتەرخەمی تێ بکەوێت چونکە ئێوە سەرچاوەی ئیلهامن بۆ هەموومان و گەلی کوردستان لە زانایانی ئایینی فێری خۆڕاگری و پشوودرێژی و فیداکاری و ورەبەرزی لە خەبات و کۆڵنەدان بوونە. بۆیەشە جەنابی بارزانیی نەمر یەکێتیی زانایانی دامەزراند چونکە زۆر باش دەیزانی زانایانی ئایینی شوورەی پۆڵایینی گەلن بۆ بەرگریکردن لە پیرۆزییە ئایینی و نەتەوەییەکانی کورد. ئەرکی ئێوە ئەرکێکی پیرۆزە و ئەندامبوون لە یەکێتی زانایان شەرەفێکی گەورەیە.
هەر بەو بۆنەیشەوە بە پێویستی دەزانم کە داوا لە هەموو مامۆستایانی بەڕێز بکەم کە ڕێگە نەدەن خیلافاتی بچووک ببێتە هۆی ناکۆکیی گەورە و لێکترازانی نێوان مامۆستایانی بەڕێز چونکە ئەوە بەشێوەیەکی سلبی کاریگەری لەسەر بنەماکانی ئایینداری و پەروەردەی دواڕۆژی گەلەکەمان دەبێت. پێویستە ئەولەویەتی و خەمی سەرەکیی ئێوە ئاییندە و بەرژەوەندییەکانی وڵات و هزری گەنجەکانمان بێت ئەویش بەپێی ئەجیندایەکی ڕەسەنی ئایینی و خۆماڵیی کوردستانی نەک ئەجیندای هاوردە کە ڕێز لە مافە ڕەواکانی گەلەکەمان ناگرێت.
یەکێتیی زانایانی ئایینی لەپێناو ئێوە و لەپێناو دینداری و بەرژەوەندییەکانی نیشتیمان دامەزراوە و پێویست دەکات ئێوەی بەڕێز بە بەرنامە و پڕۆژەی تێروتەسەل قورسایی ئەو ئامانجە پیرۆزە بپارێزن کە یەکێتیی زانایان لە پێناویدا دامەزراوە.
لەکۆتاییدا هیوای سەرکەوتنتان بۆ دەخوازم، هیوادارم کۆنگرەکەتان سەرکەوتوو بێت و بڕیار و ڕاسپاردەکانی کۆنگرەکەتان زۆر باشتر لە خزمەتی ئایین و گەل و وڵاتەکەمان بێت. منیش بە هەموو توانایەکەوە پاڵپشتی ئێوە دەمێنمەوە و بەوە سەربەرزم کە لە خزمەتی مامۆستایانی ئایینیدا بم.
و السلام علیکم و ڕحمه الله و برکاتە
#مەسعود بارزانی#
#24-07-2018#