بەدوای ڕوداوەکانی 16 ی ئۆکتۆبەری 2017 و لەشکرکێشی سوپا و هێزە میلیشیا جۆربەجۆرەکانی شیعە و #حەشدی شەعبی# و فیرقەی ئاڵتونی بۆ سەر شاری #کەرکووک# و داسەپاندنی دەسەڵاتی سەربازی و میلیشیایی بەسەر شارەکەدا، بارودۆخی سیاسی و ئەمنی لەم شارەدا چوەتە قۆناغێکی ترسناک لە کێشمەکێشێکی دیکە لەنێوان حکومەتی عێراق و ئەحزابی ئیسلامی سیاسی شیعە و ئەحزابی ناسیونالیستی کورد. لەلایەک پارێزگاری سەپێنراو لەلایەن حکومەتی عێراقەوە بەدەرکردنی چەند بریارێکی کۆنەپەرستانە و دەستبردن بۆ ڕووخاندنی ماڵان لەو گەڕەکانەی زۆربەی دانیشتوانی کوردزمانن و داگیرکردنی زەوی وزاری جوتیارانی چەند گوندێک و لابردنی چەندین بەڕێوەبەر و کارمەندی کوردزمان، نەک هەر به شیوازێکی تر سیاسەتی تەعریب و تەرحیلی ڕژێمی بەعسی فاشیستی زیندوکردۆتەوە، بگرە هەڵاواردن و دنەدانی نەتەوەپەرستی و شۆڤێنیستانەی پەرەپێداوە. لەلایەکی دیکەوە ئەحزابی ناسیونایستی کورد، بەتایبەت یەکێتی و پارتی بەشێک لە ململانێکەی خۆیان لەسەر پۆست و پێکهێنانی کابینەی تازەی حکومەتی هەرێم هێناوەتە نێو ئەم شارەوە و دەیانەوێت بە دانانی پارێزگارێکی کوردزمانی سەر بەحزبەکانیان و گێرانەوەی بارودۆخەکە بۆ پێش 16 ی ئۆکتۆبەر و ڕاکێشانەوەی جارێکی تری هێزی چەکدار و ئاسایشیان بۆ شارەکە، نابەرپرسیارانە درێژە بەململانێی و ڕقەبەری قەومی لەکەرکووکدا بدەن. شەڕی بەرزکردنەوەی ئاڵا لەلایەن ئەحزابی ناسیۆنالیستی کوردیەوە و قەدەغەکردنی لەلایەن دەسەڵاتدارانی پارێزگاکەوە، نمونەیەکە لە سیاسەتی توندکردنەوەی ڕق و کینەی نەتەوەیی لەم شارەدا. بێگومان هەموو ئەم ڕاستیانەش شاهیدی ئەوه دەدەن کە ژیان و گوزەران و سەلامەتی و ئاسایشی دانیشتوانی ئەم شارە، کەوتۆتە بەردەم مەترسی و کارەساتێکی دڵتەزێنەوە. کارەساتێک که بەبێ لەبەر چاوگرتنی جیاوازیی زمان و ئاین، هەموو خەڵکی شارەکەی کردۆتە نیشانه.
خەڵکی شاری کەرکووک بەردەوام قوربانی کارنامەی سەرکوت و لەشکرکێشی حکومەتە یەک لەدوا یەکەکانی عێراق و سیاسەتی نابەرپرسانە و یاریکردنی حزبە بۆرژوا ناسیونالیستەکانی کوردە بەچارەنوسی خەڵکی ئەم شارەوە، تا لەڕێگەیەوە به بەرژەوەندیەکانی خۆیان بگەن و دەست بەسەر دەسەڵات و داهات و سامانی ئەم شارەدا بگرن. هەربۆیە نابێ فریوی ئه و بەڵێنە درۆییانە بخۆن که لەژێر ناوی ئاساییکردنەوەی دۆخی کەرکووکدا بەخەڵکی دەیدەن، چونکە خودی ئەم لایەنانە به تەجروبە نیشانیانداوە کە هەر خۆیان و هێزە میلیشیاکەیان سەرچاوە و هۆکاری نائارامی و شەڕی نەتەوەیی و سەرکوت و دەستدرێژیکردنە سەر موڵک و ماڵ و ژیانی ڕۆژانەی خەڵکن و نایانەوێ و ناتوانن دانیشتوانی ئەم شارە له دۆخێکی ئارام و پێکەوەژیاندا ڕابگرن. بەپێچەوانەوە گێرانەوەی دۆخی ئاسایی و مەدەنی بۆ ئەم شارە لەهەنگاوی یەکەمدا بەندە بە وەدەرنان و دەستکۆتاکردنی هێزە سەرکوتگەرەکانی حکومەتی عێراق و هێزی میلیشیای هەر حزبێکی ناسیۆنالیستی و ئیسلامیەوە.
خەڵکی شاری کەرکووک دەبێ بەرامبەر بەم دۆخە مەترسیداره و هەر ئەگەرێکی نەخوازراو، بە هوشیاریەوە لە ژیانی خۆیان و کارنامەی هێز و لایەنەکان بڕوانن و لەم ئاراستەیەشدا بەتەواوی تواناوە لەبەرامبەر مامەڵەی حکو مەتی عیراق و سیاسەتی کۆنەپەرستانەی ئەحزابی ئیسلامی سیاسی شیعە و سیاسەتی نەتەوەپەرستی یەکێتی و پارتیدا بوەستنەوە و ڕێگانەدەن بەڵا و تراژیادیایەکی تر بەسەر ژیانیاندا بسەپێننەوە.
هەردوو حزبی کۆمۆنیستی کرێکاریی کوردستان وعێراق ڕادەگەیەنن که دورخستنەوەی هەر جۆرە مەترسیەک لەسەر ئەم شاره و ئاساییکردنەوەی ژیانی دانیشتوانەکەی، بە یەکیەتی و بە هاتنەمەیدانی خەباتی یەکگرتوانەی جەماوەری شاری کەرکووک و دوورکەوتنەوە لەگیانی نەتەوەپەرستی و دەمارگیری ئاینی مەیسەر دەبێ، بەوە دەبێ کە خەڵکی ئەم شارە ڕیزی خۆیان و بەرژەوەندیەکانیان لە ڕیزی ئەحزابی ناسیۆنالیست و تایفی و بەژەوەندیەکانیان جیابکەنەوە و یەکدەستانە لەدەوری ئەم خاڵانە بێنه مەیدانەوە و چارەنوسی خۆیان و شارەکەیان هەنگاو بەهەنگاو بەدەستەوەبگرن:
1/ چوونەدەرەوەی دەستبەجێی هێزە سەربازیەکانی حکومەتی عێراق و هێزە میلیشیاکان لە شارەکەدا.
2/ پارێزگاری بەوەکالەت (راکان جبوری) پارێزگارێکی داسەپاوە و هیچ شەرعیەتیکی نییە، بۆیە دەبێ لەسەر کار لابچێت.
3/ ڕاگرتن و هەڵوەشاندنەوەی هەموو ئه و بریارانەی که لەلایەن پارێزگاری داسەپێنراوەوە، بەدژی ئازادی و گوزەرانی خەڵکی ئەم شارە دراوە و بۆتە مایەی جیاکاری و ڕقەبەری نەتەوەیی.
4/ باشترکردنی ژیان وگوزەرانی دانیشتوانی شارەکە و خزمەتگوزاریەکان لە ڕێگای خەرجکردنی بەشێک لە داهاتی نەوتی شارەکەوە.
5/ زامنکردنی ئازادیی هەڵسوڕانی سیاسی بۆ هەموو لایەنەکان و دەستەبەرکردنی ئازادیی نیشتەجێبوون و مامەڵەکردن بەموڵک و ماڵەوه، بۆ هەموو دانێشتوانی شار بەبێ جیاوازی نەتەوەیی و ئاینی..
6/ هەرجۆرە ڕەفتار و گوفتارێک کە هانی ڕقەبەری نەتەوەیی و ئاینی و تیرەگەری دەدا و پێچەوانەیە لەگەڵ ژیانی پێکەوەیی و هاوڵاتی چونیەکی دانیشتوانی ئەم شارە، قەدەغە و وەک تاوان بناسرێ و ئەنجامدەرانی هەرکەس و لایەنێک بن دەبێ ڕووبەڕووی دادگا بکرێنەوە.
حزبی کۆمۆنیستی کرێکاریی عێراق و کوردستان بانگەوازی سەرجەم خەڵکی شاری کەرکووک دەکەن کە لەپێناو هەڵگرتنی فەزای سەربازی و سەرکوت و بۆ دورخستنەوەی هەر مەترسیەک کە لە ئێستادا هەڕەشەیە بۆ سەر ژیان و گوزەرانیان، لەدەوری ئه و خواستانەی سەرەوە خەباتی خۆیان یەکخەن و ڕیزی یەکگرتوویان بهێننە مەیدانەوە. هەردوو حزب سپاردنی بەڕێوەبردنی ئەم شارە به ئیدارەیەکی کاتی کە ڕاستەوخۆ لەلایەن نوێنەرانی هەڵبژێردراوی خەڵک خۆیانەوە بەڕیوەببرێ و بەرپرسیاریەتی پاراستنی ئەمنیەت و دابینکردنی خزمەتگوزاریەکان لەئەستۆ بگرێ، بە ڕیگاچارەیەکی گونجاو دەزانن تا ئەو کاتەی کێشەی ئەم شارە لەچوارچێوەی چارەسەری کێشەی کورد لەئاست عێراقدا یەکلادەکرێتەوە.. بێگومان هاودڵی و هاوخەباتی دانیشتوانی ئەم شارە و یەکگرتوویی تێکۆشانی چینایەتی کرێکاران و زەحمەتکێشان و دورکەتنەوە لە دەمارگیری و ڕق و کینەی نەتەوەیی و تایەفی، بە پێناسەی ئینساندۆستیەوە دەتوانێ ئاسایشی کۆمەڵایەتی و بنەماکانی مەدەنیەت بپارێزێ و فەراهەمی بکات. هەر ئەمەش ئەبێتە مایەی ڕاکێشانی هاوپشتی و پاڵپشتی جەماوەری کرێکار و زەحمەتکێشی سەراسەری عێراق بۆ دانیشتوانی ئەم شارە.
حزبی کۆمۆنیستی کرێکاریی عێراق و حزبی کۆمۆنیستی کرێکاریی کوردستان
#18-01-2019#