قائیمقامییەتی #سلێمانی# نرخی بۆ پارک کردنی ئۆتۆمبێل لە گەراجەکاندا دیاریکرد و هەر گەراجێک سەرپێچی بکات سزا دەدرێت.
دیار جەمال، ئەندامی لیژنەی باڵای لیژنە هاوبەشەکانی قائیمقامییەتی سلێمانی ڕایگەیاند، لەشاری سلێمانی سێ جۆر گەڕاج هەیە کە نرخەکانیان بەم جۆرەیە:
- جۆری(ا) ئه و پارکانەیە کە چه و ڕێژ یان خۆڵن، بۆ 5 کاتژمێر هەزار دینارە.
- جۆری (ب) ئه و پارکانەی کۆنکرێت یان قیرن و چەرداغیان هەیە بۆ 5 کاتژمێر 1250 دینارە.
- جۆری(ج) ئه و پارکانەی لەباڵەخانە و بیناکاندان و داخراون بۆ 5 کاتژمێر 1500 دینارە.
ناو براو وتیشی بۆ هەر جۆرێکیشیان ئەگەر لە 5 کاتژمێر زیاتر بوو، ئەوا خاوەن گەڕاجەکە بڕیار دەدات چ بڕە پارەیەک وەربگرێت، چونکە ئەوان ڕێگە پێدراون تاوەکو دوو ئەوەندەی پارەکە وەربگرن.
باسی لەوەشکرد، مەرجە هەموو گەڕاجێک مۆڵەتی هەبێت و کامێرای چاودێری تێدا بێت و تابلۆی هەبێت و نرخەکەی لەسەر تابلۆکە نوسرابێت و سیاجی هەبێت و هەروەها تەوالێتی تێدابێت.
لە بارەی کاتی ڕاگرتنی ئۆتۆمبێل دیار جەمال، لەبەر ئەوەی سیستمێکی ئەلکترۆنی پێشکەوتوو نییە لەگەڕاجەکاندا تاوەکو کاتی هاتن و چوونی ئۆتۆمبێلەکان دیاریبکات، بۆیە ناتواندرێت کەمتر له و پارەیەی لێبسەندرێت کە دیاریکراوه.
سەبارەت به و گەڕاجانەی کە لەدەرەوەی گەڕاج سەیارە ڕادەگرن و پارەش لە هاوڵاتیان وەردەگرن دەڵێت، ئەوە سەرپێچییە و خاوەنی ئۆتۆمبێلەکە دەتوانێت سکاڵا بکات لەخاوەن گەڕاجەکە و ئێمەش ئیجرائاتی لەگەڵدا دەکەین.
ناوبرا باسی لەوەشکرد هەر هاوڵاتییەک کێشەی هەبێت دەتوانێت لەڕێگەی ژمارە تەلەفۆنی (0770867777) یاخود ژمارە (100) ی(JCC)ەوە پەیوەندی بکات، یان سەردانی قائیمقامییەت بکات و سکاڵا بنووسێت.
لەبارەی بڕی سەرپێچییەکانیشەوە ئەندامی لیژنەی باڵای لیژنە هاوبەشەکانی قائیمقامییەتی سلێمانی ڕایگەیاند، بۆ جاری یەکەم بڕی 250 هەزار دینارە و لەجاری دووەمدا بڕی 500 هەزار دینارە، بۆ جاری سێیەم داخستنی گەڕاجەکەیە بۆ ماوەی حەوت ڕۆژ و ئەگەریش دوای ئەوەش بەردەوامبوو لەسەرپێچیکردن ئەوا مۆڵەتەکەی لێدەسەندرێتەوە.
[1]