د دیدارەکێ دا بۆ ڕۆژناما ئەڤرۆ کو ھۆشەنگ تاجر ئەنجامدایە، ئێک ژ پشکداربوویێن کۆمارا کوردستان ل باژارێ مھابادێ و سیاسەتمەدارێ دێرین یێ ڕۆژھەلاتێ کوردستانێ و کادیرێ بەرنیاس یێ پارتیا دیموکرات یا کوردستانێ دیار دکەت کو دەمێ کۆمارا کوردستان ھاتە ڕاگەھاندن جڤاکێ کورد د ڕەوشەکێ گەلەک خراب دا بوو و ئاستێ زانستی و تێگەھشتنا گەلێ مە گەلەک کێم بوو و ل ئالیێ دی سوفیەتا بەرێ و دەولەتا ئازەربەیجانێ ژی گەفێن مەزن ل پێشەوازی قازی محەمەد دکرن و وان دڤیا کۆمارا کوردستان نەھێتە ڕاگەھاندن دا کورد سەر ب کۆمارا ئازەربەیجانێ بن.
جەلیل گادانی سیاسەتمەدارێ دێرین یێ ڕۆژھەلاتێ کوردستانێ و ئێک ژ پشکداربوویێن کۆمارا کوردستان ل مھابادێ بۆ ڕۆژناما ئەڤرۆ ڕاگەھاند کو دەمێ ئەم بەحسێ ڕاگەھاندنا کۆمارا کوردستانێ دکەین دڤێت بەری ھەر تشتەکێ باش بزانین کو وی دەمی ڕەوشێ جڤاکێ کوردی گەلەک خراب بوو، خەلک خواندەڤان نەبوون و ئاگەھداری پێشڤەچوونێن ل جیھانێ نەبوون و ل ئالیێ دی کوردستان د بیاڤێ سیاسی و ئابووری ژی د ڕەوشەکێ گەلەک خراب دا بوو و گەفێن بەردەوام یێن ڕژێما شاھی یا ئیرانێ ل سەر کوردان ھەبوون و سوفیەتا بەرێ کو وەک پشتەڤانێ کۆمارێ دھاتە نیاسین د ڕاستی دا وان ژی نەدڤیا کو کۆمارا کوردستان بھێتە ڕاگەھاندن و گۆت: (وی دەمی پێشەوا قازی محەمەد چەندین جاران سەرەدانا بەرپرسێن سوفیەت و ئازەربەیجانێ کرن و وان ب ڕەنگەکێ ئاشکرا بۆ قازی محەمەدی دیار کرن کو نابیت ھوون کۆمارەکێ ڕابگەھینن، بەلکو ھوون دشێن وەک کورد گرێدای کۆمارا ئازەربەیجانێ بن، لێ قازی محەمەد ئەو یەک قەبوول نەکر و بەردەوام بزاڤ کرن دا کو بشێت وێ یەکێ بۆ وان بسەلمینیت کو کوردان ژی ئەو ئیرادە ھەیە کو بشێن خوە برێڤە ببەن).
ناڤھاتی د بەردەوامیا ئاخڤتنا خوە دا ئەو یەک ژی دیار کر کو ڕاگەھاندنا کۆمارا کوردستان د ناڤ دلێ سیستەمێ شاھی یێ ئیرانێ مرۆڤ دشێت وەک شۆرەشەکا گەلەک مەزن ل قەلەم بدەت، چونکو سیستەمێ ئیرانێ بخوە سیستەمەکێ گەلەک پاشکەڤتی بوو و ل سەر بنەمایێ زۆرداریێ ھاتبوو ئاڤا کرن، لێ ڕاگەھاندنا کۆمارا کوردستان د ناڤ دلێ سیستەمەکێ وەسا نیشانا ئیرادا گەلێ کوردستانێ بوو و گۆت: (ب ڕاگەھاندنا کۆمارێ کوردان نیشا ھەموو جیھانێ دا کو ئەو دشێن ل گۆر جیھانا سەردەم بژین و سیاسەتێ بکەن و وێ دەمێ د ماوەیەکێ کێم دا ژی لەشکرێ کوردستانێ ھاتە ئاڤاکرن و ھێزا پێشمەرگە بۆ پاراستنا کۆمارێ ھاتە ئاڤاکرن کو ئەوە ژی براستی پێشکەڤتنەکا ئێکجار مەزن بوو).
سیاسەتمەدارێ دێرین یێ ڕۆژھەلاتێ کوردستانێ د بەردەوامیا ئاخڤتنا خوە دا ئەو یەک ژی دیار کر کو د ماوەیێ 11 مەھان کو دەمەکێ گەلەک کێم بوو، لێ دیسان زمانێ کوردی ل کۆمارێ بوو زمانێ فەرمی و د گەلەک بیاڤێن فەرمی و یێن ژیانێ دا ھاتە بکارئینان و ل گۆر دەلیڤێن وی دەمی ڕۆژنامە ھاتە دەرخستن و ئەڤە ژی بۆ پێشڤەچوونا ھزرا نەتەوی یا کوردی پێنگاڤەکا گەلەک گرنگ بوویە، چونکو ڕۆلێ زمانی د گەشەکرنا ھزرا نەتەوی دا بەرچاڤە و گۆت: (ئێک ژ خالێن دی یێن کۆمارا کوردستانێ کو نیشا ددەت یا ھەموو خەلکێ کوردستانێ بوو، پشکداریا گەلەک کەسایەتیێن ناڤدار یێن پارچێن دی یێن کوردستانێ بوو، ب پشکداریا وان کەسان و ھۆزێن کوردی ل پارچێن دی یێن کوردستانێ بۆ جارا یەکێ کوردان وێ دەمێ ئێکەتیا خوە یا نەتەوی ڕاگەھاندن و ئەو پێنگاڤا کو وی دەمی ب سەرۆکاتیا پێشەوا قازی محەمەد ھاتیە ئاڤێتن بناغەکا گەلەک مەزن و ب ھێز بۆ قۆناغێن دی یێن شۆرەشا کوردستانێ دروست کر و ھەتا ئەڤرۆکە ژی ئەم بەرھەمێ وێ یەکێ باش دبینین).
د دووماھیا ئاخڤتنا خوە دا جەلیل گادانی ئەو یەک ژی دیار کر کو پێشەوا قازی محەمەد یا ژ دەستێ وی ھات وی دەمی کر و جانێ خوە ژی گوری ئاخا پیرۆز یا کوردستانێ کر و کۆمارا کوردستانێ و بەرھەمێن وێ جھێ خوە د ناڤ دلێ ھەر کوردەکێ دا دروست کریە و ئەڤرۆکە ژی ھەموو کورد شانازیێ ب کۆمارا کوردستانێ و خەباتا پێشەوا قازی محەمەدی دکەن و گۆت: (دڤێت ئەڤرۆکە ھەموو ھێز و پارتێن کوردستانی ل سەر وێ بنەمایێ جارەکا دی ئێکەتیا خوە دروست بکەن و پێکڤە جارەکا دی ئارمانجا کۆمارێ زندی بکەن، ھەکە نھا مە نەشیا ئەم ھەموو کوردستانێ ژی ئاڤا بکەین دڤێت ئەم ل پارچێ نھا یێ ئازادکری ل وەلاتێ خوە جارەکا دی ب ڕاگەھاندنا کۆمارا کوردستانێ ئیرادا گەلێ خوە نیشا ھەموو جیھانێ بدەین دا بۆ ھەر کەسەکێ ئاشکرا بیت کو کورد دشێن ھەردەم پێشەنگیا خەباتەکا دیموکراتیک و مودێرن ل دەڤەرێ بکەن).[1]