زانایەکێ ناڤدارێ ئەمریکا دیار دکەت کو ئەمریکا سیاسەتا خوە یا ل ھەمبەر ڕژێما سووریێ د گوھۆرینیت و د دەمەکێ نێزیک دا ناخوازیت ڕژێما سووریێ ژ ناڤ بچیت و ل دووڤ زانایێن سیاسەتێ ئەمریکا ھەتا د پلانا یەکەم دا دخوازیت ڕێکخستنێن تیرۆرست یێن وەک قاعیدە و داعش ب تەمامی لاواز بکەت و پاشی پلانا دویەم یا گوھۆرینا ڕژێما سووریێ ب کریاری بجە بینیت.
نۆم چۆمسکی ڤەکۆلەر و زانایێ سیاسەتێ د داخۆیانیەکی دا بۆ تەلەفزیۆنەکا ئەمریکا ڕاگەھاند کو سەرکەڤتنا کوردان ل کۆبانێ و بەرفرەھبوونا دەستھەلاتا ڕێکخستنێن تیرۆرست یێن وەک داعش و ئەلنوسرە یا سەر ب قاعیدە ڤە پلانا ڕێڤەبەریا ئەمریکا ل سەر سووریێ ب تایبەت و ڕۆژھەلاتا ناڤین و ئەفریقیا ب گشتی دایە گوھۆرین و گۆت: (د دەستپێکێ دا ئەمریکا خواست ژ ھەموو کۆمێن چەکدار یێن ئۆپۆزسیۆنێ مفا وەربگریت و ب وی ڕەنگی ڕژێما ئەسەدی ب ڕوخینیت بۆ ڤێ چەندێ ھەم د وار ئابووری و ھەم ژی د وارێ سەربازی دا ھارکاریا وان کر، لێ دەرکەڤت ھۆلێ کو ھەردو ڕێکخستنێن تیرۆرست ھەموو ئۆپۆزسیۆنا ڕاست یا سووریێ ژناڤبرن و ھێرشی عیراقێ، کوردێن باشور و ڕۆژئاڤا کرن، ژ بەر ڤێ چەندێ ژی ڕێڤەبەریا ئەمریکا مەترسیا د پلا یەکەم دا گوھارت و ڕژێما سووریێ کەڤتە پلانا دویێ).
چۆمسکی ھەروەسا دیار ژی کر سەدەمێ دی یێ گوھۆرینا سیاسەتا ئەمریکا ل ھەمبەر ڕژێما سووریێ، نەبوونا بەدلێ ڕژێمێیە و ئۆپۆزسیۆن ژی بێ ھێزە و ئەڤ نێزیکی شەش ھەیڤن پینتاگۆن و دەزگەھێ ھەوالگێریێ ل سەر پلانا نوو گەنگەشە دکەن و پلانا نوو د پێنگاڤا یەکەم دا ژناڤ برنا تیرۆرستێن داعش و قاعیدەیە و پلانا دویەم ژی نەھێلان یانکۆ گوھۆرینا ڕژێما ئەسەدی یە و گۆت: (ل دووڤ ھزرا من بەرخوەدانا کوردان ل ھەرێما کوردستانا غیراقێ و ڕۆژئاڤا ژی کاریگەریا خوە ل گوھۆرینا سیاسەتا ئەمریکا کریە و نھا ڕێڤەبەریا کۆچکا سپی دخوازیت ل سووریێ ژی کورد ب تەمامی بگەھنە مافێن خوە و د سووریا نوو دا جە بگرن و ئەز باوەر دکەم ئەمریکا دێ بۆ گوھۆرینا ڕژێما سووریێ کوردان بدەتە پێش و ھەرێما کوردان ل ڕۆژئاڤا بێخیتە ژێر پاراستنێ دا).
چۆمسکی د پشکەکا دی یا ئاخڤتنا خوە دا ژی دیار کر کو دبلۆماسیا سەرکەڤتی یا مەسعود بارزانی سەرۆکێ ھەرێما کوردستانا عیراقێ ژی د قەبوولکرنا کوردێن ڕۆژئاڤا دا ڕۆلەکا مەزن دیتیە و ل سەر داخوازا بارزانی ئەمریکا ل گەل ھێزێن ھەڤپەیمانا نێڤدەولەتی ھاریکاریا کۆبانێ کریە و گۆت: (ھەکە سەرکردێن کوردان ڤێ سیاسەتا خوە یا عاقلانە بەردەوام بکەن دێ بشێن خوە بگەھیننە ئارمانجێن خوە و ببنە ھەڤپەیمانێ سەرەکی یێ ئەمریکا و ئورۆپا ل ڕۆژھەلاتا ناڤین، لێ دڤێت سەرکردێن کورد خوە نەکەنە قوربانیا بەرژەوەندیێن چو ئالیەکی و ھەر پێنگاڤەکا خوە ب زانەبوون و ژیرانە ب ھاڤێژن).
ھەر د ڤێ دەربارێ دا جەنگیز چاندار ڕۆژنامەڤانێ ناڤدار یێ تورکیا ژی ڕاگەھاند کو توکیا سیاسەتا گەلەک شاش و دوور ژ ڕاستیێ ل ھەمبەر سووریێ و دەرڤە برێڤە بر و د قۆناغا نھا دا ب تنێ مایە و گۆت: (تورکیا دەرفەتەکا زێرین ژ دەست دا و ھەکە ھاریکاریا کوردان کربا و سنۆرێن خوە بۆ تیرۆرستان داخستبا دا ئەڤرۆ کورد پەیوەندیێن کوردان ل تورکیا باشتر با و دا سەرکەڤتنا کۆبانێ ببیتە سەرکەڤتنا گەلێن ڕۆژھەلاتا ناڤین، لێ تورکیا بەرۆڤاژی ڤێ یەکێ کر و ئەڤرۆ ب تنێیە).
رۆژنامەڤانێ تورکیا د دووماھیا ئاخڤتنا خوە دا ڤێ یەکێ ژی زێدە کر و گۆت: (ئەمریکا، ئورۆپا پیرۆزباھیێ ل سەرکەڤتنا کوردان دکەن لێ سەرۆک کۆمارێ تورکیا دبێژیت ئەو ڕێ نادەن ھەرێمەکا دی یا وەک ھەرێما کوردستانێ ئاڤا بیت، ئەم قەبوول بکەین یان نە ئەڤرۆ گەلێ کورد بۆ جیھانێ سەلماندیە کو وان مافێ خوە یێ ڕەوا دڤێت و پێنگاڤ ب پێنگاڤ ب فەرمی ڕێڤەبەریا ڕۆژئاڤا قەبوول دکەن، د ڕەوشا نھا دا ب دەستپێشخەریا بەرێز بارزانی سەرۆکێ ھەرێما کوردستانا عیراقێ دەریێ جیھانێ بۆ کوردێن ڕۆژئاڤا ژی ڤەدبیت، ڤێجا دڤێت تورکیا ئێدی سیاسەتا خوە یا ھەمبەر کوردا بدەتە گوھۆرین).[1]