باخچێوە بېگەرد
نویستەی: میرزا ئۆلقاڎرو پاوەی
بەشۍ: پەنجا و یەرەمە

میرزا ئۆلقاڎرو پاوەی، دمای باسکەردەی و تۊمارکەردەی ژیوای حەزرەتو ئاڎەمی، تا زارۊڵەکاش، دماتەر پەی حەزرەتو نووحی و نەوەکاش، گلەیۍ وېش کەرۊنو ماچۊ: قاڎر ئانە لېڵاویتەنە کە (نوورو محەمەڎی) نمەوینی؟ ئەی ئا نوورە کە خوڎای خەلقکەردەن، جە سەرەتاو دنیێوە، ئا نوورە، لوانەنە ڕۊخسارو ئاڎەمی، دماتەر پەی نەوە خاسو ساڵحەکاش، دماجار یاوان بە ڕۊخسارو حەزرەتو (ئیدریسی)، چاگەیچۆ وەستەنەرە پەی بنەماڵەو هاشمیەکاو ئیتر ڕۊخسارو (عەبدوڵڵا)ی تاتەو محەمەد (ص) مستەفاینە مدران:
واچە، هەی قادر، شوعەرای بېشعوور
دېرەن، درەنگەن، مەنزڵەن، دوور دوور
دەک لېڵاویت لېڵ، بېئەقڵی، کەم فام
لېوەی، هەرزەگۊ، ئەبلەی خەیاڵ، خام
نووری (محەمەد)، ها هەڵای بەندەن
چن هەزار ساڵەن، موعەتتەل مەندەن
مەر بەنگت کېشان، یام، کەیفت وەردەن
نووری حەزرەتت، فەرامۊش کەردەن
بزانە، چکۊن، گوزەرگاش، کامەن
ئاخر، هەوارش، جە کام، مەقامەن
نیازش چېشەن، وە دڵوازی دڵ
تەشریفش، جە کۊ، مەگېرۊ، مەنزڵ
مەعلووم بۊ،جە لای ساحېب کەماڵان
تەوارېخ وانان، تارېخی ساڵان
چوون نووری حەزرەت، ڕەسوولی خاتەم
ئەوەڵ، مەنزڵ، شیی، وە جەبهەی (ئادەم)
جە ئادەم، ئەو (شیت)، جە (شیت) ئەو (ئەنوش)
ئەدیانی ئەولاد، قابیل کەرد مەخشووش
ڕاگەش وېڵ نەکەرد، چوون ڕۊشن زەینان
تا شیی چوون خورشید، وە جەبهەی (قیان)
جە (قیان) ویەرد، وە تاو وە تەعجیل
تا، یاوا، وە جام، جەبهەی (مەهلائیل)
هەم جە (مەهلائیل)، دیسان گوزەر کەرد
چوون، ئاوی حەیات، یاوا وەلای (بەرد)
جە (بەرد) هەم ویەرد، چوون خەدەنگ دۊخ
تا، یاوا، مەنزڵ، پیشانی، (ئەخنوع)
دیسان نە (ئەخنوع)، ویەرد، وېنەی باد
شیی، وە لای حەزرەت، (ئیدریسی) دڵشاد
جە (ئیدریس) ویەرد، چوون ئاینەی ناسخ
تا، یاوا، وەشاد، ئومەتولشەلەخ
ڕۊشن کەرد، جیهان، سەما، تا، سەمەک
دیسان، تەشریف بەرد، وە جەبهەی (کەمەک)
جە (کەمەک)، ویەرد، چوون، ڕەوانی، ڕۊح
تا، شیی، وە تۊی، جام، جەبهەی پاکی (نۊح).
[1]