باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و شەسس و یەکەمە
سەعد وەختێ زاناش کە عومەر بەڕاسی جەنگ کەرۊن و شمشېر مەشانۊن، وە زاناش فرە ئازا هەن و سەرمەگنۊ ملشەرە، سیاسەتو گفتوگۊیش ئاوەرد ڕوەو کاری، بە عومەری ماچۊ: زەماکەت و واڵەکېت موسوڵمانۍ بیېنۍ، تۊ جارێ لوە ئاڎیشا کوشە، ئینجا پەلامارەو موحەمەدی دە.
بەو حیلە سەعد هەم وېش ڕەها کەرد
وە هەزار حاڵ، گېیان جە دەسش بەر بەرد
عوممەر دەس کېشا جە مەعرەکەی ئەو
شیی پەی لای سەعید وە دەوانی دەو
یاوا وە قاپی قەسری دامادش
خەیلێ چەنیشان بەد بی نیهادش
دیش سەڎای قورئان نە تۊی ئەندەروون
چوون نەغمەی داود مەبۊ وە بیروون
زووتەر چوون جەناب نەبی ئیرادەت
هەر دەروچارە کەردەبۍ عادەت
یەک سوورەت سحەف کەلامی مەجید
ماوەردش پەرێ ئامینە و سەعید
چەو دما (جەناب) پەڕ هۊش و دانا
سوورەتی (تاها) پێشان مەوانا
جە ناگا عوممەر دەقلبابش کەرد
هەرسی پەیا پەی کېشا ئاهی سەرد
جەناب) فراوان خەوفش نە دڵ بەرد)
وېش هەم جە گوشەی مەنزڵ پەنهان کەرد
عوممەر تەشریفش وە ئەندەروون بەرد
چەنی ئامینە گفتوگۊش مەکەرد
پەرسا مەزموونی عەجیب مەوەندەن
یەکێتان مەواند یەکێ مەسەندەن
سەریح واچەن پېم دڵ وە ئەندېشەن
کەلامی کۍ بۍ مەزموونش چېشەن
مەعناش چە تەورەن مەتنی ئەو کامەن
شیفای کام مەرەز دەوای کام زامەن
سەعید وات: غەرەز یەقین یا عومەر
ئېمە جەی مەزموون نەداریم خەبەر
نە دۊست نە دوژمن نە ئاشنایان
کەسێ وەی ڕەنگی نامان وە لامان
غەرەز نە مەزموون نە مەکتووب خوانیم
نە تەورات پەرست نە ئینجیل زانیم
عوممەر وات: بەڵ من حاڵی یەم جە کار
بېزارین جە دین تایفەی کوففار
سوجدە وە خوڎای نادیڎە بەردەن
دینی موحەمەد ئیختیار کەردەن
دەست بەرد پەی باهووی سەعیدی بن زەید
داش وە زەمیندا چوون سەیادی سەید
نیشت نە ڕووی سینەش وېنەی فیلی مەست
مەدا لېش وە زەرب پەیا پەی پەیوەست
ئامینە گرتش کەمەربەندی ئەو
مەکېشاش بە زۊر بە دەوانی دەو
بەلکە شووهەرش وە چاری ناچار
خەلاس بۊ نە چنگ ئەو بەڵای ناخار
عوممەر وېنەی شېر مەستی بۍ ئەندېش
مشتێ دا نە ڕووی ئەو هامشیرەی وېش
دەردەم جاریی بیی، هوون جە ڕوخسارش
ڕەنگین کەرد سەفحەی گونای گوڵنارش
ئامینە دەس کەرد وە شین و زاریی
وە نەفەرەین سەخت وە بۍ قەراریی
واتش: جەو بۊنە تۊ مەدەی لېمان
پەنامان بەردەن وە خوڎای وېمان
خاترت جەم بۊ قورئان مەوانین
تا مەحشەر هەردوو هەرموسوڵمانین
ئەلئان تۊ هەرچی مەکەریی بکەر
ئەڵبەت خودایێ هەن جە باڵای سەر
حەققی مەزڵوومان خاتر پەڕ خاران
یەقین مەستانۊ جە ستەمکاران
بېزارین جە دین بت و بتخانە
پەنا بەر بەو حەقق یەکتای یەکانە
خوڎا بە حەققەت پېغەمەر بە حەقق
قیامەت حەققەن ڕای مەحشەر بە حەقق
ساتۊ ئەی عوممەر مەردەن نە ڕاتەن
چوبی تەختە بت، پەشت و پەناتەن
با عبودییەت خوڎای یەکتابۊ
بەڵکم پېغەمەر شەفاعەت خوات بۊ.[1]