قاڎرو لېفە شڕەکەش
بەشۍ یەرەمە
حەزرەتو ئاڎەمی پەی ماوەو هەزار ساڵا چەنی لېفەکەیش ژیۋا، جە ناگا جورعەی مەوتی ئاما، ئاڎەم جە دنیێ بەرشی، لېفەکەش بە میرات مەن پەی نەوەکاش، چاڎییشاوە پەی حەزرەتو نووحی، وەختو توفانی چەنی وېش سوارو کەشتیش کەرد، یاوا بە دەسو زاروڵەکا نووحی، دەس بە دەس ئاما، ئەوان دەس دەس شین، ئېڎ هەر مەند باقی، هەر کەسێ دەورێ پەرۍ وېش بەردش، هەرکەس موددەتێ خاو تېدا کەردش، تا یاوان بە لاو میرزا ئۆلقاڎری، چل ساڵەن مڎۊش وېشەرە، هەردوېشان، هەم میرزا، هەم لېفەکە، بېزارۍ بیېنۍ، داوا مەکەرۊن ئەو میزای کە ڕزگارش کەرۊن، بەڵام ئاڎ ماچۊ ئانە دەسەڵاتو من نېیەن.
غەرەز ئه و بابا (علیە‌السلام)
وە موددەی حەیات هەزار ساڵ تەمام
گا نە تۊی یاتاخ، گا هەم جە سارا
چەنی لېفە شڕ دنیاش ویارا
جە ناگا جورعەی جام ئەجەڵ وەرد
ڕۊحش وە ڕەوزەی ڕیزوان تەشریف بەرد
جه و دما لەحاف میراس خۊش خەو
وەجامەند پەرۍ ئەولادان ئەو
(یونس) و (یونە) ، (هاروون و هابیل
(قاروون) و شەمعی) ، (زەکاوە قابیل
هەر یەکێ دەورێ پەرۍ وېش بەردش
هەرکام مودەتێ خاو تېشدا کەردش
جە دمای ئەوزاع مەدرەسە و تەدریس
جە دەوران دوور یاوا وەلای (شیس)
ئەویچ هەم (قابچ) کەردش (قبچ) ڕۊح
لېفەشڕ یاوا وە جەناب (نۊح)
جە واڎەی تۊفان بەحر بۍ ئەندېش
نیاش وە کەشتی بەردش چەنی وېش
پادشای شاهان تاک تەنیای فەرد
کەشتی جەدەریای تۊفان خەڵاس کەرد
بەڵام تاعوونێ نازڵ کەرد لېشان
بېزار بین جە گیان زندەگی وېشان
بغەیر جە (یافس) سیوای (سام و حام)
فانی بین تەمام زومرەی خاس و عام
وەختێ تەمام بی واڎەی ڕجا و خۊف
دنیا خەلاس بی جە تۊفان تۊف
(سام و حام) جە نۊ لېفەشڕ بەردەن
هەنی شەریکی (یافس) نەکەردەن
تاکە دووسەڎ ساڵ هەر جە لاشان بۍ
ئه و بەرگی شه و خاو سەر تاپاشان بۍ
ئەوانیچ هەم شین وە ماوای عەدەم
مەند هەر لېفە شڕ خاسەی خۊش قەدەم
تا کەی دنیای دوون تیپ تیپ و جوق جووق
مەعمور بی دیسان جە گروی مەخلووق
چین چین لېفە شڕ بەردەن وە تاقی
ئەوان دەس دەس شین ئېڎ هەر مەن باقی
عەرزەی (مختصر) تەرز ڕەحمەتەن
عەرزەی (مگول) مایەی زەحمەتەن
هەر کەسێ دەورێ پەرۍ وېش بەردش
هەر کام مودەتێ خاو تېشدا کەردش
جە عەسری ئاڎەم تا حاڵی تەحریر
وەی تەورە بەندە کەردەنم تەقریر
ئه و لېفە خاسە پاو قدووم خەیرە
ئه و پەڕ قوی قەشەنگ ۆەش سەفا و سەیرە
دەس ئەو، دەس ئامان باوان وە باوان
ئینە چل ساڵەن وەڵی من یاوان
مەناڵۊ وە دەرد جەفای وېشەوە
تۊزی ماڵی نووح هەر ها پېشەوە
ئیمشه و کەفتەبۍ وەلای جېمەدا
دەسم بەرد بدٚەوش وە ڕووی وېمەدا
دەنگێ لېش ئاما پەشَېو بی هۊشم
سەڎای شیرینش ئاما نە گۊشم
واتش مروەتەن بۊ ئازادم کەر
وە سەر ئازادی خاتر شاڎم کەر
دەروونم ڕېزەی سەر مەودای خارەن
سەرتاپام تەمام فەتار فەتارەن
واتم من خاتر وەکی شاڎ کەروون
نەداروون قودرەت تۊ ئازاد کەروون
مەگەر ئه و شەخسە بوزۊرگەوارەن
چوون جەناب شېخ نە عام دیارەن
ئازادت کەرۊ نە عەرسەی خەتەر
سەر ئازاد مەبۊ تا (یوم‌المحشر)
وەرنە تا ئه و ڕۊ مەحشەر مەبۊ جەم
مەگېڵی چەنی ئەولادی ئادەم
(قاڎٚر) تا زیندەی ڕووی ڕۊزگارەن
دوعا گوی ئاغەی بوزورگەوارەن.[1]