جامەدۊزان (دروومانی)
بەشۍ یەکەمە
وەشەویسەکۍ میرزا ئۆلقاڎری خەریکەو دروومانینە(جامەدوزان)، جلی ئاڵ و واڵا ۋرازوون، کەوت وە سەودای نەقش، دار و گوڵکاری، کلکەوانەی لاڵش نە ئەنگوشت کەرد پەی دەفعو بەڵای، پەی ئانەی پەنجەی نازارش بە چەنەو خەیاتی زامڎارە نەبۊن، هەر تەقەڵێش سەڎ نازش مەکەرد، هەر نازێش سەڎجار هۊشش جە مەجنوونی مەسەند، بەڵام پڕێنە چەنی مېیانو پەنجاشەنە مەڕیا، ۋردە بییە، ۋستەش نە تۊی خاک، لەیلۍ خەیلێ خەمانش وارد.
میرزا ئۆلقاڎر، پېسە مەجنوونی دەسش بەرد پەی چەنۍ بېگیانۍ، وەنەش پەرسا: وەختێ تۊ جە پۊڵاینی، چەنی بە پەنجەی نەرموونیانی دولبەر ۋرد و خاش مەبی؟.
جامەدۊزان کەرد، جامەدۊزان کەرد
یەک ڕۊ لەیل وە ناز، جامەدۊزان کەرد
یاد هەوارگەی قەدیم هۊزان کەرد
بەخیەدۊزی بەرگ، دڵ ئەفرۊزان کەرد
خەیاڵش جە خەم تەمام کەرد خاڵی
بڕشت کەرد کاڵای ئاڵای مسقاڵی
کەڵافی حەی تار ئەژدەر ۋست نە پشت
کلکەوانەی لاڵ کەردش نە ئەنگوشت
پەی دەفع خەتەر نیش مەودای خار
تا پەنجەش وە خەم نەکېشۊ ئازار
وەتای خەیاتەی خام ناو شاران
چەنی ڕشتەی دڵ خاتر پەڕخاران
وادا وە هەمدا بە لارە و لەنجە
سەر مەودای دەرزی گرت وە سەرپەنجە
دڵ وە خەیاڵات، چەم وە نازەوە
لەب و شەکەر خەند ڕېزەی ڕازەوە
دەس وە دروومان بەخیە دۊزەوە
پیشانی به و شەوق شەم ئەفرۊزەوە
چوون باش خەیاتان ئۊسای تەتاری
کەوت وەسەودای نەقش، دارو گوڵکاری
هەر تەقەڵ سەدناز نەزاکەت مەکەرد
هەر نازی سەدهۊش جە ئاڎەم مەبەرد
بەڵام ئەی یاران دۊسان دڵداران
عەجەب کارێ دیم جە ڕۊزگاران
جه و دەمدا دوڵبەر دروومان مەکەرد
ناگا ئه و دەرزی شکیا و شکەست وەرد
ڕېزە ڕېزە بی، ڕېزا وە هەمدا
شیی نەڕاگەی مەوت، موڵک عەدەمدا
چوون پیشەی ڕەمیم قەدیم مەزاران
پەخش بی چەنی خاک خاشاک خاران
لەیلۍ هەم خەیلۍ خەمان بەرد وە دڵ
ئایینەی ڕەنگش قرمز بی چوون گوڵ
ساتێ پەشېو بی شای عەرعەر قامەت
جەودما واتش هەر وېم سەڵامەت
دەس بەرد دەرزی هەنی بەر ئاوەرد
دیسان جە نۊ مەیل وە دروومان کەرد
منیچ وېنەی قەیس دېوانەی ساڵان
جه و دەرزی بۍگیان پەرسام هەواڵان
هۊرگرتم جە خاک، واتم ئەی بۍ مەیل
شکست دای بە وېت، عاجزی وە لەیل
تۊ خۊ پۊڵای سەخت، سەرجۊش خار بیت
ڕەواج بازاڕ، پای سەوزەوار بیت
ئازیز به و پەنجەی بلوور بافەوە
به و سیم ئەنگوشت نەرم و سافەوە
کی زۊر پەنجەش زەڕەی پۍ یاوان
وېت وېنەی فەرهاد کوشت وە بۍ تاوان
کۍ دییەن بلوور پۊڵاش مەڕدەبۊ
کۍ دییەن شەکەر تەوەن هەڕدەبۊ
ئیسە تا مەحشەر بناڵە هاڵا
مەحرووم بیت جە دین، ئه و بەژن و باڵا.[1]
.