کابرای سەیېڎ، وەختێ نامەکۍ میرزا ئۆلقاڎریش مەیاوۊ دەس، پی تەرزە بە نازنامی شېعرییۆ جوابش مڎۊوە:
کابرای سەییڎ، ئێنکاریۍ کەرۊن کە کوڕو ئاڎیی هۊڕش بەردەبۊ، بارگەو ئیماما مارۊ نە حاجەت، باوا یادگارش خراب کەردەبۊ، دیوانو داوەریش پەڕ ئاو کەردەبۊ، تووڵی سەوزش سۊچنابۊ، گەر وەرسمېڵو وېش هۊرپاتەبۊ، ئانە هۊڕو ئاڎییش نەبەردەن، دیارەن کابرا ئەهلو هەقی بېیەن.
میرزام نامەیە میرزام نامەیە
ئیزار کەردەبیت پەی من نامەیە
نامەی وەش مەزموون بۊ شەمامەیە
مەرقووم وە تەحریر مشکین خامەیە
گۊیا فەرمابېت عەلی کوڕی من
هۊڕ تۊش بەردەن جه و زید و مەسکەن
چن ئیمام چن میر قوبەی زەڕکەمەر
کەردەبیت شەفیع پەی بەرگەشت هۆڕ
تۊ کە فەرمابېت گاهۊڵ کەم نیە
هەنی ئەی باقی ئیمامان چییە
من کە باوەڕم وە گاهۊڵ نەبۊ
باوا یاوەرم ئەر قەبوڵ نەبۊ
میرزام ئەر وە من باوەڕت مەندەن
وەرنە یانە گشت یەکسەر سەوگەندەن
قەسەم وە نووزەی قووزەی پارکۊڵە
گا هۊڵ وە حەسرەت بەستە بۊم هۊڵە
باوا یادگارم خراو کەردەبۊ
دیوان داوەرم پەڕ ئاو کەردەبۊ
تووڵ سەوز ڕەنگم ئاییر نیابۊ
خەنجەرم وە سەر خان ئەحمەد دابۊ
خائین کلین دایە خاتوون بام
ڕووسیای گەردوون بۊقلەموون بام
دەسم وە مەرقەد ئاغە گرتەبۊ
پەی عەزم تەواف ڕووم وە مەککە بۊ
سوب سەدای ئەزان ئامابۊم وە گۊش
شانابۊم بەرماڵ عابدان نە دۊش
پېشانیم وە ئېش سوجدەگا ڕېش بۊ
نیشانەی تانەی گشت قەوم و خوېش بۊ
قەومان بوینام نەپای سەحەردا
کېشابۊم پەردەی حیجاب وەسەردا
شه و (قائم اللیل) ڕۊ ڕۊچەوان بام
شەرمەندەی کلین دایە ڕیزوان بام
کەلیمەی تەوحیدی وە دەم واچا بۊم
بەرسمېڵ ویم وە دەس پاچابۊم
نماز کەردەبۊم گرتەبۊم ڕۊزە
پەی عەزم ۋزوو سەندەبۊم کۊزە
ڕەوان بام وە ڕووی ڕای مەدینەوە
ئاییر وەردابۊم وە کلینەوە
یانە گشت یەک‌یەک ئامابۊم وەسەر
چمان هۊڕەکەی تۊم بەردەن وە بەر.[1]