نامەی ئازیزی پەی میرزا ئۆلقاڎری، بەڵام ئەخیر نامەن، پېسە وېش تاریفېش مڎۊ نامەی یەومەلقیامەن، چوونکم کۊتایی وەشییەکان، تەمیارەی عاشقەکان، ناهەقیچش نېیەن، چوونکم بڕیارەی یەکجارین، گەر زامۍ دەردەو هیجرانی، نېشو دەردەو دووری، جار جار بە نامێو ساڕېژبان، ئیتر کۊتا نامەن، ئا ترووسکایچە گوم بییەن.
میرزا ۋیرو یارەکېش مەوزۊۋە کە عەشقو مېیانو من و تۊ ئاشکەران، ڕازەو من و تۊ عالەم شنەفتەن، خەڵکی پاسه مزانۊ کە:
مەشهوورەن جەلای نەزان هەواڵان
میوەی باغ تۊ من دان وە تاڵان
دووکان‌چەی وەسڵت هەرچی من بیەن
گۊیا غەیر جە من ڕاش وە کەس نیەن.
بەڵام پېچەوانەکەش ڕاسەن، من هەرکیز نەڎیەنم وە چەم تۊی یەخەی جامەت، نەکەردەنم بۊی باخی شەمامەت، سەیری گوڵزارت پەی دیڎەیم خار بییەن، پېسە واتەنشا: نۊشم نەکەردو سۊتا.
قیبلەکەم یاوا
قیبلەکەم یاوا .........................
ئاخر نامەکەت وەلای من یاوا
وېنەی زوڵف حۊر جەنەتلماوا
بۊسام تا تاوام وە دیڎەم ساوا
وەختێ سەر تاوار مەلاحیزەم کەرد
تا وانام هانام جە گەردوون ویەرد
واتم هەی دۊسان هاوار هەی یاران
وەشڵەی وە ئەحواڵ مەردەی مەزاران
وەس نیەن دوورەن جە گشت بەڵا و کۊس
ساکنن جە ئېش مەرگ دووری دۊس
فەرمابېت دیڎەم یە ئاخر نامەن
یە نامەی ئەعماڵ یەومەلقیامەن
حەقیقەت ئازیز مەئیوست کەردم
جە مەئیوسی وېم گرانەن دەردم
قیامەت کامەن عەزابش جە کۊن
قیامەت قامەت دووری باڵای تۊن
نزیکیت نزیک بەهەشتی باقی
دووریت دووی دۊزەخ مەڎۊ وە تاقی
ئەڵبەت سەفا و سەیر هەوای عەید نۊ
ئازیزم سەد جار موبارەکت بۊ
سا چوون هەر عەیدەن ڕۊزگار پەی تۊ
وەمەرگت ئازیز عەیدانەم مەبۊ
دڵ وە زام تیر نیم نیگات ڕېشەن
ساتوخوڎا جەلات عەیدانەم چېشەن
تایێ جه و کەڵاف سیای سەر وە هەم
تاریای حەڵقەی ماران ئەرقەم
بەرات کەر پەرېم سەوڵ سۊسەن خاڵ
جە تەنخوای کەرەم عەیدانەی ئېساڵ
با دایېم سەنای بەژن باڵات کەم
شوکرانەی وەساڵ خاڵ ئاڵات کەم
ئاخر بۍ ئینساف بۍ مەیلی تاکەی
جەرگم پەی کەردی وەسەر مەودای نەی
چەندساڵەن جە داخ باڵات مەناڵوون
تۊز پاڵاکەت وە چەم مەماڵوون
جە بەدبەختی وېم جە نەحسی تاڵەم
شوهرەی بەڎنامیم بەرزەن نە ئاڵەم
تۊمار دەردم ۋنیان پەی یاران
زەنگ ڕسوائیم ژنیان جە شاران
پەردەی ئابڕووم دریان وە چڵ‌دا
نەمەندەن تۊزیش نە یانەی دڵ‌دا
چوونکە ڕۊی ئەزەڵ فریشتەم چەفتەن
ڕاِز من و تۊ، ئاڵەم شنەفتەن
مەشهوورەن جەلای نەزان هەواڵان
میوەی باغ تۊ من دان وە تاڵان
دووکان‌چەی وەسڵت هەرچی من بیەن
گۊیا غەیر جە من ڕاش وە کەس نیەن
من وە مەست جام بادەت مەوانان
من هەم وە گەنجور گەنجت مە‌زانان
من خۊ چوون ماهی نە ئاو دوورکەفتە
دیک دەرون جۊش ڕیشەی دڵ سفتە
نەڎیەنم وە چەم تۊی یەخەی جامەت
نەشنەفتەنم بۊی نەوبەر شەمامەت
شیرینی وەسڵت پەی من چوون ژار بۍ
سەیر گوڵزارت نەدیڎەم خار بۍ
غەیر جە بېمەیلی و سوستی و لاباڎیی
هەر نەدیم هەرگیز جە لای تۊ شاڎیی
ڕاسەن چەنی من عەهدېوەت کەردەن
بەڵام کەس عەهدش وە سەر نەوەردەن
پەی چېش چوون ئەجەڵ داېم نازڵەن
هەر سەودای گوڵەن ئیسە نە گڵەن
قیبلەم وە مەرگت فەڵەک بېباکەن
هەر مەیلێ خاسەن پاشیای خاکەن
عومر هەم بەو تەور پایەدار نیەن
زندەگی ئینسان وەفادار نیەن
چوونکە چەنی کەس تا سەر یار نیەن
دنیای دوون ئەوەند بەرقەرار نیەن
جەودما وە نوور پاک پیغەمبەر
بۊ جە دەربارەم بېشەرتی مەکەر
وە بارگەی بوڵەند بەرز ئیمامان
بۊ نەجاتم دەر جە ئېش زامان
وە مەرتەبەی پاک غەوس بەغدا ماڵ
تۊر و قارت گشت بەرکەر نە خەیاڵ
با نەبوون وە قەیس چۊڵ کۆسارا
کافیەن وەسېن توو شای بوخارا
وە وەیسی نازار وە شای داڵەهۊ
وە کۊسەی هەجیج پیر شاهۊکۊ
باجەتی ئەنفاس شېخ ئەورامان
چوون عەرەب دەخیل دەستم وە دامان
یە گشت وە حاجەت بە لات ئاوەردم
مەبۊ حازر کەی دەرمان پەی دەردم
سەردی پەی قولەی سەردیارانەن
گەرمی لازمەی بەین یارانەن
ئەگەر نەپەرسی ئەم جار جە حاڵم
بشۊت نە گەردەن سی تەوق زاڵم
مەسپارووت وە سۊز هەناسەی شەوڕەنگ
وەی چرەقەی قرچەی کزەی دڵەی تەنگ
وەی هوون زووخاو وەی زام کاری
تا سەرت زندەن وەشی نەویاری
پەوکی دۊعام کەرد یاوان وە گیانم
هەنی نەمەندەن تەمای ژیانم
دڵ‌ئازار نەوی جە واتەی مەردم
وە گیانت قەسەم ئەوگارەن دەردم.[1]