میرزام نەمامان
بەشۊ یەرەمۍ
نۊ نەمامی ناو باخان، درېژەو جوابەکەیشەنە پەی میرزا ئۆلقاڎری، ماچۊ: ئی دیباو ڕەنگاو ڕەنگە پەی کەسێ خاسەن سەوداش نە سەر بۊ، دڵبەرەش دوورە بۊ، تەسکینەن پەی دڵ بریندارا، هەر دارێ تەحرێ، هەر چەمێ دەنگێ، بەڵام ئی وەشیە کوڵەن، دیارەن نیشانەی نزیکی مەماتی مەوتەن. دمای ئانەی میرزا گۊشش گېرت پەی جوابو نۊ نەمامۍ، ئیتر چەنی وېش کۆت واتەو کۊشگېرتەی: بە وېش ماچۊ وەسېن ڕازان چەنی دار و چۊی، ئاڎېۍ وەسنیا ساڵێ جارێ مەشان ئەو عەدەم، بەڵام تۊ هەر مەنی پەی دەرد و خەمی.
بەڵۍ پەی کەسێ سەوداش نەسەر بۊ
مەحرووم دیڎەن، دیڎەی دڵبەر بۊ
سەیرەن پەی حاڵەت دڵ بۍ دەماخان
نیگای چەماو چەم تەماشای باخان
تەسکینەن پەی حاڵ خاتر پەڕخاران
سۊزەن پەی خەیاڵ دڵ پەڕ پەژاران
نە هەر شەتاوێ سەڎای کۊسېوەن
هەر دارێ پەی وېش نەوعە ڕووسېوەن
یانی یە ڕەونەق بوتخانەی چیینەن
یا ڕەنگ باغچەی خولد بەرینەن
بەڵام ئاخ شاڎیی پایەدار نېیەن
وەفای چەرخ چەپ بەرقەرار نېیەن
مەعلووم یە لیباس فاخرەی فەوتەن
نیشانەی ئامای مەمات مەوتەن
فەڵەک ها دیسان شېونا لېمان
وەیشوومی ئەجەڵ نمانا پېمان
هەور نۊ هەواش هەم مونقەلیب کەرد
ڕەعد و باد و بەرق جە سەردا ئاوەرد
وارا تۊف تەم سەیلات باران
بەدەڵ کەرد لیباس ئەلوان داران
تافتەی قەناویز لۆنگ سەرخامان
ڕېزە ڕېزە بی ڕېزا نە دامان
زلان شەوگەرد تەریدەی قاتڵ
چوون فریشتەی شەڕ ناگا بی نازڵ
چین‌چین خەڵاتان جە نۊ بەردەوە
باڵامان وە جەور عوریان کەردەوە
لۊی هەر کەتانێ بەرد وە پای غارێ
هەر کالایە کەوت وە سەر دیارێ
باقیماندەی وەڵگ هەرچی ڕەزانەن
ئیسە یەکسەر گرد فەرش خەزانەن
وەی پەرۍ هامن، وەی پەی وەهاران
وەی پەی جای خاڵی خېڵ نازاران
جە بەدبەختی بەخت هەوای تۊف سەرد
هایهاتم جە نۊ خاڵ‌خاسان کۊچ کەرد
سەفا و سەیر ۋیەرد هەر مەندەن تاڵی
هەردان یەکسەر چۊڵ هەواران خاڵی
چەمەنان ماتەم باخان گرد کەساس
تەختانان بېزەوق حەوزان بۍ ئیخلاس
نە دەنگ شاڎیی نە سەڎای سازەن
نە بەزم یاران ناز و نیازەن
نە سەوزەی گەردوون نە وەخت کارەن
نە مایەی ڕەواج گەرمی بازارەن
نە دەنگ ئاهەنگ عەشق یارانەن
نە قەهقەهەی شەوق بادە خارانەن
فەسڵ شاڎییش کەرد کزەی باد سەرد
خاڵیەن جە گرد غەیر جە داخ دەرد
پاییز نام ۋېش هەر ها ۋېشەوە
فەزای زمستان تەک دان پېشەوە
ئەر بشۊ وە عەرش عەتر بخوورش
عالەم بېزارەن دایېم جە نوورش
میزان بازار شاڎیی زەوق ۋیەرد
چەپگەرد ژار نیش نە عەقرەب ئاوەرد
دانەی مەودای تېخ ژار ئالوی سادە
نە دووشاخ خرس مدران ئامادە
ها وەختەن بڎۊش هەم نە جەرگمان
بوانۊ ڕەقەم مەوت مەرگمان
وەشڵەی بە مەخلووق چەنی مەردەشان
یەک جارەن فەنا و تەشریف بەردەشان
ئېمە شش ماهەن زیندەگانیمان
هەم فەنا مەبۊ عومر فانیمان
هەر ساڵێ یەکجار مەشین ئه و عەدەم
سەکەرات مەرگ مەوینین وە چەم
یە شەرح مەینەت ڕووی ڕۊزگاران
یە تۊمار دەرد بېدەوای داران
یە زام کاری سەخت کەس نەزان
یە گەڵاڕېزان یە فەرش خەزان
بۋینە جەستە و حاڵ و باڵمان
ئەوسا بپەرسە جە ئەحواڵمان
هەنی چېش واچوو میرزای خەیاڵ خام
ئېڎەن جوابت باقی وەسەلام
(قاڎر) سا وەسەن هەنی گفت و گۊ
کافیەن ڕازان چەنی دار و چۊ
ئەو ساڵێ جارێ مەشان ئەو عەدەم
تۊ تا قیامەت های نە خاک خەم.[1]