بابەتە: پووڵی نەقد بارە
نویسەر: ڕ.ک
داستانێوە هەرەقەتیەو شارەکەیما
ڕەنگا شمەیچ چن جارێو شاهېڎۍ باحسێوی ئەچیمنەیە بیېبیدۍ.
مەتەبەکە فرە گرمووقاڵ بۍ، ڕیش‌چەرمېوی هەژار و فەقیر لاو مۆنشیەکېنە مدرابېرە، دەسېش لەرزېنۍ و بە سەختی وېش گېرتەبېش کیسەشەنە کارتێوش بەرد ئاردەبۍ و بە ئەوەلاڵیای ۋاچۍ:
- ڕۊڵە گېیان، وەڵڵا زانگۊڵېم نمەقەمچیاوە و نمەتاو پلەکانەکارە دیسان وەزوەرە وار، پېیاوەتی کەرە پووڵەکەی چی کارتیە گرفت.
مۆنشیەکۍ لاچەمۍو دیا پەیش و بە مۊڕەوە واتش:
- چن جارۍ واچوو کارتخانما نېیا لوە پووڵی نەقد گیربارە. نمەتاوی بلی ڕانە موشکۊڵەو وېتەنە، گۍ وەڵۍ ئانەیە بەی مەتەب پووڵی نەقدت ئاردەیا چنی وېت.
ڕیش‌چەرمەی داماگ ملېوش کەچ کەرد و نەمانە گۊچانەکېش و پلەکانەکارە کەوت ڕا. تازە هیچش پنە نەکریۍ و بۊنەو دەرمانەو دەرڎەکېو وېشەوە مشېیەیا گردچېوش قەبووڵ کەردەیا.
من و ماباقی نەوەشینەکایچ ماتڵۍ نۊبەتیما بېنمۍ و پاڵما دابۍ سەڼەڵیێ مەتەبەکەی و گۊشما گېرتەبې پەی ئی وات و واچیشا.
ژەنېوە سنح ویەرڎۍ وەروو دەمیمەنە نیشتېبېرە، دیاوە دما و باحسش گیسنانە و ماچۊ:
- ئینۍ ئەنقەسی کارتخانشا نېیا، مزانی چی؟ بۊنەو ئانیوە پتاوا پووڵی فرەما چنە پسانا و گەرەکشا نېیا یاگەپا کەرارە و سابتبۊ سەرشا.
ئی لاتەرەوە پیایێوی جوان داش دلۍ قسەکاما و واتش:
- نمەشۊشەوە ونە ئانەبۊ، من ئەجۊم گەرەکشا نېیا کەس بزانۊ چن پووڵ بەرمارا چی مەتەبەنە، بۊنەو ئانەیوە ماڵیات نەڎا...
چی ئەسنانە هۆرسانېوە و لوانۍ لاو مۆنشیەکۍ و پەرسام:
- چڕ.کی کارتخان نمەنیەیدېرە با نەوەشینۍ مەجبوورۍ نەبا وەیلانۍ با شۊنەو پووڵی نەقدیەرە؟ وېتا مزاندۍ فرەو عابربانکا پووڵی نەقد نمەڎاوە.
مۆنشیەکۍ سەرەش هۊرنەبڕنا و دیار بۍ وەشش نامابۍ پەرسەکېم، چېروو لچانە بۊڵێوش کەرد و واتش:
- شمارە کارتتا مڎەو، کارت بە کارتش کەردۍ، ئیتر چېشتا گەرەکا؟!
واتم:
پاسە نېیا فرەو ئی نەوەشینا همراه بانکشا نېیا.
ئیجار بە تووڕەیوە سەرەش هۊربڕنا و ماچۊ:
تۊ کارت چېشا سەرو ماباقی نەوەشینەکاوە، خۊ وەکېڵەشا نېیەنی.
بەڕاسی وەختێو باحسوو پووڵیبۊ فرەو دەس ورەشا و سەوزی ورەشا هەزار شەرەفېشا هەنۍ ملو بازېو دەسەڵاتدارارە.
جېیا چانەیە ماڵیات دای بە دەوڵەتی پېسەو یاسایێوی بېیەن ئەرکو سەرو شانەیماوە، باحسێوی ئینسانیچا.
بەداخەوە بازېو پزشکېما بۊنەو دەورەوە دای ئی یاسایە و نەفعێ تاکەکەسی وېشا، ڕەنجو نەوەشینەکاما فرەتەر کەرا.
تەماڎارېنمۍ چنەشا چی باروودۊخە ناوەش هەنە لۆسێوە سەرو شانەو خەڵکی هەژاری هۊرگېرا نەک وېشا بابە باری سەر بارما.[1]