قەولێ موسا
ب دەستوری خودی

رۆژەکێ ژ رۆژانە
موسا وێ دخونت کتێب و مشورانە
عەزراییل و جبراییل ل مەزەلا موسا بوونه مێڤانە
* * *
سبەیەکه ژ خلفەته
موسا وێ دخونت مشوران و خەتە
رێیا عەزراییل و جبراییل ل مەزەلا موسا دکەفتە
* * *
موسا وه دەنگ دکەته
یا جبراییل وه چی خلمەته
ئیرو گیانێ من ژ بەر وە گرت بوو هەیبەتە
* * *
یا موسا بەس بکه سەخبێرە
رابه روحا خۆ ب مە بسپێرە
هاته سەر ته مەرسوما جەبێرە
* * *
موسا دبێژت ؛
ب وی کەم ئیکی خەفوره
ئەز روحا خۆ ناکەم دەستورە
کولفەتێ من هێژی هورە !
* * *
وه دبێژت جبریلێ ئەمینە ;
یا موسا رەبەن عەمرینه
رزقێ کولفەتێ تە وێ ل خودێ ، ل ته نینه
* * *
یا موسا ! رابه و هلوەسته
ئەوان بەرب بەحرێ کرە قەستە
ئەمین جبراییل شڤا قودرەتێ هلگرت بوو بدەستە
ل بەحرێ دا ، با ژ هەیبەتێ دوو تەلی ژ بەر ڤەدوەستە
* * *
هەی پەدشێ من یی پەدشە
بنێ بەحرێ کرمە و داشە
دەڤێ کرمی پەلگەک ماشە
* * *
موسا ژ وێ د هاتە مالە
وێ ژێ د پرسن دای و حەلالە
هەی موسایێ منۆ یی دێم شەمالە
ئیرۆ خولکێ تە گەلەکی تالە
* * *
موسا دبێژتە دییا کالە
یا دایێ ! شیر و بەرێ خۆ ل من بکە حەلالە
هاته سەر من مەرسوما باری تەعاله .
* * *
دەیکا موسا شیرێ خۆ لێ حەلال کرییە
موسا ژ وێ درەڤییە
هن رەڤی ، هەتا سەرێ وی ب تالیا قولنچکا دنیایێ کەفتییە !
* * *
موسا ژ وێ ڤەدگەرییە
دیتن دوو جوانیێت قیمەتیە
وێ تربەکێ د کۆلیە
چو جنازە دیار نییە
* * *
جبرایل د گوتێ ; یا موسا ! برایەک هەبو
مالا وی یه ل مە‌که بو
ب بەژنێ هەری وەکی تە بوو
کا وەره برنه ڤێ تربێ وە بوو ، یان وەنە بوو ؟!
* * *
دە‌‌رێ تربێ ل هەسل دەنا
ئالیەک ئاڤە ، ئیک خەنا
گوتێ; برانۆ ! نەکو ل من بکەن فەنا
* * *
دەرێ تربێ یی هندا
ژ قەولێ شئخ هەڤندە
موسا رازا بوو د بن ده
* * *
دەرێ تربێ یی رەشە
سەر سنگێ موسا راخستبوون ئاخ و فەرشە
موسا گۆت; بیهنا ڤێ تربێ گەلەک بمن یە خۆشە !.
* * *
دەرێ تربێ یی زەرە
سەر سنگی موسا راخست بون ئاخ و بەره
موسا گۆ : مرن حەقه و گۆڕە فەرە
* * *
موسا کلیمچیەکی چێیە
ئەوی رۆژێ نۆت و نەﮪ کلیمە دگەل خودێیە
ئه و ژی چۆ ، سەرێ وی ل ناڤ ئاخێ یە
* * *
موسا کلیمچیەکی چێ بو
ئەوی رۆژێ نۆت و نەﮪ کلیمە دگەل خودێ بوو
ئه و چۆ سەرێ وی ل ناڤ ئاخێ بوو

ئەم دکێمن خودێ یێ تەمامە. [1]