لاچەمېوی گولانە سەرو کتېبوو (ژیان لە بازنەی ڕووداوەکاندا) بەشۊ: یەرەمۍ
دەس پەنە کەردەو ژیوای جووتیاری هەر جە ئەدابییەیشۆ تاکو گۆرە بېیەیش، گنوونە دلێ دەورانێوی کە خەموو نانی بەرۆکەو وەڵاتیش گرتێنە و ڕەنج و ئازار و کۆچ و ئاوارەیی پەی ژیوای مېیاوۆ بە ئەوپەڕوو وېش. کەپرسەوز کە ماناکېش کەرۊ بە: شۆنەو نانیەرە ڕەمای عادەتێو بېیەن کە تاتەو جووتیاری و کەس و کاروو جووتیاری چا دەورانەنە، دەگا بە دەگا لوێنێ و هەر دەگایوە کە نانش چەنە بیەبۆ ئەرەنیشتێ بېیېنۍ.
هەر چا بەشەنە نامۍ گردو دەگاکا دەشتەو زەهاوی و تیرە و تایفەو خەڵکەکەیش و پێوەرە ژیوای و یاردیدای و دەسوامێ خەڵکی بە یەکتری، بە زەریفی و حەکایەتێ وەشێ گېڵیاوە.
چی بەشەنە جووتیار ئاندە نەقڵێ زارۆڵەییش وەش گېڵنۆوە کە وەختێو موانیشاوە، سەرەهەڕینی مارۆنە خوای. دلێ ئی گردو بەسەرما و ئەوەگېڵیایانە، یەک چېو زاڵا سەرو گردو چېوەکارە، ئادیچ هەژاری و نەداریا. وەلێم چۆلایچۆ، سەرەڕاو ئا فەقیری و بێدەسەڵاتیە، سادەگی ژیوای و پێوەرە بېیەی و بەزمێ شەوانێ و شەونشینیێ، ئینێ گرد ئۆمێدېو وەش کەرا و پاڵ منیا بە ڕۊتوو ژیوایۆ تاکو ڕۊی دماینش دیسان ئا خەڵکە بتاوا پەی مەینەتێوتەری و ڕەنجێوتەری وېشا حازر کەرا.
چېوێوتەر کە بە جۊرێو پێوەن مدریۆوە پی بەشیۆ ئانەنە کە، جووتیار وېش بە یاگێ نویسەری شۆنەو بڕېو چا حەکایەتانە مەینە مەیدان و گنۆ نەقد و ڕەخنە گرتەی جە بەشێو چا داستان و قسە و باسوو خەڵکیە. بە تایبەت چا یاگێنە کە باسوو ژەنێ بە خراب کریۆ مێوە جواب. ئاوەختە کە گەورەتەربۊ و ویرێ کەرۊوە کە جە بڕېو چا ڕازانە، ژەنی بە مەکرباز و پەیمان ماڕ و دامەن پیس دریێنە قەڵم. ئینەیە جە نەتیجەو کۊمەڵگاو پیاسالاری منیۊرە.
هەر ئی واتە، جووتیاری وزۆنە دلێ کەمپوو بەرابەری وازەکا و ئازاد ئەندیشەکا کە جە فرەو یاگا ئی کتېبېیەنە بە ئازایی و وەنەبڕیایی ماڵۆ داب و نەریدە کۆنەکارە و سەبەبەکەیچش بەرۊوە سەرو سۆنەتە دماکەوتەکا، کە بەشێو چا سونەتا، مەزهەبە جۊراوجۊرەکێ، ئینێ پەشتیشاوە.
هەر ئەچی یاگێنە، بڕېو چا حەکایەت و قسە وەشا، بە شێوەو شێعرێ قافیەدارێ، گنا وەروو چەما. ئی شێعرێ کە بە ئەسڵوو زوانو مەنتێقەکەی واچیێنێ، وەختێو وانەر موانۊشاوە تام و لەزەتی تایبەتشا چەنە گېرۆ.
ئی زوانو شێعرا، زوانو گردو مەنتێقەو گۊرانیا کە زیاتەر جە هەزار ساڵێ چېوەڵتەر زوانو گردو ئا خەڵکیە بېیەن. نویسەر جە فرەو یاگانە ئی شێعرێشە هۆرگېڵناینێ بە شێوەزاروو سۆرانی، کە بە برواو من ئەچېگەنە نویسەر هەرمانۍوی زیادەش کەردەن.
ڕەزا بەهمەنی.[1]