لاچەمېوی گولانە سەرو کتېبوو (ژیان لە بازنەی ڕووداوەکاندا)
بەشۊ: پەنجەمۍ
ڕازەو قۆلانچە خاتوونێ لاپەڕەو (151) ی، یۊ چا ڕازە وەشا هۆرامانېیەنە، کە ئۊسا فرەتەروو ئەدا هۆرامیەکا ئی ڕازێ زانێنێ.
قۆلانچێ! مەواچە قۆلانچێ!
قۆڵ و مۆڵت داپاچێ!
ئەی واچوو چېش؟
واچە:
نازناز مەرجان، تەق تەقەی کەوشان، ئانە کۊ مەشان.
دلێ فرەتەروو ئی ڕازە وەشانە، نزیکیێوی یەکجار فرە چەنی ڕاز و حەکایەتەکاو هۆرامانی گنۆ وەروو چەمی. هەر ئینە نیشانە مدۆ کە جە ۋېیەردەنە ئی مەنتێقێ هەردوێ، ساحێبوو یەک زوانی و یەک فەرهەنگی بېیېنۍ و تێکەڵی ئا ڕاز و حەکایەتە قەدیمیا، شاهێدېوی ئینکار نەکریا.
ساحێبوو ئی ڕازا و ئی حەکایەتە وەشا، بە واتەو نویسەری، فرێشا گۆڕ غەریبێ بېیېنۍ و یا جە ئۆدووگاکاو ئێراقیەنە یا ئۆرووپانە، گېیانشا جە دەس دان.
مەنتێقەی جوغرافیایی و کۆچی ئجباری و جەنگوو دەسەڵاتەکا، هەر جە زەمانوو وەڵێ ئۆسمانیەکاوە تاکو ئیسە، کەردەنش پانەیە کە جۊروو هۆرس و نیشتوو خەڵکی و بە درێژایی ۋېیەردەی ویەرینی، فاڕیایشا سەرەرە بۍ و کەم تاکو کوت جیاوازی پەیدا کەرا.
دلێ ئی بەشیەنە نویسەر سەنگ تەماش نیان و هەر جە زەمانوو ئیل و تایفەکاوە گېرەش پەنە تاکو دەورانوو دەرەبەگایەتی و خان و ڕەعیەتی، چەنی ژیوای خەلکیش وستەن چیروو زەڕبینوو چەماش و بە نموونێ وەشێ و داستانێ و حەکایەتێ، وەزعەو ژیوای خەڵکی و ڕەنج و مەرارەتەکېشا وستێنېش سارا و باسش کەردێنێ.
ئینقلابوو چەرمەو حەمەرەزا شای کە شۆنەو دەرەبەگایەتیەرە، ژیوای خەڵکیش جە گردو مەنتێقەیەنە، تاکو ڕادېو فاڕا، چی بەشەنە بە وردی و هەرپاسە کە بېیەن نویسەنش و شیش کەردەنۆ.
یۆ جە خاڵە ئەساسیەکا کە نویسەر جە نویسەکاشەنە بە تایبەت چی بەشەنە بەرش وزۆ، بێلایەنی و سەربە وێ بېیەیا.
دلێ ویرەوەریانە جار جار کەسانېو پەیدێ با کە بەپاو ئیدئۆلۆژی و ویر و پەیلوای وېشا قەزاوەتوو وەزعەکێ کەرا، بەڵام هەرچی زیاتەر ملمێ وەرۆ چی کتېبەنە، وینمێ کە نویسەرو ئی کتېبیە ئەر چېوێو یا ڕوداوێو چەنێ ویر وڕایش نەگۆنجیابۊ، ئاد هەر پېسە وېش باسش کەردەن. بەڵام شۊنیشەرە پەیلوای وېش سەرو بابەتەکەی نویسەن.
نموونەو ئانەیە کە چا ئینقلابە چەرمەو حەمەرەزا شایەنە، بەش کەردەو زەمینی سەرو باخەوان و جووتیار و کەشاوەرزەکارە بە هەرمانۍوی خاس مدۆ قەڵەم و وەزعەو سڵامەتی و پاک و پۆختیی و بهداشتی دەرمانی خەڵکی بە ترەقی و وەرلوای منیۊرە.
هەر چا بەشەنە دیسان ڕاسیەکا مارۆوە ویرو وانەری کە: هەرچن ئاغا و دەرەبەگەکێ چا وەختەنە نەمەنێ و زاییفێ بیێ، بەڵام ئاندەش نەبەرد هەر ئا ئاغا و دەرەبەگێ دیسان بیێ دار دەسو دەسەڵاتی بەڵام ئی جارە بە جۊرێوتەر پەی چۆسنای خەڵکی فەقیر و چېر دەسی.
ڕەزا بەهمەنی.[1]