ناونیشان: دوایین هۆشداریی ئەمریکا بۆ یەکگرتنەوەی هێزەکانی پێشمەرگە
نووسەر: #دیار کوردە#
ڕۆژی دەرچوون: #31-07-2023#
دەمەوێت بەو پرسیارە دەست پێبکەم کە ئەمریکا بەجیدییەتی و کورد چۆن لێی تێدەگات؟ بەپێی زانیارییەکان و چاوپێکەوتنەکانم لە واشنتن و دامەزراوە جیاوازەکانی بڕیاردان لە ئەمریکا، هەروەها ئەو گفتوگۆیدانەش کە لەگەڵ بەرپرسانی ئێستا و پێشوو و تەنانەت شارەزایان و پسپۆڕان کردوومە، بەرپرسانی کورد دەبێت ئەو هۆشداری، پێشنیاز و بۆچوونانەی بە نەرمی پێیان دەگوترێت بە جیدی وەربگرن، چونکە سەرئەنجام دوو بەیاننامە بۆ میدیا، لێدوانێکی سەرپێیی لێرە و لەوێ، سەردانێک و تەوقە و باوەشێکی گەرمی بەرپرسێکی ئەمریکی چارەی دەردەکە ناکەن و، ئەم پەیوەندییە بەهێز و ستراتیژییەش کە باس دەکرێت دەرمانی دەردی هەرێمی کوردستان لە داهاتووی ئێراق و ناوچەکەدا ناکەن، ئەگەر کورد نەکەوێتە خۆی و بەخۆیدا نەچێتەوە و بە ڕژدی شتەکان وەرنەگرێت.
هەردوو حیزبی چەکداریی هەرێمی کوردستان (پارتی و یەکێتی) ، لە ساڵی 1992وەوە باسی یەکگرتنەوەی هێزەکانیان دەکەن و لە 2005 و دوای یەکگرتنەوەی هەردوو ئیدارەی #هەولێر# و #سلێمانی#ش ئاهەنگی گەورەیان بۆ سازکرد و لە دوای 2014 و هاتنی #داعش# و هەوڵێکی جیدیی ئەمریکا و هاوپەیمانانیش بۆ یەکگرتنەوەی ئەو دوو هێزە، هێشتا نەک یەکنەخراون، بەڵکوو بەپێی ڕاپۆرتێکی پشکنەری وەزارەتی دەرەوەی ئەمریکا، ئێستاش ژمارەی هێزەکانی پارتی و یەکێتی لە ژمارەی هێزە هاوبەشەکانی #وەزارەتی پێشمەرگە# زیاترە! ئەمە سەرەڕای ئەوەی ئەو هێزانەش کە ناویان هاوبەشە، هەژموونی حیزبییان بەسەردا زاڵە لەوانەیە وەک کاتی هێرشەکانی 16ی ئوکتۆبەر لەبەر یەک هەڵبوەشێنەوە.
لێرەدا بە کوورتی دەمەوێت باس لە جیدییەتی ئەمریکا بۆ یەکگرتنەوەی هێزەکانی پێشمەرگە لە هەرێمی کوردستان و داوای ئەمریکا لە یەکێتی و پارتی، بەردەوامبوونی هاوکارییەکانی ئەمریکا بۆ هێزە هاوبەشەکان و چارەنووسی پەیوەندییەکانی هەرێمی کوردستان و ئەمریکا بکەم، ئایا کێ پشت دەکاتە کێ لە داهاتوودا؟
=KTML_Bold=بەر لە مانگی 9 وەزیرێک بۆ وەزارەتی پێشمەرگە دیاری بکەن=KTML_End=
چەند هەفتەیەکی دیکە بە دیاریکراویش لە مانگی ئەیلوولی ئەمساڵ، وەزارەتی بەرگریی ئەمریکا و هاوپەیمانان پێداچوونەوەیەکی ساڵانە بە کارەکانیان لە هەرێمی کوردستان و لەگەڵ وەزارەتی پێشمەرگە دەکەن، بەر لەم پێداچوونەوەیەش، لە مانگی تەممووز، شاندێکی هێزەکانی ئەمریکا و هاوپەیمانان لەگەڵ وەزارەتی پێشمەرگە کۆبوونەتەوە، لە کۆبوونەوەکەدا بە ڕوون و ڕەوانی بە بەرپرسانی هەرێمی کوردستان و پارتی و یەکێتی کە پەیوەستن بە کاروباری هێزی پێشمەرگە، گوتووە، ''ئەمریکا چاوەڕێی ئەوە دەکات، بەر لە پێداچوونەوەی ساڵانەیان کە لە مانگی ئەیلوول، دەبێت هەرێمی کوردستان جیدیەتی بە کردەوەی سیاسیی خۆی نیشانبدات بۆ جێبەجێکردنی هەنگاوەکانی چاکسازی لە وەزارەتی پێشمەرگە، بەتایبەتیش دیاریکردنی وەزیرێکی کاتی (چونکە حکومەتەکە کاربەڕێکەرە) بۆ وەزارەتی پێشمەرگە''، هەر ئەمەش نا، نیگەرانی و بێزاریی خۆشیان دەربڕیوە کە ئەم پڕۆسەیەی لە وەزارەتی پێشمەرگە ناویان ناوە، یەکخستنەوەی هێزەکانی پێشمەرگە نەک بەرەوپێش نەچووە، بەڵکوو بەهۆی ناکۆکی و دابەشبوونی سیاسیی نێوان پارتی و یەکێتی خاوبووەتەوە و بەربەستی تازەی بۆ درووستکراوە.
لە ڕوویێکی دیکەوە، ڕۆژی پێنجشەممە، 27ی تەممووزی 2023، لە وەزارەتی دەرەوەی ئەمریکا، لەسەر یەکخستنەوەی هێزەکانی پێشمەرگە پرسیارم لە ڤێدانت پاتێل، جێگری گوتەبێژی وەزارەتی دەرەوەی ئەمریکا کرد، ئەو بە ڕوونی وتی ''ئێمە بەردەوامین لە نیگەرانییەکانمان سەبارەت دابەشبوونی نێوخۆیی لە پڕۆسەی چاکسازیی پێشمەرگە و نیگەرانییەکانیشمان گەیاندووەتە سەرکردە باڵاکانی حکومەتی هەرێمی کوردستان. پێم وایە ئەمە دەربڕینێکی زۆر ڕوونە و پێویستی بە هیچ لێکدانەوەیەک نییە.
هەروەها ڕاپۆرتی پشکنەری وەزارەتی دەرەوەی ئەمریکا بۆ چارەگی یەکەمی 2023 بۆ کۆنگرێس، بە ڕوونی ئاماژە بەوە دەدات کە بەرپرسانی ئەمریکا لەنێویاندا، لوئید ئۆستن، وەزیری بەرگری، برێت مەکگۆرک، ڕێکخەری کاروباری ڕۆژهەڵاتی نێوەڕاست لە کۆشکی سپی، کاتێک ئەمساڵ لە دوو کاتی جیادا چوونەتە هەولێر، لە کۆبوونەوەکانیان لەگەڵ #نێچیرڤان بارزانی#، سەرۆکی هەرێمی کوردستان، زۆر بە ڕژدی جەختیان لەسەر پێویستیی خێراکردنی یەکخستنەوەی هێزەکانی پێشمەرگە کردووە.
سەرچاوەیەکی ئاگاداریش لە کۆبوونەوەکانی ئەم دواییەی دەینا سترۆڵ، جێگری یاریدەدەری وەزیری بەرگریی ئەمریکا لەگەڵ بەرپرسانی هەرێمی کوردستان، ئەوەی پێوتم، کە لەو کۆبوونەوانەش باس لەم پرسە کراوە و ئەو بەرپرسەی ئەمریکا ناڕازیبوونی وڵاتەکەی سەبارەت پڕۆسەی یەکگرتنەوەی هێزەکانی پێشمەرگە و نەبوونی وەزیرێکی پێشمەرگەش بە بەرپرسانی هەرێمی کوردستان گوتووە.
پێشتر بەرپرسانی ئەمریکا لە کۆبوونەوە داخراوەکان و دوور لە میدیا و شوێنە گشتییەکان، ناڕەزایی و بێزاریی خۆیان لە بەرانبەر یەکنەگرتنەوەی هێزەکانی پێشمەرگە و سستیی پڕۆسەی چاکسازی لە وەزارەتی پێشمەرگە بە بەرپرسانی هەرێمی کوردستان و وەزارەتی پێشمەرگە دەگەیاند، بەڵام ئێستا بە ڕۆژی ڕووناک ئەو ناڕەزایی بوونەیان دەڵێن. دوایین ڕاگەیێندراوی هاوپەیمانان و لێدوانەکەی ئەلینا ڕۆمانسکی، باڵیۆزی ئەمریکا لە بەغدا بۆ ڕووداو و قسەکانی پاتێلیش بۆ من، سێ نموونەی دیارن کە هەرسێکیان ئاماژە بە نیگەرانی و ناڕازیبوونی ئەمریکا لەو پڕۆسەیە دەکەن.
=KTML_Bold=چەند هێزی پێشمەرگە ڕێکخراوەتەوە؟=KTML_End=
لە چەند ساڵی ڕابردوودا، پارتی و یەکێتی هەروەهاش سەرۆکایەتیی هەرێمی کوردستان و حکومەتی هەرێمی کوردستانیش هەمیشە ڕایانگەیاندووە کە ڕژدن لەسەر یەکخستنەوەی هێزەکانی پێشمەرگە، بەڵام بەپێی ئەو زانیارییانەی لای وەزارەتی بەرگری و دەرەوەی ئەمریکا هەن، هێشتا بە هەزاران پێشمەرگە لەژێر فەرمانی پارتی و یەکێتی دان. بەپێی ڕاپۆرتێکی هاوپەیمانان و هێزەکانی ئەمریکا لە هەرێمی کوردستان، لە مانگی ئاداری 2022، ژمارەی هێزەکانی 80 کە سەر بە #پارتی دیموکراتی کوردستان#ە لەنێوان 63 بۆ 68 هەزار پێشمەرگە دەبن، ژمارەی هێزەکانی 70 کە سەر بە #یەکێتیی نیشتمانیی کوردستان#ە، لەنێوان 40 هەزار بۆ 45 هەزار پێشمەرگە دەبن، هەرلەو ڕاپۆرتەدا هاتووە ''ناکۆکییەکانی نێوان سەرکردە سیاسییەکانی پارتی و یەکێتی 'قووڵ و بێکۆتان'، ئەم بێ متمانەییەش بە یەکێک لە گەورەترین هۆکارەکانی بەردەم درووستبوونی هێزێکی سەربازی ناسیاسین.''
بەپێی هەمان ئەو زانیارییانەی وەزارەتەکانی دەرەوە و بەرگریی ئەمریکا، وەزارەتی پێشمەرگە لەم دواییەدا جبەخانەکانی خۆی نوێکردووەتەوە، بەتایبەتیش لە #دهۆک# و سلێمانی، بەڵام هێشتا بەدەست ئەوەوە دەناڵێنێت کە پێویستییەکانی لۆجستیی سەربازی وەک ئۆتۆمبێل، چەک و تەقەمەنی و پێویستییەکانی دیکە لای هێزەکانی 70 و 80ی سەر بە یەکێتی و پارتین، ئەمانەش زانیاری ساڵی 2023ن، نەک چەند ساڵێک بەر لە ئێستا، واتە چەند ساڵێک دوای دەستپێکردنی پڕۆسەی چاکسازی لەلایەن وەزارەتی پێشمەرگە بە پاڵپشتیی ئەمریکا. زانیارییەکان باس لەوەش دەکەن، کە زۆربەی ئۆپەراسیۆنە سەربازییەکانی دژی داعش و ئۆپەراسیۆنە هاوبەشەکانیش لەگەڵ هێزە ئێراقییەکان لەلایەن هێزەکانی پارتی و یەکێتی دەکرێن، نەک لەلایەن ئەو هێزانەی کە سەربە وەزارەتی پێشمەرگەن، ئەمەش بەلای ئەمریکییەکانەوە واتای ئەوەیە کە دەسەڵات و چەک و بەڕێوەبردنی ناوچە و جبەخانە و میحوەری سەربازی لە دەست هێزەکانی پارتی و یەکێتیدان، نەک هێزە هاوبەشەکان.
لەم چەند ساڵەدا کە وەزارەتی پێشمەرگەش هەیە، تەنیا توانیویەتی سەرپەرشتیی 20 فیرقەی هاوبەش، دوو هێزی پشتیووانیی هاوبەش، سێ سەنتەری ڕاهێنانی هاوبەش، لەگەڵ کۆلێژێک لە #ڕانیە# بکات، کە ڕوون نییە دەسەڵاتی تەواوەتیشی بەسەر ئەوانەدا هەیە، یان قەیرانێک بە ئاسانی لێکیان جیادەکاتەوە. بەپێی ئەو زانیارییانەی ناوەندەکانی ئەمریکا نەک من. ئەمە دیمەنی ئەو پڕۆسەیە کە لە ساڵی 1992وەوە بەناوی یەکخستنەوەی هێزی پێشمەرگە دەستی پێ کردووە.
=KTML_Bold=پارەی ئەمریکا بۆ پێشمەرگە بەردەوام دەبێت؟=KTML_End=
وەزارەتی بەرگریی ئەمریکا ساڵانە بەپێی ئەو بودجەیەی بۆی دیاری دەکرێت چەند ملیۆنێک دۆلار بۆ ئەو هێزە هاوبەشانە دەنێرێت کە لەژێر کۆنترۆڵی وەزارەتی پێشمەرگەدان، ئەمەش لەژێر ناوی هاوکاریکردنی ئەو هێزانەی کە شەڕی داعش دەکەن. ساڵانە کە بودجەی پێشنیازکراو دیاری دەکرێت، ئەو بودجەیە دەچێتە کۆنگرێس و هەموو ساڵێک مەترسی ئەوە هەیە، بەهۆی لۆبیی بەهێزی نەیارانی هەرێمی کوردستان و پێشمەرگە، تێبینی و نیگەرانیی ئەندامانی کۆنگرێس لە خاویی پڕۆسەکە، قەڵەمێک بەسەر ئەو بڕە هاوکارییەدا بهێنرێت و ئەویش ببڕن یان کەمی بکەنەوە، چونکە دەبێت ئەوە بزاندرێت، ئەو بێزارییەی ئەمریکییەکان باسی دەکەن کاریگەریی لەسەر گفتوگۆکانی دابەشکردنی بودجەی پێنتاگۆن دەبێت.
لەم دواییە لەگەڵ ئەندامێکی کۆنگرێس لەسەر ئەم پرسە گفتوگۆمان دەکرد، ئەو نەیشاردەوە کە تێپەڕاندنی بڕگەیەک لە پڕۆژەیاسایەکی وەک یاسای بەرگریی نیشتمانی، کارێکی ئاسان نییە و چاوی زۆر کەسیشی لەسەرە، هاوکات ئێستا لە کۆنگرێس ژمارەیەک دۆستی کورد و ئاشنای دۆخی ئێراق و هەرێمی کوردستان هەن، بەڵام مەرج نییە ئەمە بەم شێوەیە بەردەوامبێت، بەتایبەتیش کە هەر دوو ساڵ جارێک هەڵبژاردن بۆ ئەنجوومەنی نوێنەران دەکرێت و دوور نییە لە چەند ساڵی داهاتوودا، نەوەیەکی نوێی ئەمریکا بێتە کۆنگرێس، هێندەی ئەم نەوەیەی ئێستا هاوسۆز و ئاشنای پرسی کورد نەبێت و ئەو تێبینی و نیگەرانییانەش کە هەن، وابکات هاوکارییەکان بەتەواوی ببڕن.
ئەگەر بە ژمارەش قسە بکەین، هاوکارییەکانی ئەمریکا بۆ هێزەکانی پێشمەرگە و هێزە ئێراقییەکان ساڵ لە دوای ساڵ کەمتر دەبنەوە. وەک نموونە، لە ساڵی 2021، ئەمریکا نزیکەی 510 ملیۆن دۆلاری بۆ ئێراق و هەرێمی کوردستان داواکرد، لە ساڵی 2022 ئەو هاوکارییانە بۆ 345 کەمبووەنەوە، لە 2023 نزیکەی 358 ملیۆن دۆلار بوو، بۆ ساڵی 2024یش بڕێک پارە کە نزیکەی 398 ملیۆن داواکراوە بۆ هەموو خەرجییەکانی هێزەکانی ئەمریکا لە ئێراق و سووریا.
=KTML_Bold=کۆتایی=KTML_End=
لە ڕاستی دا، ئەوەی باسم کردووە و نووسیوومە زانیارییە، نەک لێکدانەوە و پێشبینی، بەڵکوو ئەمریکا و هاوپەیمانانیش، چاکسازی و یەکخستنەکانی هێزەکانی پێشمەرگەیان وەک مەرجی ئەو هاوکارییانە داناوە و ئەوەشیان بە خودی بەرپرسانی وەزارەتی پێشمەرگە گوتووە. بەرپرسێکی باڵای وەزارەتی پێشمەرگەش ئەو ڕاستییەی بۆپشتڕاستکردینەوە. لێرەش لە ئەمریکا لە بەشێکی ئەو کۆبوونەوانەی سەبارەت هێزەکانی پێشمەرگە کراون، بەرپرسانی ئەمریکا ئەو ڕاستییەیان بەبیر بەرپرسانی هەرێمی کوردستان هێناوەتەوە لەسەر هەرسێ ئاستی باڵای ئەمریکا، کۆنگرێس، کۆشکی سپی و وەزارەتی دەرەوە، بگرە چەند جارێک زۆر بەڕوونی پێیان گوتراوە.
کورد پێویستە خێراتر هەنگاوبنێت، چونکە ڕەنگە لەهەر کاتێکدا ئەو هاوکارییانە بووەستن، یانیش بەربەستی گەورەیان بۆ درووستبێت، چونکە لەبیرمان نەچێت کاتێک ئەندامانی کۆنگرێس ئەم هاوکارییانە وەک مەرجێک دەبینن، ڕەنگە لەهەر کاتێکدابێت بۆ جێبەجێکردنی ئەو مەرجەیان، گوشارەکان زیاتر بکەن و ڕێگەنەدان ئەو هاوکارییانە لە کۆنگرێسدا تێپەڕن.
لە کۆتاییدا، من باس لەوە ناکەم هۆکاری سەرەکیی یەکنەخستنەوەی هێزەکانی پێشمەگە کێیە، پارتییە یان یەکێتی، هێزە نێوخۆییەکانی ئێراق یان وڵاتانی هەرێمی، بەڵام ئەوە دەڵێم، ئێستا دەرفەتێک هاتووەتەپێش بۆ یەکخستنەوەی هێزەکانی پێشمەرگە، گرنگە ئەو دەرفەتە لەبار نەبرێت، چونکە بە سەرپەرشتی و پشتیووانیی گەورەترین وڵاتی جیهان دەکرێت، ئەگەر ئەمریکا هاوکارییەکان ڕابگرێت یان لە یەکخستنەوەی هێزەکانی پێشمەرگە کشایەوە و بە پەیوەندییەکانیدا چووەوە لەگەڵ هێزەکانی پێشمەرگەدا، ئەوکاتە نابێ گلەیی لە کەس بکرێت. کەس پشتی لە کورد نەکردووە، کورد خۆی پشتی لەخۆی کرد. هەمیشە ئاوڕدانەوە و لێپرسینەوەی مێژوو و ڕاستکردنەوەی هەڵە مێژووییەکان شتێکی گرنگە، بەڵام بۆ کور