سیاو ڕێحانە دلۍ ترازیەو هۆرسەنگنای (نەقدی ئاگا) یەنە
بەشۍ: پەنجەمە
لایەنێ نەرێنیێ سیاوڕێحانەی:
هەڵۍ چاپیۍ:
بڕێ هەڵێ چاپیێ سیاو ڕێحانەنە گنا وەرو چەمی کە کریێ نەبا. ئەو ئانەی مشۆ، جە دماین ویراستەنە،کەسێوی سۆرانی زوان، جە واژە سازییەنە، دوچارو ئیجۆرە هەڵا بیەبۆ کە کریۆ جە چاپی دوەمەنە، چارە سەر کریا، پەیم ڕۆشن نیا کە ئایا، کاک ڕەزای نیشتەجاو یۆتۆبوری سویدی، تاوانش دمای چاپ بیەی کتێبەکەیش، جارێۆتەر بلۆوە پۆرەش یان نا؟ نمونە: جە لاپەڕە (4)ی، هەرپاسە مزاندێ ڕۆمان، ویر یا ئەندیشێوا کە جە مەژگو ڕۆمان نویسیەنە مێ بەر. دروسشا: مەژگو مەی. لاپەڕە (7)ی ،ڕستەی یۆ، بە کۆتایی مەنە: ئینە گرد جە ڕۆمانو سیاوڕێحانە هەن. دروستەر ئانەنە بنویسیۆ: سیاوڕێحانەیەنە ، هەن. چی بابەتا ،فرە فرە زیاتەر چی دوە نمونەیە، هەنێ.
هەڵێ ئیملایێ :
هەڵێ ئیملایێ کە پەی وەڵاتوو وێما، یاگێ هیچ گلەی و بناشتی نیەنێ، جۆرێۆ چەنیشا بار ئاماینمێ و، چە نیشان ،خۆمان گرتێنە، داخەکێم سیاوڕێحانەیچ، پی نەوەشیە بوومیە، دوچار بیەن. ئاوەختە کە من بەرگو یەکەمو دیوانی بێسارانیم، چاپ کەرد، ساڵەو (1982ز)، جە سلێمانی چاپخانە نەبێ و،کیاستە بێشا بەغداچاپشا کەردەبێ، پیت چنش کرێکاری عەرەب بیەبێ و کوردی نەزان، جە (10) هەزار نۆسخێنە چاپ کریابێ. کەچاپ کریاش یاوا دەسم و، تەماشەم کەرد، بە دیەی ئاگرد هەڵە چاپیا، خەریک بێ شێت وهار بوو. پیحاڵەۆ وانەر نەک تەنیا شێت نەبێ، گەشە کەرێ و، جە وەشەنە بێ! پەۆچی ماچوو: چەنی ئی جۆرە هەڵا ، بار ئاماینمێ، وەلێ با ئینەیچە واچوو: ئیسە ئا وەختە نیا، دنیا و تکنۆلۆژی (360) دەرەجێ فەرقش کەردەن، چەمەڕایی ئیسەیچە، جە نویسەی ونویسیاری، هەر پا نێسبەتە لوان سەرەۆ. مشیۆ هۆشما بۆ کاڵای ناب و نایاب،بدەیمێ بە وانەری.
واژێ ناڕەسەنێ:
هەرچند من ئینسانێوی گرد بارێوەرەچەمیاناو، وێم بە مەنتێقی مزانوو، وەلێ تا ئا یاگێ کە پەنەم کریۆ و زانشتو ئاوەزم ،یارمەتیم بڎۆ تەلاشم ئانەنە کە زوانی هەۆرامی بێ من و تۆیی گەشە کەرۆ، جە هەمان حاڵەنە، سازگاریم نیا چەنی لافاوو ئا واژە عەرەبیا کە ئێمە هام مانای خاستەرما جە هەۆرامیەنە هەن. با ئا پەتا هەزار ساڵێ کە زوانی فارسیش لاواز و بێ تین و توان کەردەن، زوانی هەورامیچ توش نەکەرۆ. دیارا مەبەسم ئاوردەی ئا واژا نیا کە عەرەبیەکەشا دڵێ کۆمەڵگایەنە، هەمە گیرتەرو ئاشناتەرا، بەڵکوم مەبەسم ئاواژێنێ کە واژێ پاراوۍ و ئەژناسیای و هەمەگیرێ وێماڵیێما پەی یاگە نشین کەردەیشا هەنێ. با چن نمونێ جە سیاو ڕێحانە-ی وزوو ڕوە:
جیای: تەنەفۆری، واژەو بێزاری،
جیاتی: مەنزوری ،واژەو مەبەسی بنویسۆ.
جیای جۆرئەتی واژەو دڵنیایی هەن. لاپەڕە (9)نە وە فرەزیاتەر چێنیشا.
کێشێ ڕازوانی: کێشێ ڕازوانی چڼە یاگێوەنە گنا وەروو چەمی کە مشیۆ وەشێ کریا.
کێشێ ذیادیاگە نشینوت:
کە داخەکێم بیەن بە هەڵێوی باو کە نیازش بەنویسەی بابەتێوی چی بارەۆ هەن.
بەش نەکەردەی داستانەکەی:
خاستەر ئانەبێ کە نویسەر داستانەکەش بە سەلێقەی هۆنەری وێش کەردە بیای یەرێ بەشێ، یا لای کەم دوێ بەشێ.
هەڵێ ڕازوانیێ و نویسیاریێچ، کە کەمتەر گنا وەرو چەماو گرکەسی، کریۆنەدیە گێریان.
عێشق دەسەوامێو؟
جە لاپەڕە (97)ەنە، ئی ڕستە بەینوو دوە کەمانیەنە ئامان:(یۆ جە سەمەرەکا وەشەویسی، ئانەنە کە: لایەنە وەشەکا ژیوای مرمانۆ بە بەشەرەکا، عێشق دەسەوامێوا پەی یاوای بە ئارەزووە کۆچکریایەکا.)
واژە و دەسەوامی، ڕەنگا هۆرگێڵێۆ بۆ جە واژەو قەرض (وام) مبادلەی،کە جە فارسیەنە بە کارشا ماران، وەلێ دەسە+وام جە هەۆرامیەنە، بە قەرزێوی ماچا کە دەسێو (تاقمێۆ) جەمێۆ بە نۆبەی، پەی یەکتریش کەرا. ئەشق تەنیا بەینو دوێ نەفەرانە پێدابۆ و، پزوسکە شانۆو، گیسیۆنە، ئەما دەسەوام بە شمارەو بەشدارەکان، کە چانیشانە بە (20) کەسێ بیاوا. ئاکام ئینەیە گێرۆوە کە ئەشق متاوۆ وام بۆ، وەلێ نمەتاوۆ دەسەوام بۆ. ڕستەکەیچ هۆرگێڵ بۆ، چ جە خودو نویسیاری، نە وێش بە تەنیایی مانا میاونۆ و، نە پی شێوە کە هەن، پێوەنێوی مەنتێقیش چەنی جملەی وەڵینیش هەن!
کەیۆمەرس نیک ڕەفتار.[1]