ڕومان نویستەی جە وېژەن کەردەی سەختتەرەن
بەشۍ: یەکەمە
نویستەی: #هۆرامان ڕۊستەمی#
هەمیشە واتەنم و ماچوو: ڕۊمان نویستەی فرە جە ۋېژەن کەرڎەی سەختتەرا!
با کەمېو غەیبەتوو ڕۊمانەو چنارەی، جە نویستەو کاک حەمەڕەزا بەهمەنی (443) پەلێ.وەڵاوگەو ئارۊو پاوە ی کەرمۍ.
نەقد و باسوو هەر داستانێوێ (20%) تەخەسۆسین و تکنیکی و ماباقیش سەلیقەیین.
هەرچی بنوېسو دەربارەو ئی ڕۊمانېرە هەڵای ئێجۆم کەمم واتەن، بەڵام هەر ئینە کە واچوو کاک ڕەزا گېیان دەس و قەڵەمت وەشبۊ و سپاس پەی بېیەیت و ئاواتم ئانەن درێژەو ئی ڕا سەخڵەتێنە ڕۊ بە ڕۊ گەشە کەری و هەر پاسە چنارە فرە خاستەرەنە جە سیاوڕێحانەی، بەشکووم ڕوێو ڕۊمانێوە بنویسی کە چنارە لاشەوە هیچەبۊ!
ڕۆمانەو چنارەی، داستانێوە کۊمەڵاتیە و درامەنە و جە عەینوو حاڵیەنە ڕەوایەتێوی تاریخیا جە سەردەمېوی خاسی کە دلێ یۊ جە دەگاکاو هۆرامانېیەنە هۆرتەقۊ و دماو ئانەی کۆنج و کەلەبەروو دەگاو چنارەی گېڵۆ ، مڵۆ پەی مەحاڵوو لۆڕستانی و دماجار سەر جە هەمەدان و تاران بەر مارۆ و واوەی مەیوە باوەشۆ وەڵاتوو هۆرامانی و سەقامگیرەبۊ و تەمامیۆ.
بەداخەوە ئی ڕۊمانێ پەڕەنە جە تەنگ و چەڵەمێ و سەخڵەتیێ ڕۊزگاری و فرە دڵوو وانەری مېشۊ و فرەو یاگانە ئێتر قرچەو جەرگوو وېت پېسەو یۊ جە شەخسیەتەکاو داستانێ مژنەویەوە.
ڕۆمانەو چنارەی بە وردی باسوو خەڵکوو یۊ جە مەحاڵەکاو هۆرامانی کەرۊ.بەڵۍ هۆرامانوو لهۆنی و شۆشمێ و نەوسووڎە و دەور وبەرش.باسوو وېیەردېوی تاڵی کەروو کە دەسەڵاتوو زەمانوو شای و تەنگ و چەڵەمەکاو سەرو مەرزی با بە نوونگەو ئانەی کە ئا خەڵکە تووشوو مۆسیبەتێوی باو تاکو ئیسەیچ کە ئېمە مژیومێ هەڵای ئاسارەکېش دیارێنێ و ئینای وەروو چەماوە.
پەیرەنگ و تەرح و تەشکەو ئی ڕۊمانی بە وەشی مجیەینەرە و سەرجەم عەناسۆروو داستانێ، شەخسیەت، زەمان و مەکان ئینای خزمەتوو تەرحەکێنە کە ڕېک و پێک بەراش وەرەوە و وانەری جەزبوو وېش کەرۊ.
یۆ جە تایبەتمەڼیەکاو ئی ڕۊمانێ ئانەنە کە فرە بە ئاسۇڎەی نمەتاومۍ واچمێ فڵان شەخسیەت قارەمانوو داستانێن، بە وردی سەرجەم شەخسیەتەکاو دەگای مژناسنۆ پنەما، ماوێو پەروانە شەخسیەتی ئەسڵی داستانێنە و دماتەر فاڕیۆ پەی ئەنوەری و واوەی فاڕیۆ پەی فەرهادی.
نویسەر حەر یاگێوەنە گەرەکش بېیەن واقعیەتێ واچۆ یام داڵغەکاو دڵوو وېش درکنۆ بە شارەزایی ئی هەرمانېشە کەردێنە و بە پەیلواو من تاریخش دووبارە نویستەنەوە، پەی نموونەی وەختێو ماچۊ خانەوادەو (بەتوول خانمێ) لۆڕێ بێنێ و جە چنارەنە ژیوێنی و ڕېک پېسەو هۆرامیەکا ژیوینێ، چېگەنە نویسەر گەرەکشا نیشانە دۊ کە مێلتوو کۊردی و هۆرامیەکێ و لۆڕێ پېسەو دەسەبرایانێ و جیاوازیشا نیا.تەنانەت نویسەر چینەیە پا وزۆ ئۆ لاتەر و وەختێو باسوو خانەوادەو (گرووبان خانساری) کەرۊ کە خەڵکوو قووچانېیەنێ، یانېو کۊردەکێ قووچانی و ئەیزەن ئېشارەش بە کۊردستانی گەورەی هەن و جە ڕاو ئی ڕۊمانێوە گەرەکشا ئی فاکتیە بەیان کەرۊ.[1]