زەماوڼەکێ دەگێ
ئارۊ زەمانەی دائیرل عەرزەن
تەلار بێنازەن سۆرۊگا بەرزەن
قەرارا ئی پەنجشەمەیە دەگانە زەماونێ کریۆ، زەماوننێبۊ دەگانە دەنگ بڎۆوەو تادنیا هەنەبۊ باسو سەرباسا، حەوت ڕوێو حەوت شەوۍ ئشۆم زەماوڼە گېڵیۆ، جاڕچی جاڕشادا دەگانە پەی گەلە هېزمی، ئڼە هېزمێشا ئاردێ هیچ مەڕێ نەدارێشا، هیشتای ڕۊ دوەشەمەین، پیێ لوێ شۆنەو سالاری سەرگەتە، سالاریچ واتەبېش سەوای خەبەرتا مڎەوە پەنە، کە خەبەر ئاماوە واتەبېش خەبەر کیاندێ پەی زەڵمی پەی عەودە هەنارێ، دوێ یەرێ پیێ بارۆ ڕۊ پەنجشەمەی مێڎانو زەماونگاو دەرەومەڕێنە حازرێبا، وێچتا عەبەلەی و حەمەحسەین نازە و ڕەحیمە سیاوی، نازدێ بلا هیچ دەرەبارێرە، منیچ سەی عەلای و حەمەساڵەو مینەیو محەمەڎەی مارو، کە ڕۊ پەنجشەمەیمێ سالار پیایەکاو سەرگەتێ مارۆ چەنی وېش، هنەکا دەرەومەڕێچ چڕۆ، بەرۊشا قەراخۆو چفنۆ گۊشێشارە، سەی عەلا تۊ سەرچۆپی کېشبە، عەبەلە تۆیچ گاوانبە، زەڵمیا وزدێ دلێ، کردێچشا پەنە کەردێ بەحەیاتشا ورنەپڕاو توخمو زەماوننێ نەگنا، ئایچێ بەڵۍ قوربان هەرچی وېت فەرماوی، زەماونگا ئاوڕژێن کەراو تەماڎارۍ زەڵمیانێ ڕاگارە وەزارە، پیېوە مێوە ماچۊ قوربان ئۆقرە گېردێ ئانا ڕاگارە وەستێرە، وەرەوەرەی یوەیوەی زیێوە، عەودە هەنارێ سەرمەشقشابێ، ئازەو ڕەحمانەو حەمەعەلیش چەنی بێنێ، وېشا ڕازنابێ، ئەمان ڕازیایۆ، قیافێ وەش، کېشێ ئەڵوەنیێ، فەقیانێ سەروشانەیشا هەتا حەزکەری زەریفێو وەشپەنەکەوتێ، وەختێ وەستێرە مەیڎانگا دماو خەیر ئامایو وەشی و تشی، سالاری وات ئادەی وینوتاو دەسپەنەکەردێ، سەی عەلا چۆپیەکەی گېرە، لالۊ عەودڵا گنە دلێ، عەبەلە تۊ گاوانبە، ئەچێنە حەمەعەلی بەشداری ورپڕایش نەکەردەن، تمەس عەودە هەنارێ دارەقوت پەنەشا ماچۊ، بۍ ئەو نېیا سالاری ئېمەش چڕیێنمێ، دەس نەکەردێ ورپڕای تاکو وېم قاوەکەی کەرو، حەمە عەلیە تۊ ئحتیادبە تاوېم ئیشارەتت پەی نەکەرو نەوەزیرە،
وېیەردە وېیەرد نمێ دماوە
کەم نیشە دیارو کۆگاو خەماوە
خەریکا خېیاڵا بەردەناو جەباسەکەی لا مڎەو، بابەوە سەرو باسەکەی و زەماونگای، سەی عەلا دەس وەرمڎۆنەو مێوە ماڵۆ تەمو عەودە هەنارەیرە و چەولاوە عەبەلە گېرۆشاوە، نە جارێ هەنو نەدوێ، حەمە عەلیەیچ ئینا چەمۆو خەریکا دێق کەرۊ، عەودە هەنارێ ئیشارەتش مەڎۆ پەنە، زەماوڼە هەر ئەپېسە گەرمەنە، زەڵمیێ وەختێ وردێ باوە سەی عەلاو عەبەلە هارەقی فیسنێنێ و پڕوکیێنێ، عەودە هەنارێ قاوەکەی کەرۊ، چەپو چوار سوچ پا کوا زەمینرەو دەگا دەنگ مڎۊۋە و دەنگەکەیچ مڎۊۋە گژێ وېشرە، سالاریچ خاس ئینا چەمۆ، هەرچی ژەنو زاڕۆڵەو پڕوپیرەژەنا سەرباناوە تەماشەو زەماونگای کەرا، وەختێ زانۆ زەڵمیێ زۊرشا ئاردەن پەی ئییشا، قێرنۆ ماچۊ دەخیلتابو دەسوەردەیدێ، ئاڎیچێچ دەس وەر مڎاو تاکو دوێ یەرێ ڕوێ زەماونە ملۆ ڕاوە، دماو ئانەی ئاشو نوش نیشتۆ و زەڵمیێ ملاوە، خەبەرەکەی یاوناوە لاو مەحمود خانو دزڵیە، مەحموخانیچ پەیام کیانۆ پەی سالاری و ماچۊ ئاویرێت ورگڕنابێ چی ناستەبێت قەزانەکێ قوڵ بڎۆ، سالاریچ وات، ئەر زوو نەکوشنێمۆ ئېمە دۆڕیێنمێ.
عەفان دەرەمەڕی.[1]