سەفەریە پەی هەوارەکەو بېسارانی
بەشۍ: دوەمە
پاو ئانەیە گرد لایە وەرەقاقڕ دابېشەرە و شێڕەو جێرجێرا وەڵاتش گېرتەبێ، فرەفرە فێنڪ بێ. وردە هانێ قەراخوو ڕۊخانەی بێدەنگ و بە خوڕیە نەرم و نیان گنێنێ دلێ دەرەی و بێ‌دەنگیش ماڕێنێ. یو دڵش گەش بێوە.
جاڎە چۆڵ بۍ و ئېمەیچ وېما هەوڵ نەڪەرێنمێ. نەختێو ڕاما بڕیە. چن هەوارێما جیا ئاستێ. ڕاڪێما سەرەوڪۆش بۍ و وردە وردە بەرز و بەرزتەرێ بێنمێوە.
قەڎیمیێ سڵاموو خوڎایشا سەربۊ، یاگێوەشا ئاوەڎان نەڪەردەن بۍ نام و نیشان بۊ. گردو هەوارەڪا نامېشا بێ. حەر جە دەرەو واردەگای گنیشوەنە تاکو سەرچەمەو پلوورێ و هەواروو شانشینی و کوڕیمریەم و فروودگای و ...هتد، گردش نامېشان هەنە و پا نامارە یۊ مەشناسۆشا.
یاوانی سوورەتفی. ڪەوتانی ویروو بەرنامەو ڕاوایاری ڪە چن ڕوێ چیوەڵ جە بېسارانی و هەوارەڪاش گېرتەبېشا و وڵاوە بیەبێوە. نەختێو حەسرەتوو ئانەیە ڪەوت دڵم ڪە چن هەوارێ و هانېشا جیا ئاستێنێ و بە پەلەپەل وېشا یاونان هەوارە بەرزەڪا تاکو فێنڪشابۊوە.
ڪەڼەتەقەما ڕەڎ ڪەرد و ئاخیجان چەمېما ڪەوتێ بە زیارەتەڵان و گڵڪۆ باوایم ڪە چن ساڵێ چیوەڵی فەوتش ڪەردەبێ و بنېوە داروو (تەیلێ) سەرو قەبرەکېشوە تاتەیم نیایبێ و یاوایبێ سەمەر. دلێ دڵوو وېمەنە ڕەحمەتېوەم یاونا پەیشا و جە خوڎای گەورەی داواو عەفەویم ڪەردێ.
ڪەوېڵۍ هەوارەڪا فرێشا ڕەنگ وبۊ قەڎیمشا مەنەن. دیوارچنیشا بە زۊروو دەسان و ماڕای درڪا.
لاو وېموە واچېنا داخۆم ڪەسێوتەر بۊ زۊروو بازواو ئا شېرەپیاو قەڎیمیاشە بە میراس بەردەبۆ؟
چەمېما نقموو تەماشای بیێبێنێ. فێنڪی هەوای، هاژەو ئاوێ، ئاوڎانی هەوارەڪا و خوڵڪەی گەرم و گوڕەو هەوارنشینا خەمێما تاسنێ و وەشحاڵما ڪەرێ.
چن شەتاوېما ئیڎەس و ئەوڎەس ڪەردێ. ڕاسە ڕاو دەرەی چیروو چەترەو دارە وەزا و قیژەو قژاڪەی و قڕەو قاڵاوا. وردە پەلەوەرا مۆسیقایوەشا خەڵاتوو هەرد و بەردی ڪەردەبێ. یۊ ئاواتەوازوو دەنگ هۆرگیرێو بۍ ڪە تاق و تەنیا ئا دەنگا هۆرگېرۆ تاکو ڪاتوو دڵتەنگی گۊش گېری هەتایشبۊ.
دلێ ڕاینە چېوێ بەڵاجەویێ گنێنێ وەراچەمما. پەی من تازەگیشا نەبۍ، بەڵام مەژگوو زاڕۆڵا نەڪێشێ و یاگێ پەرسێ بۍ پەیشا. پەرسێنێ و ئېمەیچ بەپاو زاناییما جوابشا دێنمێوە.
زیارەتەڵانما ڕەڎ ڪەرد و یاوایمێ مەڵڵاحەمەڎان. دارە وەزێوی کزۆڵە سەرو ڕاڪێماوە بە لاشەی نیمەگېیانش سەرەنجما ڪێشاش لاو وېش. وەختێو تەماشاو لاشەی قرۆڵیش ڪەرێنی یۊ گنێوە ویروو داستانەو (شەنگول و مەنگوولی) کە دلێ لەموو وەرگەڪەیشا پەڕ ڪەردەبێ تەوەنی تاکو دەرسش بڎا، بەڵام ئاسمان تاکو زەمین ئی پەڕوە ڪەردایە چەنی پەڕوەڪەردەو قرۆڵوو وەزەڪێ جیاوازیش بێ. بە تەوەنی سافێ دلێ زامە قووڵەڪەیش چنیەبېشاوە تاکو وەرگەو بێ ڕحمېیاو ڕۊزگاری گېرۆ. چن ساڵێ چیوەڵ وېم بە چەماو وېم دیەم بۍ پا قرۆڵیشوە جە سێوەروو چەترێش بێبەشش نەڪەردێبێنمێ و جە پاییزیچەنە نە سمۊرە و باخەوان و نە ڕاوېیاری جە بەهرەیش بێ‌نەسیب نەڪەرێ. گېرە پا زامە قووڵەشوە چن دانە باخەوانێ ئاویشا دایبۆ و ساڵ بە ساڵ حەر ڪامشا دانێو تەوەنیش چنیێبۊ دلێ دڵە زامڎارەڪەیش. زانێنا حەتا ئەر ۋای ناحەزیچ ڕەحمش پەنە نەڪەرۆ، ڕېخێش هێقمێنێ و بە ئاوەزەنی تازه دڵوو ڕاوېیاری و باخەوانی گەش ڪەرۆوە و سمورەێ وەش سیمای ۋزۆە سەما.
خانم ئەسرا شەریفی.[1]