ڕۊمانەو (چېرو دارتفێنە)
ئەژناسنای و هۆرەوگېڵنای پەی هۆرامی: ڕەزا بەهمەنی
نامۍ کتېبی: چیرو دارو تفێنە (بنەو تفەکېنە)
نویسەر: ژیوار ڕەشید، بە زوانی سۆئێدی
بەشۍ: دوەمە
هەڵبجە وەهاروو (1988ز)
ئازاد دلێ وێڵاشەکەو لەمەو ئەدێشەنە تازە پەترۆکەش بەسە بێ، ئاگاش جە هەنگامەکاو ئەدێشۆ بۍ کە تڼ تڼ سەرو جەنازەو زارۆڵارە نێێشارە و فاڕېشاوە.
بە چەمۍ بینیېوە بەری وینێ. بە لووتە بوەو وەشەو ساوێ دلێ شارېونە ئەژنەوێ، کۊماو لاشا سەرو ماشیناوە تەماشا کەرۍ، وەلێم هەرچی هەوڵ دێ کەس ئاڎی نەوینێ.
داستان چاگۆ دەس پەنە کەرۊ کە ئازاد ئیسە گۆرەن و جوانێوی پەنە یاوا و وریا و ژیرا. بار و بنەش بەسەنۆ و پەی وانای دانشگای ملۆ پەی شارېوی کە چن سەعاتێو جە شارەکەو وېشا دوورتەرا.
ئازاد تەنیا دوێ ساڵێشبۊ چەنی ئەدێش مەیا پەی سۆئێدی. ئامایشا پەی سۆئێدی ڕېک گنۆ چەنی ڕۊ ئەدابېیەیش.
ئەڎاش بە کۊڵەبارێو خەمو سەر و سیمېوی پەڕ جە مەینەت و بۍ قەراری و ئازارۆ، گنۊنە دلێ فەرهەنگ و کولتوورێوی نەژناسیا و بێگانەی کە هیچ وێنە و شکڵێوش چەنی فەرهەنگېو کە دلێشەنە گۆرێ بیېنە، نېیەن.
ئازاد چا شارەنە کە منیشاوە، ئەڎاش منیۊش باخچەو ساوایا و دماوە مەدرەسەی سەرەتای و دماتەریچ دەبیرستانی تەمامنۆ. ئی ماوە درێژە ئازاد و ئەڎاش گنانە چېرو کاریگەری دوێ فەرهەنگا کە هیچ نوقتێوە پێوەرەبیێەیشا چەنی یۆی نېیەنە.
شۆنەو ئانەیەرە کە ئازاد کوچە کوچەی وېش مژناسۆ و مزانۆ کە ئاڎ خەڵکوو یاگێوتەریا و قژۍ سەرەیش چەنی هامکەڵاسیەکاش فەرقشا هەن، گنۊنە دلێ وەزعێوەی دەروونیێ کە ناچارش کەرۊ تاکو زۊر پەی ئەڎێش بارۆ، بڕېو پەرسێش دەربارەو وېیەردەیش، تاتێوی کە هەرگیز نەڎیەنش کەرۊ.
ئەڎاش بۊنەو وەزعەی دەروونی وېشۆ و زارۆڵە بېیەی ئازادی، جوابوو هیچ کام جە پەرسەکاش نمەدۊوە و بە جۊرێو هەر وەختێو ئازاد گنوونە دلێ ئا خیاڵا، ئەڎاش بارێوتەرە پەشۆکنۊش تاکو پەرسەکاش ویر بەرۊوە.
ئی وەزعێ زەمانێو ئازادی بە یەکجاری وەنەبڕیاتەر کەرۊ تاکو بزانۆ کێن و چکۆوە ئامان، ئا وەختەنە کە ئەڎاش یانەنە تەماشەو کاناڵە کوردیەکا کەرۊ. هەر چا کاناڵاوە ئازاد نامۍ کوردی و پێژمەرگەی و هەڵبجەی و ئاوارە بېیەی و یانەوېرانی خەڵکی وینۆ و مژنەوۆ.
جار جار ئەڎاش مەجبوورە کریۆ جوابوو بڕېو جە پەرسەکاش بدۆوە.
فانتاسیۍ و خیاڵۍ ئازادی ئاڼ عەجیب و غەریبێ بێنێ کە تەنانەت مامۊساکێ باخچەو ساوایا و مەدرەسەی سەرەتاییش سەر سامێ کەردێبێنێ.
سەرڕاو گردو ئی تەنگەتاوا کە چا دەورانەنە ئازادی بێنېش، ئیسە ئیتر ئاڎ شۆنەو هۆویەتوو وېشەرە گېڵێ و و تەنیا کرێڵوو ئی ڕازێچە لاو ئەڎێشۆ بێ.
تەنیا ئەڎاش تاوێ ئی ڕازە نەۋاچېشە پەی گېڵنۆوە. بە تایبەت چا یاگانە کە باسوو تاتەیش کریێ، ئەڎاش باسەکەی فاڕێ و بڕېو جارێچ بە هیچ شێوێو حازرە نەبۍ جوابوو پەرسەکاش بڎۆوە.
ئەچی بەشەنە هەر کەس ڕۊمانەکەی بوانۆوە باوەر مەکەرۊ کە نویسەر وېش ئا دەورانشە جە سۆئێدەنە تێپەڕ نەکەردەبۆ. هەر چن ئېمە ئانەیە مزانمۍ کە نویسەر چواردە ساڵیەنە ئامان پەی سۆئێدی.
ڕەزا بەهمەنی.[1]