نەبەردو دەرەتفۍ.
بە پېچەۋانە مەیاۋدېنە ئی نەبەردیە. ئی نەبەردە، نەبەردو دۋې دۆڵەتا نېیا و، نەبردو دۋې حزبایچ نیا، نەبەرد نەبەردو دۋې کەڵەشېران.
قارەمانې ئی داستانې دۋې کەڵەشېرې بېنې بە نامې سەردار و شاباڵ.
سەردار کەڵەشېرو حەمیدی بزمونەی بې خەلکو نۆسودی و شاباڵ کەڵەشېرو شەهریاری تؤفېقی بې و ئادیچ هەر خەلکو نۆسودې بې.
شاعرو شعرەکا دلې داستانەکې حەمید بزمونەن. ئی شعرې هەر چند وەزن و قافیەشا گېجەنېنە بەر ئامان، سەبکی تایبەتو حەمیدیا و من ئەمانەت داریم کەردەن و دەقاوقەق پېسە وېشا نېیەنېمەرە.
حەمید بزمونە کە ئیسە ئەرەنیشتەو وەڵاتو کانادایا، کەڵەشېرېۋش بی فرە دڕ بې. قولاپیش ئەرەجیێ بە ئەڵماس دریێنېرە و ئۊسا بەهمەنی ئاسنگەری هەسان دێنې. پلارەش پلارەو پاڵنگی بې و قولاپش قولاپو هەڵۆی. بە دنوک، کەڵەشېرې بەرزې کەرېۋەو پېسە ( بروسلی) پای ڕاسش سراۋنېنە پانای سینەیشاو پەڵېشا دێ ۋارە. ئی کەڵەشېرە نامېش سەردار بې.ئی نامې چکؤۋە ئامێ بې من مەزانۇ. شەهریار کەڵەشېرېش بېنې وەلېم نەپەرمېشا پۊرە بنیؤشا ڕوتەکو سەردارەیۆ پۆچی خەبەرش زانا جە دەگاو شېنەی کەڵەشېرېۋ هەن کە عەزەمەتو شان و باڵیش بېیەن شؤرەو ئا چەم و دؤڵیە. شەهریار عازمو دەگاو شېنەی بې پەی ئەسای ئا کەڵەشېریە. کەڵەشېر ئامارە دەرەتفې. ئەلحەق بە قەسای نەبیەبې شۆرەو عالەمې. هەر بە وېش گنې قامەت ئەرمانای و ژستی پاڵەۋانی گرتەی. جە نمایشېۋەنە و مەراسمېۋەنە ئی کەڵەشېرە نامېش نریا شاباڵ شەهریار تەبېعەتێۋی تەمامەن تایبەت بە وېش بېش شکسەتو کەڵشېرەکاش لاشۆ خەتەی سورە بې و هەرکامەشا سەر نەکۆتې ئەمرە ئعدامیش پەی بەر کەرې، پۆکەی ئېمەی ئاۋرای گوشت نەڎیەیچ، چا سەردەمو ئاۋارە بېیەیەنە دەسې دارېنمې ئاسمان کە کەڵەشېرەکەش بوۋریۆۋە. شەهریار ئیسە ئینارە ڕۋانسەر و ئؤستادو شعران و مەیداندارو ئەدەبېیاتی. تاکو ئاگە کە من خەبەرم بؤ ئیسەیچ پەی تاقەتیش هەر خەریکو ئا بەزمانە، بەڵام بە کەڵەشېرې شاسی بەرزې کە ماچاشا کەڵەشېری لاری کاکە شەهریار تازە کەڵەشېرەکەش ئەسا بې و بە باوشی جە دەگاو شېنەی ئاۋردەبېش پەی دەرەتفې. بە دڕی کەڵەشېرەکەیش ئیمانی حېقمش بې هەڵای مانیایش نەسیابێۋە کەڵەشېرو حەمیدیش دەعۋەت کەرد پەی نەبەردی.تەماشە چیې دەعۋەت کریێ و مێڎانو نەبەردی ئاۋڕشېن کریا و ئېمەیچ تەنەکێۋ ئاۋیما نېیا سەرو ئێری. بە فیکەو داۋەری ملې کەڵەشېرا گرژې بیې و دنوکې دریێ زەمین. نەبەرد جە پەنج ڕؤندېنە تەمامیاو کەڵەشېرو کاکە شەهریاری دوکتؤر حەمیدی بە نەفەسەی مەسنوعیە ئاردۆ هؤش. ۋاتم وەڵې ئی نەبەردیەنە ئېمە ئاۋېما نیێ بې سەر و قوڵې دې. وەڵېم کاکە شەهریار نامانە ڕاو تومەز سەرەشەنە خیاڵېۋتەر پەرۋەردە بېیەن. جە نوتقېۋی چند دەیەقیەنە شەرایەتو مەیدانو نەبەردی و حاڵو کەڵەشېریش شەرحەدا و نیاش پاو غەریبیش و داۋاش کەردە کە فرسەتش بڎۊو شانسێۋتەرش پەنە دریۆ تاکو کەڵەشېرش ئاشنا بؤ و چەمې کەرؤۋە. بە بڕیارو هەیئەو داۋەرا خواستو کاکە شەهریاری قبوڵ کریاو نەبەرد کەۋتۆ دۋې ڕۋې دماتەر. دەنگو نەبەردی تازەی پیچیا بېنە دەرەتفې و ئی جارە بە خاترەو ئزدحامی و بەشداری زاڕؤڵەو پیر و جوانی مەیدانېۋی تازەتەر نیشانې کریا کە کاکە شەهریاری ۋېش دیاری کەردەبې. ڕؤ نەبەردی ئاما ۋەرۆ و مەردم گرد بە شېۋەو وېشا سەرو یاگا وېشاۋە قەرارشا گرت. کناچې جۋانی پېسە کاۋەترا سەر پاساراۋە نیشتې و ماباقیچ هەلقېشا پېکا دەورو مەیدانی. دمای چند ساتا حەمید و کەڵەشېرەکەش زیێنە مەیدان و، کەڵەشېرش جە یاگې دیاری کریێ کە بازنېۋ بی بە ڕەنگەی چەرمې نیارە. حەمید پی شعرەو وېشە کەڵەشېریش هانی دې و ۋاچې
من و شهریار مەرجیوما کەردەن
هەرکام ۋریەیدې کەبابتا فەرزەن
ئی جەنگە جەنگو سەرو ماڵیا
سەر بەرزم کەری جە لا هام فەردا
ئا کەکێ مشۊم گۊشتەنە بەرباری
ئاڎۍ بەگزادی ئیمە بۊرینمێ
سەردار گېیان مشۊم ئی جەنگیە بەری
کەڵەشیرش نازارا تەقیەیچش کەری
ئازیز ئەر بەریش نامەکیت فاڕو
کرماشانیچ بېیەن دانەت پەی مارو.
ئاڼەش پەنە نەشی کە کاکە شەهریار بە کەڵەشېرۆ زیانە. بە دیەی کەڵەشېری پەی ساتېۋی بېدەنگی سەیەش ۋستە ملو مێڎانیەرە. کەڵەشېرو چېشی؟ عەرز کەرو دەعبېۋ.! پؤپش بە پارچېۋی چەرمە کە فرەتەر بە مېزەرەو مەڵای شەباهەتش بې پیچیا بې و شیۋاڵە ملافېۋی درېژیچ کیشیێ شۊنیشەرە و باڵیش ئامێبېنېۋە باڵې کە نەک هەر ڕؤحو شاباڵی، ڕؤحو حەمیدی و سەرداری و تەماشە چیاش ئاۋردەبېنە لەرزە و شەرتبەندېچ نا ئؤمېد جە شەرتېشا نوچشا ئاستەبێرە. پی حاڵۆ کەڵەشېر دلې بازنېۋیەنە بە فاسڵەو گەزېۋی نریارە . حەمید و شەهریار چەمشا بڕیەبېېنە چەما یەکترینی و شەهریار بە چارېۋی ئەۋە کریا و خاترېۋەی جەمەو، حەمیدی واق منە، ماتڵې فیکەو داۋەری بېنې. کەڵەشېری دەنوک دېنې زەمین و سینې ئەرمانېنې و پېسە فردوسی نۆسودی ۋات. کە آن شهریار نۆسود زەمین......... از نبرد قهرمانش بودش یقین. کەڵەشېرەکۆ حەمیدی سەرېۋش لار کەردۆ و بە یەک چەم دیا پەی ئەۋی و پەی حەمیدی. بوۋەو ئاشنای دې پەیش و غەریب بې لاشۆ. شکەش کەردېبې بې و وەڵېم ساق نەبیەبېۋە کە هەر وەڵین بؤ. فیکەو نەبەردی دریا ۋەنە. ڕەخشی چەرمەو حەمیدی بە یەکەم پلارە مېزەرەش ۋستەنە ملو شاباڵی و پۆپشۆ یاگە دنوکې وېش ئەژناسېشۆ و لێۋش کەردۆ پەی حەمیدی. نەما پۆپو شاباڵی و قەدی (10) سانتیما بەرزش کەردۆ و یەک قولاپش دا چېرو چەناکەیش. کەڵەشېرو کاکە شەهریاری پار مەرد نەک ئېساڵ. کاکە شەهریار دیسان ئی جارە بەرخەلافو جارا کاردیش بەر ناۋردە و بە پېچەۋانە دەسش کەرد بە تیمار کەردەی و ون پاکۆ کەردەی. ئېمەیچ ئؤمېڎما جە دەسداو تەنەکۆ ئاۋە گەرمەکېما نیاۋە لا. حەمید و شەهریار کەڵەشېرېشا ڕەقیبی بېنې وە گەر نا وېشا ڕەفېقې گېیانی گېیانیێ بېنې و حازرې بېنې سەرە بنیارە ڕاو یەکترینیەرە. دمای چند ڕۋا کە هەڵای لا مەردمیۆ باسې شکەستی وەڵینی کاڵې نەبیەبېنېۋە ، شایعەو نەبردېۋتەری پیچیانە دەگا. ڕۊ ئاما ۋەرۆ هەر پېسە جارا مێڎان ڕازیاۋە و شەهریار داخلو مێڎانی بی و یاگې دیاریکریێنە کەڵەشېرش نیارە. فرەش پەنە نەشی کە حەمید بە قاڵاۋېۋۆ زیانە. هەیئەو داۋەرا نەبەردش مدرنا پا بەهانی کە قاڵاو و کەڵەشېر هەمسەنگې نېیەنې و ئیجازەو نەبەردی مەڎا. حەمید مەجبور بی ماجەرای شەرحە دؤ کە بەخاترەو دڵو ڕەفېقیش جە کەڵەشېریش ۋیەردەن و حازر بېیەن ڕەخشی چەرمەش بە خواستە کاکە شەهریاری بە خەلوز سیاو کەرو کە شایەد کەڵەشېرو کاکە شەهریاری نەژناسؤشۆ وجەوهەری هەرەقەتینوۋېش برمانؤ. سەرەتا نەیشنو دیسان شاباڵوریاۋە و کاکە حەمید پی چند بەیتە شعرا، کە ئا بەیتې بیێ بایس تاکو تېخ ۋزیؤنە ملو کەڵەشېرو ڕەقیبی و باڵې کەڵەشېرو وېش پېسە قارەمانی بەرزې کەرؤۋە ئاخرۆ ڕوەش کەردەنە کاکە شەهریاری و ۋاتش
دەخؤ ڕەنگم کەرد هیچش نەبەخشا
نەزانېنی کەڵەشېرو من هەر ئەجؤ ڕەخشا
یادو شاباڵی بە خەیر کە باڵېش ئاردېما دڎانېرە و یادو سەرداریچ بە خەیر کە بی بە خۆراکو بەۋەرزی.
بەختیار لهۆنی.[1]