لیزا کاکەیی: کەرکووکییەکان دەزانن بە بردنەوەی لیستی (197) شارەکەیان دەکەوێتە دەستێکی ئەمین
یاریدەدەری بەرپرسی مەکتەبی ڕێکخستنی #کەرکووک#-گەرمیانی #پارتی دیموکراتی کوردستان#، باس لە گرنگیی ھەڵبژاردنی ئەنجوومەنی پارێزگاکان دەکات و ئاماژە بەوە دەکات، سەرکەوتنی پارتی، واتا گەڕانەوەی ئارامی بۆ کەرکووک و جێبەجێکردنی ماددەی 140.
#لیزا فەلەکەدین کاکەیی#، یاریدەدەری بەرپرسی مەکتەبی ڕێکخستنی کەرکووک-گەرمیانی پارتی، وتی: ئێستا بەرەو ھەڵبژاردنێکی گرنگ و چارەنووسساز دەچین، گرنگە وەکوو پارتی بتوانین سەرکەوتنێکی گرنگ بکەینە دیاری بۆ سەرۆک و خوێنی ئەو شەھیدانەی لەپێناوی شکۆ و ئاڵا بەر لە دوو مانگ گیانیان کردە قوربانی، ھەروەھا بتوانین پاداشتی خوێنی شەھیدان و ئەنفالکراوەکان بدەینەوە، بە بردنەوە و سەرکەوتن.
لیزا کاکەیی، دەشڵێت: سەرکەوتنی پارتی و لیستی (197) و بەدەستھێنانی زۆرینەی کورسییەکان، بە واتای جێبەجێکردنی ماددەی 140 و گەڕانەوەی زەوی و زاری جووتیاران دێت، ھەروەھا بە واتای تێکشکاندنی ئەقڵیەتی تەعریب و پێکەوەژیانی خەڵکی ڕەسەنی کەرکووک دێت، ھەمیشە پارتی و مێژووەکەی بەشێکی گەورە بوون لە ئەدەبیاتی کەرکووک، لە سەرەتای دامەزاندنی حکوومەتی ئێراقیشەوە لە ساڵی (1921) تاوەکوو ئێستا، ئێمەی خەڵکی کەرکووک ھەمیشە لەناو ستەم و چەوساندنەوەدا ژیاوین، زیاتر لە نەوەیەکمان تەمەنی بەخشی، ھەمیشە و بەردەوام بەشێک بووین لە مەزڵومیەت.
کاکەیی داوا لە خەڵکی کەرکووک دەکات و دەڵێت: خەڵکی کەرکووکی خاوەن شکۆ، دەنگدانی ئێوە بە لیستی (197)، دەنگدانە بە کێشە سەرەکییەکانی کەرکووک، کە خۆی دەبینێتەوە لە بەگژداچوونەوەی عەسکەرتاریەت و جێبەجێکردنی ماددەی (140) و چارەسەرکردنی کێشەی مەزڵومیەتی جووتیارانی کورد و تورکمانی ڕەسەن و بەگژداچوونەوەی تەعریب، بۆیە دڵنیاتان دەکەمەوە ئەوەی براوە دەبێت، کەرکووک و کەرکووکییەکانن، نەوەکو درووشمە ڕووتکراوەکان لە ئینتیمابوون بۆ کەرکووک و خاکەکەی، چونکە خەڵکی کەرکووک ھوشیارن و دەزانن بە بردنەوەی کام لیست و ژمارە، کەرکووک دەکەوێتە کام دەستی ئەمین. [1]