(شاڕازەو گیٛجاوەو ژیوای)
پەیلوای دینی:
مەر حەرخوڎای گۆرە ویٛش بېیاوٙوٙنە جە سڕەکاو ژیوایو قەڎەرو ئەنجامەکاش.
وەختیٛو گوٙش مڎەی جەڕازەکیٛ یوسفی سڵامو خوڎایش سەربوٙ، چەنی برایەکاش وستەنە دلیٛ بیریٛویٛ قوڵیٛ بە مەخسەڎ و دلیٛنە بەردەیش، سەرەت جە دڵڕەقی و بیٛ ڕەحمی برایەکاش سڕمەنوٙ.
وەختیویچ تەماشەو قوتاربیەو یوسفی جەلاو کاروانچیەکاوەو یاوای بە چڵەپوٙپەو دەسەڵاتیوی ئەلاحەڎەی مکەری، موینی حەر چاوەختۆن کاروانچیەکی نیەتو کاروانیشا ئاوردەن خوڎای پەی قوتار بیەو یوسفی ئا نیەتەشە وستەن دڵشا هەکە بلا کاروان.
وەختیویچ مڎیەی ڕازەو خەمانیٛ و ڕەسوڵی بیٛ ڕەحمی قۆمو کەسوکارو خەمانیٛو دەگاو وەرکەمەری و بیٛ ئاوەزی خەڵک ودەگاو دەرەتاریکی قیٛخاکەیشا سەرەت ماسوٙ، پاتەشکە دویٛ تڵفیٛشا پەنە وێ نەکریێ!
وەختیویچ تەماشەو ڕازەو مەریەمە خاتونیٛ و وەلیدی مەئموری مکەری موینی حەر جە ئەوەڵۆ خوڎای هەرمانەش پی زاڕوٙڵە نەبیەو ئیڎشا هەنە پەی قوتار کەرڎەو دوی تڵفا دەسو ئا بیٛ ڕەحماوە! فاڕای ژیوایشا دلیٛ ئاگرڎو گیٛجاوانە پەی ژیوێوی وەشی ئەلاحەڎەی.
ماشەڵڵا خوڎا گېیان سەدەق جەکاریت...سەدەق جەکاری غێب نادیاریت.
پەیلوای ئانزانیی:
گلیٛرگا پانەی ویٛران نمەبوٙ هەکە بومی لەرزوٙو نیشتگاکە کاول بوٙ، گیٛرە پانەی ویٛران بوٙ هەکە ئاوەزی ئانزانی و بەزێ سیاپوٙرەی دلیٛشەنە بگنوٙ دلیٛنە شېیەی.
ئەر بیٛ ئاوەزی گلیٛرگای و بیٛ ئانزانی نەبېیێ ئانە قیٛخا زۊراب هەکە بەقۆمایەتیچ مېیاوی خەمانیٛ پیاوەتی سەرو ئاوەو حەمامیۆ نەکەریٛ، نەلیٛنە چیرو ئابارەیەو نەبیٛ بە بایس و دوور کۆتۆ خەمانیٛ نەک پەی دلیٛ مللەتیوی تەری، گیٛرە پەی دەگێویٛ تەریٛچ!
وەحەرپاسەیچ ئەرەکەتی قیٛخا حەمەئاییزیچ ئاوەزی ئانزانی و سەلېقەو خەموەریش بیێ ئانە جەوەرو شکاتو قەرزاریش و چەمپوشیش جەلاو مەئموریۆ نەلیٛنە چیرو بەخشای ڕەسوڵی بە وەلیدی مەئموری، ئەرەکەتی وەرو سومعەو دەگێکیٛشچش بیێ ئانە خەمو ڕەسوڵی جە دەگاکیٛ ویٛشەنە وەریٛ ئەر کەسش دەس نەکۆتیٛ ویٛش گیٛرتێش ویٛو تاکو یاونېشۆ لاو قۆماو ئۆڎیمیش.
ئی دوە قیٛخا ئەرەکەتی قیٛخایەتی ڕەسەنو حەرەقەتینەشا زانێ ئانە ئەر ئاهەرمانیٛ یانیوی تەری کەردێ ئیٛڎیٛ ڕاگیریش وەنەکەریٛنیٛ چەنە پەرسایچش چەنی کەریٛنیٛ نەک ویٛشا بکەرا بە دارحەزانەکەو دەسو مەئموری!
دەس وەشی ئیٛژانەی فرەما هەن پەی م. ئبراهیم میکە علی بنوېس شاڕازەکیٛ گیٛجاوەو ژیوای هەکە ئاردشۆ ویرما حیچ وەخت ئاگوٙرکا گۆریٛ نەکەرمیٛ ملوٙ وېماو گلیٛرگایەرە هەکە جیای شوتو ماسی ژەحرشا پەنەن، پیٛسە ئاغەو دلیٛ شاڕازەکیٛ هەکە بی بە بایس و ئی گرد قوٙمیایاو دەردەسەریا.
شەوقی عەلی شەیدا.[1]