زەمانێ بەڵخە شادەگاو هۆرامانی بۍ
زەمانیو بەڵخە شادەگاو ھەورامانی بی، فرەترین نفوسەش بی، وەروەڵاتەرین و پانوپور تەرین ڕوبەری جوگرافیاو هؤرامانيش بە بەراورد چەنی دەگاکاتەرو ھۆرامانی داگیرکەردەبی، ئاوەختە سەرچەمەو بەرھەم ئاوردەو کەسایەتیە ڕەسەنەکاو کەڵە پیایابی کە تاکو ئارویچ یاگەپەنجی موچیاریەکاشا نەخشیوەی جەبن نەئامێنە و دیارەنە. گەرەکما واچوو ئا مرۊڤە ڕەسەنی کە بەڵخەی بەرھەم ئاوردی و خزمەتشا کەرد ھەرگیز دلی زھنېیەنە گمی نمەبان. ئیتر یان ئازایەتیشان بۍ، یان دڵ و دەرون سافی و ڕەنج و زەحمەتشابی یان یارمەتی دای و دەمۆلوای یەکتریبی کە ئیسەیچ ئادیاردە بەڵخەنە جە گردو دەگاکاتەرو ھۆرامانی دلی کومەلگەو ئارویەنە ھیشتای ھەرمەنەن .
تامو لەزەتو قسەوەشەکیشا، ڕەفتارە خاکیە بی وێنەکیشاو بەسەرھاتی و ڕازونیازشا پەی کەسێوی نوستالگی حەسرەتو ویرۆ کەردەی جە ڕابوردوە کونەکا« ویرۆشېیەیشا زەحمەتا. چوون ئەر وەفاو ویجدانما نەوزمی هەرمانە پەی ئا کەسە سەرمەشقاما دمای ماویوی کەمی ، زەمان نام و نیشانشا ھاڕڕو ئاسەوارشا مەمەنو.
پەی ڕوح و کاک جمالی و وەفێوەیچ بوو پەیش:
تاسەرو زەنگوڵاو ئا کاتەو من وەروە وارێبی، ساحبی زووبی. ھیشتای وەرۋە ھەر وارای وارۍ (پلە زلەکا)، پەنجەرەو یانەکەیما دیینە لا مزگی، گرکەسی پا پەنجەرەنە وینینمی. ھەرکەس سەرەرە ئامێ پەی مزگی یان لوابیێ پەی ھانەی دیاربی. ئاساحبانە زوو ھورستا ، تەماشەو پەنجەرەکەیم کەرد گرلێو چەرمەکەریوە، پاسارەکی مزگی نقەشا ئێ چیرو وەروینە. مریچلەکی زوو زوو فرکیو کەرینی پەی چیرو پاساری ئۆ لاین تەری ، حەزکەرینی ئیسە منیچ چا چیرو پاساریەنە بیێنی. ناکاو پېیێو سەرەرە ئاما کورەڵیوەش «مەقەڵیە خەڵوزش کەریەنە و پەی چاشت و چیوی بەکارش ئارینم» دەسۆ بی و بە ڕەمای پا وەروینە بە دەمو ھاوارکەردەیۆ «وەرەبۊ شێلم وەرەبۊ شێلم» ویش کەرد بەرەو مزگیەرە. منیچ تاکو ئاکاتە نە زانینی شەلەمی چیشاو نەزانینی تامیچش چیشا. بەڵام سەرداو سوڵەکەو پزوزکی مە قەڵیەکی کە ویشا کەرینی وەروەکیرە سەرنج و فکریوی تازەو ھەستیوی فرە وەشش داپەنەم. ویم نەگرت لوانی پەی مزگی، کە ئۊسا پەنەش واچینمی «سەرو حۆزی». ھەرکە نزیک و مەقەڵیەکی بېیاوە ، دلی چەمە وڵوڵەکاشەنە سورەخەڵوزی گەش کیفەش ئێ ، بویووی فرە وەشە و ھەڵمو قابلەمەکەی ویشکەرد بڕناخ و دەممەرە، ئا بوەوەشی مەقەڵیی گردو لامزگیش گرتەبی.
کاک جمال ماچو ئا بوو کورە !
لوانی وەرۆ دلی نیمچە قاپوڵیویەنە شەلەمیش پەی کەردارە. مەکیش شانێ. ھەڵمیشا ھورزی. دێش دەسمۆ ؛ ماچو «ئادەی بزانو تاکو ئیسە چیوی چامنەت واردەن»بە حەزەرو ئانەیە کە شەلەمی نەژناسینی ، بەیەواشی یەکەم جار تامم کەردی، دماتەر تاکو گردم واردی و بە سەرو قوڵەکەیچم دەمو لچم ئەسەریم. پاسەرداو وەروینە دلی لەمم گەرمش بیۆ، ڤاپەکەم داوە دەسو کاک جەمالیو ، دەسوەشیم وەنە کەردو یەکسەر ئامانێ یانە. ئیتر پەنجەرەکەوە چەمیم بڕیبینینە لا مزگی و سورایی خەڵوزو مەقەڵیەکی کاک جمالی. پەی یەکەم جاری کاک جمالی فیرو شەلەماش کەردا، دمای 49 ساڵا تام و لەزەت و وەشی ئاساحبانەیە بەجوریو لکان زھنمەرە ھەرگیز ویرم مەشوە.
یادت گەرامی بوو ، قەبرەت پەڕنورە بوو، پیا خاکی و کەڵکگیرو ڕوح سوکەکەو بەڵخەی و ، وەروماڵو یانە فەقیراو، دەسەوام کەرو ، بان تلنەکەو بان و مزگی و ماموساو شەلەمەکاو منیچ.
هۆرامان عەبدولڕەحمان.[1]