=KTML_Bold=بەهاری سوتاو=KTML_End=
دوای دوو ساڵ و سیازدە رۆژ لە پێکەوەبوونمان، هەر دەڵێی یەکەم رۆژە ،ڕاستترە بڵێم; هەر دەڵێی ئەو رۆژەیە کە لە کافتریاکەدا و لە پایزێکی تەڕ و پڕ هەوردا یەکترمان بینی. من دەستم دەلەرزی کە دەموت:
ئەم دێڕەم بۆ هەڵگرە بۆ هەتاهەتایە هەر ئاوا بە تەڕ و تازەیی، هەر ئاوا وەک جوانی ئەم پایزە دەمێنێتەوە.
کام دێڕە؟
خۆشم دەوێی.
کە دەیوت خۆشمدەوێیت، بۆ دەمیم نەدەڕوانی، بەڵکو دەستی لێکهەڵپێکراوی سەرنجی بردبوم. هەستم دەکرد ئەوەندە راستگۆیانە دەیوت خۆشمدەوێیت، لە سەری هەموو پەنجەکانیەوە خۆشەویستی دەڕژا و فوارەی دەکرد. ئاخر لەوە ئەچێت هەر خۆشەویستی ڕاستەقینە مرۆڤ بخاتە لەرزین.
کامۆ گیان بۆ دەستەکانت ئەوەندە دەلەرزن؟
دوای دووساڵ و سیازدە رۆژ، بە هەمان گوڕ و تین و تاو و تاسەوە لە یەک دەڕوانین.
سنەوبەر گیان بیرت دێت لە کافتریاکەدا پێت وتم؛ بۆ دەستەکانت ئەوەندە بە شپرزەیی دەلەرزن! لە لەرزینی ئێستای لێوەکانی تۆ دەچێت. دووساڵ و سیازدە رۆژە بەردەوام پێتدەڵێم؛. خۆشمدەوێیت. دەمم ناوە بە ئاوی ئەم دێڕەوە و هەر تینوێتیم ناشکێت. لە رۆژی کافتریاکەوە تۆ لێوەکانت دەلەرزێ، ئەوکات رووت نەدەهات و جەسارەتی ئەوەشت نەبوو وەک ئێستا توند پەنجەکانت لە نێو پشتەسەرم و قژمدا تێکدەئاڵاند و لێوە لەرزیوەکانت دەخستە نێو دەممەوە. سنە گیان، سنەوبەرە تەڕەکەم ئەوە بۆ لێوم هەڵنامژی؟
لێوەلەرزەی سنەوبەر هەر شەرم و حەیا و ترس نەبوو، چونکە ئەوە دوو ساڵ و سیازدە رۆژە ژن و مێردین. کە لێوە لەرزیوەکانی دەخستە نێو دەممەوە، شەپۆل و تەزووی روداوێک دەگەییە دەم و لێو و ددانم و بە مەڵاشومدا دەلکا. بە جۆرێک دڵم دادەخورپا، هەرگیز نەمدەزانی چۆن روونی بکەمەوە و بۆچی ئەم هەستە سەیرە دامدەگرێت؟
لە یەکەم رۆژی کافتریاکەوە، دەستە لەرزیوەکانی کامۆ توشی دڵەتەپێیەکی سەیریان کردم، لەو جۆرە دڵەتەپێیانەی کە دەڵێی گورگێک بە ترسناکترین لورە بە هەناومدا هاتوچۆ دەکات. ئەو رۆژانە ئەم هەستەم بۆ کامۆ باسنەکرد.
بە درێژایی دووساڵ و سیازدە رۆژ هەمیشە دەموت: سەنە گیان نازانم بۆ باوەڕ ناکەم، هەر بەڕاست ئێمە پێکەوەین؟ ئەم تاسەیە بۆ کەم ناکات؟
هەموو جارێ کە سنەوبەرم ماچ دەکرد، سەرتاپای گیانم دەبوو بە ترس و دڵەراوکێ، چونکە لێوەکانی زۆر ترسناک دەلەرزین. دەستم دەکرد بە شانە بۆ قژی و لێوەکانم دەکردە مەڵهەم و لێوە لەرزیوەکانیم پێ چەور دەکرد. وا نەبوایە لێوەکانی هەدادانیان نەدەدا و هێواش و ئارام نەدەبونەوە. دەستە لەرزیوەکانی من بۆ سنەوبەر چیرۆکێکی نەگێڕدراوە بوون و لێوە لەرزیوەکانی ئەویش سامناکیەکی ترسهێنەر بوون بۆ من.
زەنگی مۆبایلەکە لێیدا و لەسەر مێزەکە داندرابوو، چووم بۆم هێنا و وتم: کامۆ گیان وابزانم باوکمە.
کامەران گیان بە پەلە بگەرە نەخۆشخانە، بەهار هیلاکە.
نەمزانی چۆن خۆم گۆڕی و چۆن گەشتمە نەخۆشخانە، رووپاک و روخۆشی خوشکی سنەوبەر خۆیان دەڕنی. باسی رووپاک ناکەم کە چۆن خۆی خەڵتانی خوێن کردبوو، یەکسەر داڵغەم چووە سەر رووخۆش، ئاخر رووخۆش خوێندکاری قۆناغی دووەمی کۆلێژی ئاداب بوو بەشی فەلسەفە. هەرچیەکی خوێندبوو نەیتوانی رێگە لەو هەرەسە رۆحیە بگرێت کە سووتانی دایکی بەسەریدا هێنابوو. مامم چیچکەی کردبوو، پاڵیدابوو بە دیواری تەنیشت دەرگای ئەو ژوورەی ئامۆژنە بەهاری لێبوو. ئەو هەموو ساڵە هەستم بەوە نەکردبوو مامم، واتە باوکی سنەوبەر، چەند قورس و گران و گەورە ئامۆژنمی خۆشدەویست. باوکی سنەوبەر کێوێک بوو لە خۆڕاگری، کەچی ئێستا وا دەیبینم لە کوچک و کەڵەکی فڕێدراوی بێکەڵکی نێو کەلاوەیەک دەچێت. دەموچاوی وەک بەزی زەردی لێهاتبوو. چوومە بەردەمی، هەڵتروشکام و دەستەکانیم وەکو دوو گورزە چیلکە خستە نێو دەستەکانمەوە. روانینێک بۆی روانیم رەنگە باوەڕ نەکەن کە بڵێم؛ لەنێو گۆمی مەنگی چاوەکانیدا ئامۆژنەبەهارم بینی هەر هاشاوڵی دەبرد و پەلەکوتێی بوو تا گۆمی گریان نەیخنکێنێ و هاشاوڵی دەبرد و دەست و پەنجەی بۆ برژانگە ترساوە جووتەکانی مێردەکەی دەبرد خۆی پێ بگرێتەوە و نەخنکێت.
دکتۆر هەموومانی راچڵەکاند و لە دەرگای ژووری نەشتەرگەری هاتە دەرەوە و وتی:
ها چیتان کرد، کەسی تر نییە خوێنی بداتێ؟ خوێنی کەستانی بۆ نابێت؟
خێرا هەستامە سەرپێ و وتم: دکتۆر گیان من فەحسم نەکردووە، دەتوانم خوێنی بدەمێ؟
بەپەلە خۆم گەیاندە موختەبەرەکە و خوێنیان لێ گرتم و پاش کەمێک وتیان: خۆشبەختانە گروپی خۆێنەکەی تۆ O-'ە و هاوتایە لەگەڵ خوێنی بەهارخاندا.
ئیتر ئاهێکمان پیا هاتەوە و خێرا بتڵێک خوێنیان لێ گرتم. باوکی سنەوبەر سەری بۆ ئاسمان بەرزکردەوە و دەستی سوپاس و ستایشی هەڵبڕی و رووپاک و رووخۆشیش ئاهێکیان تێگەڕا و بەروپشت باوەشیان پێدا کردم و هەردووکیان وتیان: تۆ هەرگیز نەتهێشتووە وەک زاوا خۆت پیشانی ئێمە بدەیت و رێگەت نەداوە بێ براییمان پێوە دەرکەوێت.
ئەوان نەیاندەزانی ئەوەی من کردوومە و ئێستاش بوومەتە فریادرەس، زۆر لەو فیداکاریانە کەمترە کە سنەوبەرە تەڕەکەم لە ژیانی مندا، کردوویەتی. دایکێک سنەوبەری بۆ من بەرهەمهێنابێ، بۆ نەبمە خاکی بەر پێی.
لە نێو گەرمەی خۆشی و بەشارەت و ئومێد و چاوەڕوانی گەش و گرنگ و هەواڵی خۆشیدا بووین، یەکێک لە بەردەستەکانی دکتۆرە سەرەکیەکە هاتە دەر بۆلامان و وتی:
کامەران دڵشاد کێیە؟
بەڵێ بەڕێز منم.
هەر ئێستا دەبێت داخڵی نەخۆشخانە ببیت، کۆمەڵێک پشکنینت بۆ بکرێت.
وەک ئەوەی رەشەبایەکی ترسناک بێت و هەر هەموومان رابماڵێتە نێو باڵەخانەیەکی تێک و پێکدراو و داروپەردو بەسەریەکدا کەوتووی چەندین ساڵە، ئاوامان لێهات.
ئێوە بۆ حەپەساون، خێراکەن بڕۆن بە شوێن کەسێکی تردا بگەڕێن و خوێنی بۆ پەیدا بکەن، ئەو خوێنەی کە لە کامەران دڵشادمان وەرگرتووە، نەک نابێت تێی بکرێت، بەڵکو زۆر ترسناکیشە. راستە هاوگروپن لە خوێنا، دەبێت ئەو خوێنە بنێردرێت بۆ پشکنین. تا ئەو پشکنینەش دەردەچێت، پێویستە کامەران لە نەخۆشخانە بهێڵدرێتەوە و دوور لە هەر نەخۆشێکی تر، قاپ و قاچاخ و خواردن و خواردنەوەی بۆ جیابکرێتەوە.
دوای هەفتەیەک مانەوەی ئامۆژنم، واتە دایکی سنەوبەری خێزانم لە خەستەخانە و پەیداکردنی سێ بتڵ خوێن بە هەر فەلاکەتێک بوو، دواجار رێژەی سوتاویەکەی هێندە کاریگەر بوو، دەرفەتی ژیانی لێ سەندەوە. ئەو رۆژەی بەهارخانیان ئەسپەردە کرد، سنەوبەری دڵسوتاو بە مەرگی دایکی، بە سەرتاپای جلی رەشەوە هات بۆ خەستەخانە بۆلام.
لەودیو پەنجەرەی ژورەکەوە سڵاوی لێکردم و دایە هاڕەی گریان وەک هەوری بەهار لە ناوەوە دەیناڵاند. چەخماخە و بروسکەی گریان لە چاوەکانیا قیامەتیان بەرپا کردبوو. ئینسانم دەویست جەسارەتی ئەوەی هەبێ لەو سیما و شێوە و ڕواڵەتەی بڕوانێت. نەمدەزانی چی پێبڵێم، چی لێ بپرسم، لە کوێوە دەستپێبکەم؟
ئەنجامی پشکنینی ڤایرۆسەکەی منی هێنابووەوە، ئەنجامی پشکنینەکەی نا بە پەنجەرەی ژورەکەمەوە. چاوم چووە سەر ئەنجامی پشکنینەکە و سنەوبەر وتی:
دایکم مرد.
هێزێک لە ناوەوە بووبوە دەستێکی زبری زەبەلاح، هەموو دڵ و دەرون و هەناومی هەڵدەشێلا.
کامۆ گیان دکتۆر وتی بە ناچاری دەبێت تۆش پشکنین بکەیت، چونکە ئەم ڤایرۆسە لە رێی سێکسەوە دەگوێزرێتەوە.
باشە سنەوبەر گیان، ئاخر خۆ من هیچ شوێنێکم بەئازار نیە و ساغ و سەلیمم. دەتوانم پڕ بە پێی خۆم بە رێگادا بڕۆم، ئیتر بۆ دەبێ نەیەمە دەرەوە و تێکەڵ نەبم؟!
کامۆ گیان ئەوەی تۆ دەیڵێیت بە دکتۆرم وت، دکتۆر وتی: دەتوانێت بێتە دەرەوە، بە مەرجێک نزیکی تۆ نەکەوێت.
ڕێکەوتین لەسەر ئەوەی تا دەرچوونی پشکنینەکەی من کامۆ لە نەخۆشخانە بمێنێتەوە.
بەڵێ دواجار ئەنجامی پشکنینەکەی منیش دەرچوو، دکتۆر پێی وتم: ئەنجامەکە پێچەوانەی هەموو لۆژیکێکی زانستی و پێچەوانەی دراو و بیرلێکراوە و سەلمێنراوە زانستیەکانە. ئەم ڤایرۆسە نەگواستراوەتەوە بۆ تۆ، کە بەڕاستی ئەم ئەنجامە هەموو لیژنە پزیشکیەکانی سەرسام کردووە. بەڵام ئەنجامێکی تر کە ئێمەی پزیشکان پێی گەشتوین ئەوەیە کە نابێت بە هیچ شێوەیەک لەگەڵ مێردەکەتا واتە کامەران دڵشاد بژیت و لێی نزیک ببیتەوە.
سوتان و مردنی دایکمم لەبیر چوەوە، رۆژی دوای دەرچوونی ئەنجامە پزیشکیەکەی خۆم. سەرباری شین و شەپۆڕ و تێکوپێک چوونی ماڵەکەمان و وێرانبوونی رووپاک و رووخۆشی خوشکم، ئەوە بە کۆتەرەبوونی باوکم لەولاوە با بوەستێت، سەرباری هەموو ئەمانە، چوومەوە بۆ نەخۆشخانە. هەر کە لە پەنجەرەکەوە بینیمی پێی وتم:
سنەوبەر بۆ خاتری خوا بۆوا تێکچوویت، جاری پێشوو زۆر زۆر لە ئێستا باشتر بوویت. ڕەنگی مردنت لێ نەنیشتووە، بەڵکو خۆت بویتەتە سنەوبەری مردن و لە بەردەم پەنجەرەی ئەم خەستەخانەیەدا بەپێوە وەستاویت.
کامۆ گیان ئەنجامەکەی منیش دەرچوو، بە موعجیزە ئەو ڤایرۆسە نەگواستراوەتەوە بۆ من.
ئێ سوپاس و ستایش بۆ خوا...
بوەستە بوەستە.
بەتەمایت چیتر بڵێیت؟
دکتۆر دەڵێت، دەبێت لەگەڵ مێردەکەتا لە یەکتر جیاببنەوە، چونکە ئەم ڤایرۆسە لە رێی هەموو تەڕاییەکەوە دەگوێزرێتەوە.
بەپەلە بەهۆش خۆم هاتمەوە بۆ ئەوەی سنەوبەر زیاتر ئیرادە لەدەست نەدات، پێم وت: زۆر باشە گرنگ ئەوەیە لە ماڵێکدا پێکەوە بژین، ئەوەی تری بە هیچ شێوەیەک گرنگ نییە.
ئاخر دەکرێت لە ماڵێکدا بژین، بەڵام دووری نێوانمان ئەمپەڕاوپەڕی دنیا بێت...؟
سنەوبەرە سەوزە بێ نەرد و ئیقباڵەکەم، تۆ ئێستە بڕۆرەوە، بەیانی وەرەوە بۆلام هەموو شتێک باش دەبێت. [1]
نووسینی: #عەلی پێنجوێنی#
=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End=