کورد دلۍ چەرخەکا تاریخینە
بەشۍ: سەڎ و نەوەڎ و یەکەمە
نویستەی: #هاوڕێ باخەوان#
ساڵەو (1876ز): چن تۊمارێ پېوەس پی ساڵېوە ئینێ وەردەسەنە:
* سافی شاعېر ئەچی ساڵېنە ئامان دنیا.
* شاعېری میللی فەقی هۆمەری جوانڕۊیی ئەچی ساڵېنە کۊچی دمایینش کەردەن.
* سەی عەلی ئەسغەری کوردەسانی ئەچی ساڵېنە ئامان دنیا.
* گەلێ جە سەردارە کوردەکا، نیشانەو ڕووسەکاشا دا، هەکە گەرەکشانەن هامکاریشان بکەران، بەڵام ئاڎۍ دەسشا نیا ڕوەشاوە.
* ئەچی ساڵېنە، سوڵتان عەبدولحەمید بییەن بە سوڵتانو عوسمانی.
* ئەحمەد بەگی ساحێبقران، ئەشناسیا بە (حەمدی شاعېر) ئەچی ساڵېنە دلۍ شارو سلێمانی ئامان دنیا.
* مەلا فەتاح وەهبی شاعېر، ئەچی ساڵېنە ئامان دنیا.
* ئەچی ساڵېنە، مەلای گۆرەو کۆیەی دلۍ شارو کۆیەینە ئامان دنیا.
* دمای کېشمەکېشێ فرەی، ئازاڎیوازەکۍ عوسمانی تاواشان سوڵتان عەبدولعەزیزی لا ۋزا، بە ئومېڎو چەسپنای دەستووری، یاگۍ ئاڎیینە (مورادی پەنجەم) برازاو سوڵتانی بکەران بە سوڵتان.
* ئامای دنیای موزیکژەن کوڕەکەو کادارابی.
* مۊزەخانەو وەرکۆتی جە ڤییەڼا، وتارێش سەرو پیشەسازی قوماشی کوردی وەڵاکەردۆ.
* مەلا فەتاحی جەباری شاعېر، ئەچی ساڵېنە تەمەنو (70) ساڵینە کۊچی دمایینش کەردەن دلۍ دەگاو (تاوېربەرزی)، دمایی تەرمەکەشان بەردەنۆ پەی دەگاو (بانگول)ی.
* ئەحمەد بەگی کۆماسی شاعېر ئەچی ساڵېنە کۊچی دمایینش کەردەن.
* تاریخو (29-10-1876ز) والی (وان و مووشی)، بروسکێوەشا پەی دۆڵەتو عوسمانی کیاستەن، چوونکوم کوردەکۍ ئاماڎۍ نەبېنۍ ژمارەو ئا سەربازا بڎان کە چەنەشان داواکەردېبېنۍ.[1]