یاڎو مەردەی گۆرە پیێوە هۆرامانی
نویستەی: #ئیبراهیم میکە عەلی#
کاک ئیبراهیم عەبدولکەریم هەم یار بې و هەم یاوەر
ساڵەو (1982ز) یانی 42 ساڵې چێوەڵ، خورماڵ کاک ئیبراهیم عەبدولکەریمم ئەژناسا، وەختێ بەیوترینیشا ئەژناسنایمې (خاس ویرم نېیا کەسەکە کې بې ئاژناسنامېش بە یوترینی - گېرە یام د. عەتا ئادەم یام م. عومەر سدېق بیەبۊ) حەر ئا کەسە ئانەیچشە وات بە من هەکە کاک ئیبراهیم تاتەش مەردەن و سەرەڕاو ئانەی یانەو مامۊیشەنە ژیوۊ وەلێم حەر جە نازو تاتەی بېبەشا، گېرە پاڎیچش واتەبۊ هەکە منیچ تاتەم مەردەن و بې تاتەنا.
مەزانۇ ئا حاڵەتەبې یام چېشی تەر، ئیتر چا وەختۆ بېژگە ئانەی هەکە ویری دینی و سیاسینە هام مەسلەکې بېنمې، من فرە وەشم ئې جە کاک ئیبراهیمی و حەروەخت دیێم هەرچڼ هام سنعېچ بېنمې وەلێم حەولې دېنې بېئانەی بە وېش بزانو یاوونە بزانو هەستو کەسێوە بېبەش جە نازو تاتەی چەنینا و بەراوردش بکەرو بەوېم.
قۊناغەی دماتەرەو ژیوای و پەیوەندیمانە خوڎای پاسشە کەرد ئۊرگانێوە سیاسینە من بېیا وەرپەرس هەکە کاک ئیبراهیمیچ چاگە ئەندام بې، ئیتر پەیوەسیە ڕۊحیەکەما وېش وست سارا و چەنی گردو واڵە و براڵا (سەرەڕاو گلەییە ڕوانە و ڕواڵەتیەکا) پەیوەسیېوە خاسم بې، وەلێم چەنیو کاک ئیبراهیمی پەیوەسییەکە قۊناخێوە تەرەش پۆ وېشۆ وینا و فرەتەر لوایمېنە دلې وردەکاریی ژیوای هەنترینی و پېسەو فرەو برا و واڵا چەنیو ئاڎیشایچ ئامۊشۊی خېزانیەما وستەرە.
کاک ئیبراهیم پېسەو کەسېوە ڕۊح هۆرامی عاشقو سروشتو هۆرامانی و کوەکاش بې، حەر ئاوەختە هەستش پا مەتەرسییە کەردەبې هەکە سروشتو کوەکا هۆرامانی و ئاژەڵە کۊییەکې هەڕەشێوە سامناکەشا کەوتېنە سەر.
فرەو وەختی هەکە لوې کەشەرە من بە شۊخیۆ واچېنېش پەنە دیسان مڎەیۆ کەش؟!
واچې ئەرېوەڵا مڎەو کەش.
قۊناخەی دماتەرەنە هەکە من جە خورماڵی بەشېوەی فیزیکی کوچێ دوور کەوتاوە هەروەخت لوێننېوە خورماڵ و دەرفەت بیێ کاک ئیبراهیمی وینېنې و ئاڎیچ دوې جارې بەتایبە ئاما لاو من و وەهارو وەڵې وەفاتیچشەنە چەنیو دەسېوە جە ئازیزا گەشتێوە وەهارەی وەشما کەرد پەی بەینو گوڵپی و نارنجڵەی.
فرەو ئی دیدارا دماییمانە، وات و واچما لوابېنە دلې پەرسە فیکریی و مەعریفی و ئەدەبیەکا و بڕێ یاگېنە تاکو ئاستو ئەوپەڕو سەراحەتی قسې سەرو پەرسە دینی و دنیاییەکا کەرېنمې و ئا بابەتې هەکە خەڵک چېرو لېفیچەنە مەیارۊ وەرو وېشەرە کەرۊشا، ئېمە بېتەرس کەرېنمېشا و پەیلوای وېما وزېنمې ڕوە پەی هەنترینی، وینگەما فرە نزیکتەر جە جارا یۊ کەوتەبې.
پەی نمونەی باسما چانەی کەرد هەکە ئېمە پاسە خاسا کەسایەتیما کەرمېوە بە کەسایەتیېوە گردینی و قەتیسې نەبیمې دلې دنیاوینیی سیاسی و تاخایتێ ئایینیچەنە.
پەیواچو ئا باسینە واتش: وەشبەختانە منیچ هەمان پەیلوایم هەن و دورۆ ئاگام جە تویچا زوۆن کەوتەنی سەرو ئا خەتیە، منیچ ئیسەتې خجڵەنا هەرمانە سەرو ئانەی مکەرونە و حەولېچ مڎەو هۊنیێکېم پەی گرکەسی با.
وەشبەختانە حەر ئا هەستەبې پاسەشە کەرد نامې یاوەری و هۊنیێکېش و کاریگەریش دلې دڵو خەڵکینە سنورو دنیاوینیی سیاسیی و سنورە قەسالەینەکا بەزنۊنە و (یاوەر) بۊ بە یاوەرو گرکەسی.
یۊ تەر چا خاڵا هەکە کاک ئیبراهیمش کەرد بە (یاوەر هۆرامی) و بی هینو گرکەسی، گېرە زوو مەردەیش بۊ، چوونکە عمری درېژ بەڵێوەن یاخوا خوڎا نەڎۊش بە هیچ وەشەسیېوەم.
بارەو ناسنامە شعریەکەیشۆ وەنەم پەرسا ئی (یاوەر)ە یانێ چېش؟!
چوونکوم هۆرامینە یاوەر بە (وێڵاش) ی ماچمې.
واتش: بە نیازو وېم و بە وینگەو سەرەتاو هەرمانېم بە ماناو هاوەڵی، ئا نامېمە هورچنیە، چوون سۊرانینە ماچا یار و یاوەر.
ڕاسەش و پاکەش کاک ئیبراهیم وەختێوە مەرد هەکە بیەبې بە یاوەر هۆرامی و موڵکو نەتەوێوە.
وېنەکە ئا دما گەشتە وەهاریەنە هەکە باسم کەردەن وەهارو ساڵەو (2017ز) ی سەرسڵامەتی و عاقیبەتخەیریی پەی کاک هۆرامانی و ڕۊحو ڕەحمەتی کاک عومەر عەلی چ (هەکە لاوە بەرکەوتەن) شاد و یاگېشا بەهەشت بۊ.[1]