Encamnameya #Hefteya Wêjeyî# ya sala 2024 an li bajarî #Dêrik# ê
Silav û rêz ji bo hemû beşdaran.
Çalakiyên Hefteya Wêjeyî ya îsal roja şemiyê 27ê Nîsanê li Hotêla Ên Dîwar a Bajarê Dêrikê li Kantona Cezîrê li Herêma Bakur û Rojhilatê Sûriyê ji aliyê Dîwana Wêjeyê ve, bi beşdarbûna hejmarek rewşenbîr, nivîskar û kesên bi karûbarên wêjeyî û çandî ve xerîk û mijûl dibin, hat lidarxistin.
Di Hefteya Wêjeyî de sê mijarên sereke hatin gotûbêjkirin:
A- Mijara yekem: Pirsgirêkên Dahênan û Weşanê, du rojan hate gotûbêjkirin. Roja yekem: semînara derbarê (Nivîs Û Weşan: Aso Û Derfet Li Gel Zehmetî Û Kêşeyan) û roja duyem: penela bi navê (Pirsa dahênan û weşanê). Her wiha helbestên bi Kurdî û Erebî hatin xwendin.
Di simînarê de li ser kêşe û pirsgirêkên li pêşberî nivîskaran hate rawestandin, ji qonaxa nivîsandinê ta çapkirin û weşanê. Paşê di roja duyem de li ser tevgera nivîskariyê li Herêmên Bakur û Rojhilatê Sûriyê, kêşeyên li pêşiya weşanxaneyan û pîvanên weşangeriyê, gotûbêj û danûstandin hatin kirin.
Di nav pêşniyarên ku ji hêla beşdaran ve hatin pêşniyarkirin ku pêwîste xebat li ser were kirin.
-1 Pêwîst e komxebatên taybet, ji bo hînkirin û perwerdekirina nifşê ciwan li ser prensîbên hunera nivîsînê û afirînerî bêne lidarxistin.
-2 Xebat were kirin ji bo piştgiriya çapkirin û weşana pirtûkên zimannasî yan jî ferhengan bi zimanê kurdî, ji ber ku pêwîstiya nifşê ciwan bi wan heye.
- xebatên çapkirinê baştir bêne şopandin da ku asta çapê ya teşe û naverokê were pêşxistin.
B- Mijara duyem: Li ser wêjeya zarokan bû, ku ew jî du rojan, pêk hat. Derbarê mjarê de simînara bi sernavê (Wêjeya Zarokan, dansîn û dîrok, Taybetmendî û naverok) hate pêşkêşkirin û panela bi ser navê (Wêjeya Zarokan, Pirsgirêk û pêşniyar) hatin lidarxistin. Her wiha çîrok û helbestên bi zimanê Kurdî û Erebî hatin xwendin.
Di simînarê de pênaseya wêjeya zarokan, dîroka wê û pêvajoyên pêşketina wê hate şîrovekirin, her wiha amûr, mijar û taybetiyên wê hate pêşkêşkirin. Simînarê bal kişand ser wêje û metnên nivîskî yên ku li gorî qonaxên zaroktiyê têne nivîsîn.
Mijara Wêjeya Zarokan bi penelê jî hate gotûbêjkirin, di panelê de kêşeyên giştî yên li ser wêjeya zarokan bi taybetî li herêmên Bakur û Rojhilatê Sûriyê hatin destnîşankirin, bi giştî bal hate kişandin li ser nebûna stratejiyekê ji aliyê saziyên pêwendîdar, û nebûna piştgiriyê ji bo proje û destpêşxeriyên taybet. Her wiha mijarên girêdayî pirsgirêk û mekanîzmayên gihîştina zarokan jî hatin nirxandin. Herwiha mijara teknîkên nivîsîn û amadekirina babetên wêjeyî yên ku ji bo zarokan têne amadekirin, weke naverok, reng û wêneyên li gorî qonaxên zaroktiyê.
Pêşniyarên ku ji hêla beşdaran ve hatine pêşniyarkirin:
- Guhdana bi wêjeya zarokan di pirtûkên dibistanê de,
- Her wiha guh bidin mijarên zanistî yên hemû beşên zanistê.
- Ji bo wêjeya zarokan stratejiyên demdirêj werin pêşxistin.
- Derxistina kovarên pêbawer ên ku dikarin kesayetiya zarokê bi hêz bikin.
- Avakirina pirtûkxaneyan ji bo zarokan.
- ji bo zarokan stranên vîdyoyê werin çêkirin (videoclip).
Di mijara sêyem û dawîn de jî, ku di rojên pêncem û şeşan de bû, li ser mijarên rexnegiriyê hate gotûbêjkirin. simînarek bi sernavê: (Nebûna rexneyê û bandora wê li ser jiyana çandî û wêjeyî) hate pêşkêşkirin. Di simînarê de çend mijar hatin parvekirin, ji wan: rexneya wêjeyî, erk û mîsyona wê/ girîngiya rexne û rexnegiriya wêjeyî, taybetmendî û rola wê, egerên sereke ku bûn sedema nebûna rexneya pratîk ya bi bandor û encamên ku ji nebûna rexneyê derketine.
Di roja dawîn de li ser rexneya wêjeyî gotûbêjeke berferh hat kirin. Mijarên ku mêvan û beşdarên panelên anîn ziman jî ev bûn: valahiya ku di navbera nivîskar û rexnegir de / nebûna rexneya pispor di beşên şano û roman de, kêmbûna lêkolînên rexneyî bi giştî, têkiliya nebaş a di navbera rexnegir û rexnegêr de / qelsiya çanda hevdû pejirandinê nêrîna neyînî li ser pêvajoya rexneyê bi giştî / qalibên edebî û pesnên rexney/pêdiviya me bi dibistaneke rexneyê heye li gorî rastiya nasname û çanda me.
Pêşniyarên ku ji hêla beşdaran ve hatin pêşniyarkirin jî ev bûn:
- Piştgirîya rexnegiran bi rêya saziyek an projeyekê, da ku ji bo rexneya wêjeyî bingeh bê avakirin
- Saziyên çandî û ragihandinê bi fermî xwedî li tevgera rexneya wêjeyî derkevin û dayîna cihekî guncaw ji bo rexneya wêjeyî di dezgehên ragihandinê de.
- Têvedan û piştgiriya çalakiyên xwendina rexneyî yên ku ji aliyê Dîwana Wêjeyê ve têne lidarxistin û piştgirya hemû hewildanên rexneyî ji bo pêşdebirina xebata rexneyî.
- derxistina kovarên rexneyî.
- xelatkirina berhemên rexneyî yên binirx.
Careke din bi navê Dîwana Wêjeyê, em spasiya her kesê ku bi me re amade bûn, dikin, ji xelkê bajarê Dêrikê ku îsal em mêvanên wan bûn, em spasiya her kesê ku wextê xwe ji bo beşdarbûnê terxan kir û ji deverên dûr hatin, dikin. Em hêvîdar in me mijarên wêjeyê yên girîng bi hev re gotûbêj kiribe. Bi hêviya ku em bi hev re karibin van pêşniyaran binirixînin û xebateke hevbeş bikin ji bo pêkanîna wan. Her wiha em bi hêvî ne ku sala bê dîsa ji bo bilindkirin û pêşxistina wêjeya kurdî em bi hev re bin.[1]