نەبۊ خاڵانەو قەڎییمیا
بەشۍ دوەمە
نەنویستشا بسوو پیراو گەنجاما
کۊن حاجی تەوفیق کاسب حەڵاڵ وەر
باخو ئەو دنیێش حەتمین گېرۆ بەر
ئیجار پیێوە کاسب و حەڕاڵ وەری کەمەن کېش کەردیمێ و مانیاما ماڼاو هانەواوە و پلاو ئاساویرە، لوایمێ دەگا وەشەکێ دەرەومەڕێ ملەگاو عەرەبیلێ لوایمێ خزمەتتو پیێوە ئاڎیچ نامېش حاجی تەوفێق سادق قادر، بەپاو نفوسێ ساڵەو (1914ز.)ی دەرەومەڕێنە جە ئەڎێ بېیەن.
پیێوە موسڵمانو کاسب بېیەن چەنی ئانەیچە ئاساوو وېش بېیەن وەبۊنەو کاسپیوە ڕاش کەوتێنە فرەو یاگاو پیێوە ئەشناسیا بېیەن، ساڵێشا ملۆ پەی حەجی کاتێ مێوە، لکەو تۊشە بەرەکێ کۊڵەکەیش کەرۊوە، مڎیۊ ڕېزێ غەریب گنۊ وەروچەماش، کەفرە ورد بۊوە ڕېزەی، ماڵۆ سەرەشەرە ماچۊ بەژەنەکېش: ژەنەکێ خەجاڵەتم ئامان پەنە، ڕېزێ کەوتەن دلې کۊڵەکەیم، ئی ڕېزە هنو عەرەبسانین دەی ئیسە تەگبیرم چېشا، ئاڎیچە ماچۊ: دەی کەی ئانەش گەرەکا ڕېز حەر ڕېزا چە چێبۆ یاچۊ حەر هنو خوڎاین، ئاڎیچ ماچۊ: هەی هەی، من بې بەرس ئاردەنم.
دڵش ئاوی مەوەرۆ پی قسا، بەرۊش پەی لاو مەڵاو دەگێ، حاڵو مەسەلەش یاونۆنە، فەرماوۆ: حاجی ئی دنیا گرڎ موڵکو خواینە ئی ڕېزەیچە هەر پاسە، حاجی تەوفێق ماچۊ: مامۊسا قسەکێت سەروسەرەیم، ئەی ئەر کیانوشۆ چېش؟ فەرماوۆ: وېت زانێ.
حاجی تەوفێق بەپەرسا پەرسای ماچا ئێساڵ تەوېڵېنە خەڵک ملۆ پەی حەجی، سەعبێ زوو ڕېزەی پېچنۆ جەلاتینێوە کە ئڼەو دەمەژاوێ ۋېژەنی بۊ، یان ئڼەو قڵوەقەڼێ. جمۊرە وېش یاونۆ تەوېڵۍ، پەرسۆ ئێساڵ کێ ملۆ پەی حەجی؟ ماچا: فڵانە کەس ملۆ، ملۆ پەی لاو کابرای ماچۊ: قوربان ئامانا پەی لایت واتشا ملۆ پەی سەفەرو حەجی، بەڵې گەر خوا ڕېکش وزۆ پاسەم خیاڵا، حاجی تەوفێق: سڵامت کەروو خەجاڵەتم پەنە ئامان کوچێ ئامانەتم هەن بەشکیم پەیم یاونیوە عەرەبسان، ئاڎیچ ماچۊ: ڕاو حەجی دورەنەو گەرماو هنو ئانەی نېیا کۊڵ دەی کۊڵێ یۊیرە، ئێڎیچ ماچۊ: ئامانەتەکەو من کۊڵ نیا، دەس کەرۊ کیسەشرەو ڕېزەکەی بەرمارۆ، ماچۊ: ئینێ ڕېزە تەوەنێنە نەزانانم ئاردێنەمۆ چەنی وېم هەرچن پەنەشاژواتا قەیڎش نېیا دڵم ئاویش نەواردۆ بەپەرسا پەرسای دەرەومەڕێوە ئامانا، تخوا دڵیم مەماڕە حەر یاوا سەرو خاکو عەرەبسانو سعودییەی فڕشدە، ئیتر خوا وېش یاوۆنەو هاگاش چەنەن، کابرای تەوێڵەی تن باوشیش کەرۊ پۊرەو ڕېزەش چەنە ور گېرۆ.
حاجی تەوفێق(#16-03-1988#ز.) چەنی ژەنەکېش، پیرۊزێ سڵێمان حاجی ڕەحمان بەکیمیایەکەو هەڵەبجەی شەهیدێبا، خواگېیان عەفوەشا کەرۊنەو ماواشا بەهەشت بۊ.
عەفان دەرەمەڕی.[1]