حاجی تۆفیق بەگی مەحمووداغای هەمزاغای مەسرەف "پیرەمێرد"، لە "غەزالە"خانمی عەبدوڵڵا ئەفەندیی عەزیزاغای هەووەڵ هاوسەری، کوڕێکی "مەهدی" ناو و دوو کچی "ئامینە" و "ڕەحمە" ناوانی خستووەتەوە. ڕەحمەخانم، لە "مستەفا ئەفەندیی ئەحمەد ئەفەندی" کە 26ی مارتی 1942 کۆچی دواییی کردووە؛ (فایەق هۆشیار، ئەحمەد زرنگ، فاتمەو پەروین)ی هەبوون.
ئەحمەد، کە "پیرەمێرد" خۆی ناسناوی "زرنگ"ی بۆ هەڵبژاردووە، ئێوارەی شەممەی ڕێکەوتی 14ی حوزەیرانی 1930 لە سلێمانی لەدایک بووە. قوتابخانەی سەرەتاییی (فەیسەڵییە)ی لە سلێمانی، سێی ناوەندیو سانەویی- ساڵی 1949- لە کەرکووک و کۆلێجی حقووقی – ساڵی 1954- لە بەغدا تەواو کردووە.
هەر لە ساڵی 1950 بەدواوە بووەتە هاوکارێکی ڕۆژنانەی "ژین" بووە؛ لە بەغداوە، بە یارمەتیی بەهەشتی عەلادین سەجادی مەرەکەب و کاغەزو پیتی بۆ چاپخانەکەی دابین کردووە. ئەو ماوەیە ناوبەناو کاروباری ئیدارەخانە یا نووسینی "ژین"ی ڕاپەڕاندووە، تا لە ژمارە 1214ی ڕۆژی 9ی ئەیلوولی 1954ەوە ئیدی بووەتە بەڕێوەبەری ئیدارەخانەو نووسینو "نووری ئەمین مەحموود"یش بەڕێوەبەری بەرپرسی بووە. ئەگەرچی ئەو ساڵە کە زانکۆی بڕیوە، هەلێکی مسۆگەری خوێندنی بەرزی لە فەرەنسە بۆ ڕەخساوە، بەڵام لەبەر بێخاوەنیی ڕۆژنامەکەو گیرانی مامۆستا گۆران"ی سەرنووسەری، نەچوە. لەو ساڵەیشەوە، بەدەم ڕۆژنامەوانییەوە، پارێزەریی کردووە تا 1964.
ڕۆژی 18ی کانوونی یەکەمی 1957 بە ئەندامی مەجلیسی بەلەدییەی سلێمانی هەڵبژێردراوە. پاش 14ی تەمووزی 1958 چووەتە بەغداو خانوەکەیی بە بارمتە (رهن) داناوەو دوو پارچە زەویی فرۆشتووە، پارەی پاشەکەوتکراوی دیکەیشی هەبوە، دوو مەکینەی نوێی چاپی پێ کڕیون؛ یەکەمیان قەوارە بەتاڵ بۆ دەرکردنی ڕۆژنامەی قەوارە گەورە، دووەمیان بچووک بۆ چاپی کتێب. تا وای لێ هاتووە ڕۆژنامەکەی – لەبریی هەفتەی جارێک- هەفتەی دووجار دەر کردووە.
ئەو ماوەیە کە "ئەحمەد زرنگ" سەرۆکی نووسینو ئیدارەخانەی "ژین" بووە، چەند جارێک ڕووبەڕووی لێپرسینەوەو تەنگ پێهەڵچنینی حکوومەت بووەتەوە، تا ڕۆژنامەکە لەدوای دەرچوونی ژمارە (1714)ەوە ڕۆژی 7ی شوباتی 1963، وەک هەموو ڕۆژنامەیەکی دیکەی عیراق، بە هاتنە سەر کاری عەبدوسسەلام عارفو بەعسیەکان، بەتەواوی ڕاگیراوە.
9ی حوزەیرانی 1963 یەکێک بووە لە گیراوەکانی سلێمانی. پاش بەربوونی، هەوڵی تازەکردنەوەی مۆڵەتی ڕۆژنامەکەی داوە، بەڵام ڕێی پێ نەدراوەتەوە. ئەمجا ڕووی کردووەتە وەزیفەو ساڵی 1964 بە دادوەری دادگای هەڵەبجە دامەزرێنراوە، پاشان براوەتە شارەکانی (دیوانییە) و (کەرکووک). 1972 بووە بە ئەندامی دەستەی تەمییزی چاککردنی کشتوکاڵ،1990یش بووە بە سەرۆکی هەمان دەستە. 1993 خانەنشین کراوە، بەڵام 1996 خراوەتەوە سەرهەمان وەزیفەی پێشوو. کە ئەو ساڵانەی دوایی بە ماڵەوە هاتەوە بۆ کوردستان، کرایە سەرۆکی ئەنجومەنی ڕاژە.
ئەم دوایییە، پاش ئەوەی –بەداخەوە- جەڵتەی مێشک لێی داو چەند حەفتەیەک خستی، ڕۆژی 27ی شوباتی 2011 (یەکشەممە) کۆچی دوایی کردو تەرمەکەی لە گردی (مامەیارە) بەخاک سپێردرا.
ئەحمەد زرنگ، هاوکارو پشتیوانێکی خۆبەخشی (بنکەی ژین) بوو.