کرێکاران، خەڵکی زەحمەتکێش و ئازادیخوازی کوردستان!
گاڵتەجاری هەڵبژاردنی ئەنجومەنی نوێنەرانی عێراق دووبارەکردنەوەی هەمان سەوداومامەڵەی ناو بازاڕی لەخشتەبردنی خەڵکە. کێبڕکێی بەدەستهێنانی کورسیەکانە لەنێوان دەستەوتاقمی کۆنەپەرستی نەتەوەپەرست و مەزهەبی و تائیفیە میلیشیایەکاندا. مەیدانێکە بۆ درۆکردن و داپۆشینی ڕابردووی تاڵانچیتی و ڕاوڕوتی خەڵک و سڕینەوەی خوێنی دەست و مەچەکێکە کە لە تاوانەکانی کوشتن و تیرۆرو دەربەدەرکردنی هاوڵاتیاندا سوورکراوه.
یاسایەکی هەڵبژاردن کە لەسەر بنەمای بەشی نەتەوەی کوردو عەرەب، سونه و شیعە، مەسیحی و سریانی، یەزیدی و تورکمان، تەنانەت تورکمانی شیعە وکوردی شیعه، کاکەیی وفەیلی، ڕێژەی نوێنەرانی پەرلەمانی دیاریکردوە، لەبنەڕەتەوە مافی هاوڵاتیبوونی یەکسانی لەخەڵک سەندۆتەوه. لەلایەکی دیکەوە بەشداریکردنی هێزە میلیشیاییەکانی وەک حەشدی شەعبی وعەسایبی ئەهلی حەق و ڕێکخراوی بەدر وهاوشێوەکانیانی لە هەڵبژاردندا هیچ حوکمێک سەبارەت بەم هەڵبژاردنە ناهێڵێتەوە بێجگە لەوەی کە بڵێین: ئەم هەڵبژاردنە بەکردەوە، نەک هەر شایانی ئەوە نییە بە هەڵبژاردن ناوببرێ، بگرە واتا و ناوەڕۆکی هەڵبژرادن ودیموکراسی ڕۆژئاوایی شی شەرمەزارکردوە.
بەڵام خەڵکی کوردستان ئەمجارە لەدۆخێکدا ڕووبەڕوی سیناریۆی گاڵتەجاڕی هەڵبژاردنی عێراق کراوەتەوە که لە ڕێفراندۆمێکدا بەشیوەیەکی مەدەنی و بەدەر لەزەبروزەنگ دەنگی دا بەجیابوونەوەو سەربەخۆیی کوردستان. بڕیاریاندا کەچیتر نایانەوێت ژیانی خۆیان و نەوەکانی داهاتویان لەژێر سایەی دەستورو دەسەڵاتێکی عروبی و ئیسلامیدا بەڕێوە ببەن، بەڵام عەبادی و حکومەت و پەرلەمانی عێراق به بەڕێخستنی جەنگێکی سەراسەری وەڵامی یڕیاری خەڵکی کوردستانیان دایەوە. ئایا دوای ئەم هەموو تاوانکاری و دەستدرێژی و سەرکوتگەریەی دەسەڵاتدارانی بەغدا، ئیتر بەقەد سەرەدەرزیەک بواری متمانەبوون بەم دەسەڵاتە لای خەڵکی کوردستان ماوەتەوە تا ڕێگای بەغدا و شەراکەت لەحوکمەتدا بۆ گەیشتن بەژیانێکی باش و ئاسودە وبەدور لەرقەبەری نەتەوەیی و دینی بگرنەبەر!؟ ئایا بەدوای ئه و هەموو دەسترێژیەی کاربەدەستانی بەغدا، بانگەوازکردنی خەڵکی کوردستان بۆ بەشداری لەهەڵبژرادنێکدا کەهەرئەم کاربەدەستانە دەخاتەوە سەر کورسی دەسەڵات، سوکایەتیکردن نیە پێیان!؟
ڕاستیەکەی ئەوەیە دەسەڵات و سیستەمێکی حوکمڕانی که لەعێراقدا بەڕێوەدەبرێ، کەمترین فرسەتی لەبەردەم خەڵکی کوردستاندا نەهێشتۆتەوە تا ڕێگای پێکەوەژیانی ئازادانه و یەکیەتیەکی ئارەزومەندانە هەڵبژێری و هەر لێرەشەوە بۆ هەڵبژاردنەکانی عێراق بڕوانێ. بەپێچەوانەشەوە ڕووداوەکانی 16ی ئۆکتۆبەر و مامەڵەی فاشیستانەو شۆڤێنیستانەی دەوڵەتی عێراق و پەرلەمان و حزبەکانی سەر بە خێزانی بۆرژوازی عێراقی- عەرەبی بەرامبەر ڕیفراندۆم و ئەنجامەکەی، ئەوەی سەلماندەوە که بەشداریکردن لەم هەڵبژاردنەدا و گەڕانەوە بۆبەغدا، جگە لە پێشێلکردنی ئیرادەی خەڵکی کوردستان و بەزۆرلکاندنەوەی کوردستان بەعێراق و ژێردەستەکردنی خەڵکەکەی شتێکی دیکە نیە.
لەدۆخی ئێستادا، ئەم سیاسەتی گەڕانەوەیە بۆ بەغدا لەڕێگای بەشداریکردن لەهەڵبژاردنەکانەوە، هەرچی زیاتر زەبوونی و سەرشۆڕی بزوتنەوەی بۆرژوازی کوردو حزبەکانی نمایش دەکات. بۆیە خەڵکی کوردستان نەک هەر نابێ بەبەشداریکردنیان لەهەڵبژاردندا باجی ئەم زەبونی و سەرشۆڕیەی بزوتنەوەی کوردایەتی و حزبەکانی بدەن، بەڵکو پێویستە لەبازنەی سیاسەت و خۆشخەیاڵیەکانی ئەم بزوتنەوەیەدا بێنەدەرو ئیرادەی شۆڕشگێرانەیان لەپێناو گەیشتن بەئازادی و یەکسانی و خۆشگوزەرانی بهێننە مەیدان.
خرۆشانی ئەم دوایانەی خەڵکی شارەکانی کوردستان و پەلاماردانی بنکه و بارەگای حکومەت و حزبەکان، جگەلەوەی نا یەکی گەورەی بە ڕووی دۆخەکەدا هەڵبڕی، هاوکات لێدانی یەکەمین زەنگی کۆتایی هێنان بەم دەسەڵاتە نایەکسان و گەندەڵە بوو. بۆ کپکردن و چەواشەکردنی ئەم دەنگەیە کە سەرجەم حزبەکانی کوردستان، بە ناسیۆنالیست و ئیسلامیەوه، بەوانەوە کە‌دەسەڵاتیان بەدەسەتەوەیه و بەوانەشەوە کەبانگەشەی ئۆپۆزسیۆن دەکەن، لەهەوڵی ئەوەدان، بەهەر نرخێک بووە، ئەزمونی حوکمرانیەکەیان لە مەترسی هاتنەمەیدانی شۆڕشگێرانەی جەماوەر دوورخەنەوە و لەباشترین حالەتدا، لەڕیگای گۆڕینی چەند دەموچاوێکەوە، پەرلەمان و حوکمەته فاشیلەکەیان بەسەر سەری خەڵکەوە ڕابگرن.
ئەوەی کەئەم هەڵبژاردنە، حزبەکانی وەک پارتی و یەکیەتی، گۆڕان و ئیسلامیەکان، لیستە تازە پێگرتوەکەی بەرهەم ساڵح و شاسوار عەبدولواحیدی خستۆتە نێو کێبڕکێی بەخشینەوەی دلسۆزی بۆخەڵک، بانگەشەی چاکسازی ودادپەروەری، سەروەرکردنی یاساو دژایەتکردنی گەندەڵی، هاوکات ئەوەی کەخۆیان بەهێزی نیشتمانی و نەتەوەیی ناو‌زەدکردووە و بەکۆبوونەوەیان لەدەوری دروشمیبەدیهێنانی مافەکانی کورد لەبەغدا بانگەوازی خەڵک دەکەن بۆ بەشداریکردن لەهەڵبژاردندا، هەرهەموویان لەسەر پێگەی گەندەڵیەکی سیاسی و درۆیەکی شاخدار ڕاوەستاون. ئەم لایەنانە که به لۆگۆی جیاواز و لیست و قەوارەکانیانەوە ڕوویان لەخەڵک کردوە دەنگیان پێبدەن، ئەوانەن کەپشتیان لەبڕیاری زۆرینەی هەرئه و خەڵکە کردوە که لەڕیفراندۆمدا دەنگیان بە سەربەخۆیی دا.ئەم لایەن و لیست و قەوارانە ناوەڕۆکی شۆڤینیستی وکارنامەی سەرکوتگەری دەسەڵاتدارانی عێراق پەردەپۆش دەکەن و چاویشیان لەهەموو ئه و تاوانانە نووقاندوە که ئەمە دەسەڵاتە بەرامبەر بەخەڵکی کوردستان ئەنجامی داوەو درێژەی پێدەدات!
جەماوەری ئازادیخوازی کوردستان!
بەشداری لەم گاڵتەجاریەدا مەکەن و مەهێڵن چارەنووسی خوتان و نەوەکانتان جارێکیتر بەعێراقی عروبی و ئیسلامیەوه بلکێندرێتەوە. ڕێگامەدەن بۆ چوارساڵی دیکە ژێانی خۆتان وخێزانەکانتان لەگێژاوی سیاسی پەیوەندیەکانی نێوان هەولێر و بەغددا ڕابگیڕێ.
نابی ڕێگابدەین کڵاوی هەڵبژاردن بکەنە سەرمان بۆئەوەی بەپشتیوانی دەسەڵاتدارانی بەغداو گەڕانەوە بۆلای عەبادی، دەسەڵات و ئەزمونی شکسخواردوویان هەڵسێننەوە.بەپێچەوانەوە دەبێ ئەم هەڵبژاردنە لەلایەن ئێوەوە، هاوڵاتیان و خەڵکی ئازادیخوازەوه وەکو بەگاڵتەجاڕ تەماشا بکرێ و بگێرێ وشکستپێهینانی وەک مەیدانێک بۆ کۆتاییهێنان بەدەسەڵاتدارێتی ئێستاو گەیشتن بەئازادی و سەربەخۆیی بەدەستەوه بگیرێت.
خەڵکینە!
ئەمە هەڵبژاردن نییه، ئەمە سوکایەتیکردنە بەخەڵکی کوردستان، نابێ بەشداری تێدا بکەین. وەرن با لەدرێژەی ناڕەزایەتیەکانی تائیستاماندا ئاراستەی خەباتمان بەرەو دەسەلاتدارێتی جەماوەری ڕێکخراو لەئەنجومەن و شوراکان و کۆنترۆڵی کارگه و دامەزراوەکاندا بکەین و هەنگاو بەهەنگاو بۆ بەدەستەوەگرتنی چارەنوسی سیاسی خۆمان و کۆمەڵگا، تێبکۆشین.
ئێمە زۆرینەی خەڵکی کوردستان؛ کرێکاران و زەحمەتکێشان و ئازادیخوازان، لەبەرامبەر ئەم هەڵبژردانە وگەڕانەوە بۆبەغدا ڕێگایەکی ترمان لەبەردەمدایه؛ ئەویش هێنانەمەیدانی بزوتنەوەیەکی سیاسی و شۆڕشگێرانەی وایە کە بەپشتبەستن بەتواناو ئیرادەی جەماوەر، کوردستان لەم گێژاوو دۆخە سیاسیە نارۆشنەی ئێستای دەربهێنێ و کوردستانێکی سەربەخۆو دامەزراو لەسەر بنەمای بەشداری ڕاستەوخۆی خەڵک لەشوراکان و ئەنجومەنەکاندا، دامەزرێنی.
حزبی کۆمۆنیستی کرێکاریی کوردستان
#26-02-2018#