- جەماوەری وڵاتپارێزو خۆڕاگری کوردستان...
- کەس و کار و بنەماڵەی سەربەرزی شەهیدانی کوردستان...
مایەی نیگەرانی هەموو لایەکمانە کەوا ماوەیەکە گرژی کەوتۆتە نێوان لایەنە سیاسییەکانی کوردستان و، ناوەندی سیاسیی کوردستان لێکترازاوو پەرش و بڵاوبووە، لەڕاستیدا دەکرێت هەموو ئەو گرژی و گرفتانەی کە هەن، بە دیالۆگ و لێکتێگەیشتن؛ بەبێ پەنابردنە بەر هێرشکردن بۆ سەر یەکدی چارەسەر بکرێن، سەردەم سەردەمی دیالۆگ و لێکتێگەیشتنە، بارودۆخی کوردستانیش بارودۆخێکی زۆر هەستیار و ناسکە، لە لایەک گەمارۆی وڵاتانی دەوروبەرمان لەسەرە، لە لایەکی دیکەوە قەیرانی ئابووری و ناعەدالەتی و کۆمەڵێ قەیرانی دیکەی ناوخۆییمان وایکردووە ژیان و گوزەرانی خەڵکی کوردستان ئاڵۆز و زەحمەت بێت، لەهەمان کاتدا تیرۆریستانی #داعش# خۆیان ڕێکخستۆتەوەو ڕۆژانە هەڕەشە لە ناوچە دابڕێنراوەکانی کوردستان دەکەن و فرسەت دێنن هێرش دەکەنە سەر ئەو ناوچانە، هەروەها بڵاوبوونەوەی ڤایرۆسی کۆرۆنا وەک کارەساتێکی مرۆیی ڕووبەڕووی کۆمەڵگای مرۆڤایەتیی بۆتەوە، سەرەڕای ئەمانە وەک بۆ هەموو لایەکمان ڕوونە تا ئێستاش کێشەکانی نێوان کوردستان و عێراق چارەسەرنەکراون، بۆیە ناکرێت لە ڕەوشێکی وادا کێشە و قەیرانی دیکە دروستبکرێت، ئەم ڕەوشەی ئێستای کوردستان لە هەموو کاتێک زیاتر یەکڕیزی و یەکدەنگی و بەیەکەوە کارکردنمان لێدەخوازێت، بۆیە پێویستە لایەنە سیاسییە ناکۆکەکان بگەڕێنەوە سەر مێزی دیالۆگ و لەوێوە چارەسەری کێشەکانیان بکەن، و ناوەندی سیاسیی کوردستان ڕێک و یەکبخەنەوە، نەک لە ڕاگەیاندنەوە پەنا بۆ بێڕێزیکردن بە یەکدی ببەن، هەڵمەتی ڕاگەیاندن پێویستە لە خزمەتی بارودۆخی ئێستای کوردستاندا بێت، نەک بۆ بێڕێزیکردن و ناوزڕاندنی یەکدی، داوا دەکەین هەرچی زووە ئەو هەڵمەتی ڕاگەیاندنەی کە هەیە ڕابگیرێت و بخرێتە خزمەت چۆنییەتی قوڵکردنەوەی گیانی برایەتی و بەیەکەوە کارکردن.
پێویستە هەموو لایەکمان خەمێکی جدی لە ژیان و گوزەرانی خەڵکی کوردستان بخۆین و نەخشە ڕێگایەکی کوردستانییانە بۆ چۆنییەتی دەربازبوون لە قەیرانەکان دابڕێژین و کاری لەسەر بکەین، با خەمی هەموو لایەکمان خەکی خاک و خەڵک بێت نەک خەمی دەسەڵات و گیرفان.
گەلی کوردستان لە ماوەی ڕابردوودا و تا ئێستاش زەحمەتییەکی زۆری کێشاوە و قوربانییەکی زۆری داوە، بە هەزاران لە ڕۆڵەکانی گەلی کوردستان لەپێناو خاک و خەڵکی کوردستان گیانی خۆیان بەخشیوە، ئەو زەحمەتی و قوربانییانە بۆ ئەوەی نەبووە، لایەنە سیاسییەکان لەبەر بەرژەوەندی خۆیان پشت لەو گەلە وڵاتپارێزە بکەن و ڕووبەڕووی ئەو هەموو قەیران و زەحمەتییانەی بکەنەوە، گەلی کوردستان بە تەواوی پێکهاتە نەتەوەیی و ئاینییەکانەوە شایانی ڕێزگرتن و خزمەتکردنی زیاترە، لەسەر هەموو لایەکمانە بەو ئاراستەیە کاربکەین و خزمەتی زیاتری گەلەکەمان بکەین، بۆ ئەوەی گیانی شەهیدان و ویژدانی خۆمان ئاسوودە بکەین.
- نەمری و سەربەرزی بۆ تەواوی شەهیدانی ڕێی سەرخۆبوون و ئازادی کوردستان.
- سڵاو لە گەلی وڵاتپارێزو خۆڕاگری کوردستان.
غەفوور #مەخموور#ی
سکرتێری گشتیی
یەکێتی نەتەوەیی دیموکراتی کوردستان YNDK
#15-05-2020#
Dette produktet har blitt skrevet på et språk (کوردیی ناوەڕاست), klikk på ikonet
for å åpne elementet på originalspråket!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Dette produktet har blitt sett 1,955 ganger
Skriv din kommentar om dette elementet!