قوماش 61
نووسینی: #ئوسامە جەمیل#

گەیشتمەوە شەقراوەیی و دابەزیم، بڕەکم برسی بوو، لامدا چێشتخانەکی و داوای دوو شیش کەبابم کرد، هەندەی نەبرد لۆیان هینام، خەریکی نان خواردنێ بووم، دوو سێ ئەمن وەژۆرێ کەتن، لە دری خۆم گۆتم: یائەڵلا خێر، خوایە تووشی کێشەکی نەبم، هاتن لە نێزیک مێزەکەی من دانیشتن، شاگردەکە هات بەخێراتنی کردن، بە عارەبی گۆتیان: تەشریبمان لۆ بینە! ئەویش سەوزە و سەلاتە و ئاوی لۆ دانان و هاواری کرد: سێ تەشریب لۆ ئێرە! ئەمن خەریکی نان خواردنێ بووم، دیاربوو لە بەینی خۆیان قسەیان دەکرد، ئێکیان گۆتی: ئەرێ ژنی ئەو موخەڕیبەی کە گیرابوو لەکنە خۆمان چتان لێکردەوە؟ ئەویدی گۆتی: وەڵلا دونێ شەوێ ڕووتمان کردبووەوە و لەگەر نائب عەریف زبالەی هەتا دوازدەی شەوێ دۆمینەمان لەسەر پشتی دەکرد! ئەویدی گۆتی: ئەو کوردە گەوادانە لۆ هەندێ باشن، هەر بەخۆیان لەناو یەک خائینن و دێن خەبەر لێکدی دەدەن، سیدولڕەئیس باشیان دەناسی لۆیێ بەڕاست و چەپ دەیانکوژی! ئەعسابم نەمابوو، مێشکم جامی کردبوو لە دەست ئەو قسانە، هیچیشم پێ نەدەکرا، ئەوان هەرسێک دەبانچەیان پێبوو، هەرکووی بجولابامەوە، دەیانکووشتم، تەمەننام دەکرد دەبانچەکم پێبا و هەرسێکم لەوێ کووشتبا! ئێکیان گۆتی: کیهانتان پارەی تشریبەکەی دەدەن؟ ئەویدی گۆتی: کورە ئێستا کوردەکی گەواد دێ پارەمان لۆ دەدا، خۆتان مشەوەش مەکەن! لەو قسانە دابوون، زەلامەک هاتە ژۆرێ، ڕانک و چۆغەرەکی کری لەبەربوو، دەبانچەکی لەبەر پشتی بوو، سەرو سمێری بەتەواوی بۆیاغ کردبوو، هەر چاوی بەو سێ ئەمنەی کەت، هات دۆقەی لەگەر کردن و بەس مابوو دەستیان ماچکا، بە عارەبیەکی سەقەت گۆتی: پارەکەتان واسڵە، ئەوانیش گۆتیان: شکرا کاکا! ئیدی کابرا چووە کن وەستای چێشتخانەکەیی و پارەی هەرسێکانی دا، گەڕاوە چاوی بەمن کەت تەنکە ڕدێنەکم هەیە! لەسەر سەرم ڕاوەستا و بەینەکی تەماشای کردم، ئەوجە گۆتی: ئەتوو خەرکی کێندەری کورە؟ گۆتم: هەولێر! گۆتی: ئەو ڕدێنە چیە بەرت دایتەوە، مووسەکی بینم و بە هیشکی بیتراشم! گۆتم: تازیەم هەیە لۆیێ بەرم دایتەوە، گۆتی: یان لەگەر جەماعەتی جەلۆ و مەلۆی؟ گۆتم: ناوەڵلا ئەمن تەلەبە بووم و تازە کولیەم تەواو کردیە، ئەوەش هەویەم! هەویەی وەرگرت و تەماشایەکی کرد و گۆتی: زوو نانەکەت سندان کەو دەفن بە! هەویەکەم وەرگرتەوە و هیچ قسەم نەکرد، گۆتی: لۆ جواب نادەیەوە، بە قوونکە دەمانچان هەموو سەرو گێلاکت بشکێنم! گۆتم: باشە نانی بخۆم دەچمەوە هەولێرێ! خەفەتەکە ئەوەبوو ئەو جاشە هیچ و پووچە دەیوویست لۆ سێ ئەمنەکەی بسەلمێنی زۆر دڵسۆزە لۆ سەدامی! ئەمنەکان تەماشای جاشەکەیان کرد و گۆتیان: عفیە کاکا عفیە، باچر نحجي للسید مدیر الامن اخلاصک للحزب والثورة(ئافەرین کاکە، سبەینێ باسی دڵسۆزی توو دەکەین لۆ حیزب و شۆڕشی لای جەنابی مدیر ئەمنی)، ئەو گەوادە بەس مابوو لە خۆشیان بفڕی، هەر خوا ڕەحمی کرد و زیاتر گەرم نەبوو و ئەمنی نەدا بەر شاپان! هەرکووی هەبوو نانەکەم خوارد و بە پەلە چوومە لای وەستایەکەیی و پارەکەم دایێ، وەستا پارەکەی وەرگرت و لە کاتی خوردە دانەوەی بە سەبری گۆتی: زوو خۆت قورتارکە وەزع باش نیە! گۆتم: زۆر مەمنون مارت ئاوابی!
لە چێشتخانەی چوومە دەرێ و خشیم لۆلای تڕومبێلەکانی دەچوونەوە هەولێرێ، دوعام دەکرد، زوو تڕومبێلەک بێ و سوار بم و بگەڕێمەوە هەولێرێ! بیست مەترەک لە چێشتخانەکەی دوور نەکەتبوومەوە، بووە تەقە لەناو چێشتخانەکەی، وەستاو شاگردەکان بە غاردان هەراتنە دەرێ و لۆلای من هاتن، هاواریان کرد: هەرێ خۆت قورتارکە! گۆتم: چبوو؟ گۆتی: وەڵلا جاحێرەک هاتە ژۆرێ، هەرسێ ئەمن و جاشەکەی دا بەر دەمانچان و حەیاتی لێ بڕین!

هەر بابایە و هەردەهات، وەیلێهات شەقراوە زەلامی تێدا نەما، ئەمن لەگەر وەستا و شاگردەکانی بە کۆرانەکی بەسەرکەتم، وەختەکی تڕومبێلەک دەهات، دەستم لێ ڕاگرت و ڕایگرت، گۆتم: کێوە دەچی؟ گۆتی: هەولێر! بێ سێ و دوو یەکسەر سواربووم، کابرا بەخێراتنی کردم و گۆتی: ئەو مشەوەشیە چیە؟ گۆتم: لە ناو بازاڕی بووە تەقە و جاشەک و دوو سێ ئەمنیان کووشت، گۆتی: بە ڕاستتە؟ گۆتم: ئەرێوەڵلا، گۆتی: وەڵلا حوکمەت چاوی سۆر دەبی، ئەگەر ئەوڕۆ لە ناو شەقراوەی دە دوازدە گەنجی نەگرت و گوللە بارانی نەکردن، ئەمن چنیمە! گۆتم: ئەتوو برێی ئەمە دەرباز بین؟ گۆتی: ئیشاڵلا، ئەگەر دەزانی ئایەتەلکورسیەکی بخینە، ئەمن خیندم و ئەویش دەستی بە قولوەڵلایان کرد!
گەیشتینە لای سەیتەرەی دیتمان هێزەکی زۆر لۆ شەقراوەی دەڕۆیی، سەیتەرە پڕی جاش و عەسکەر بوون، گەیشتینە نێزیک سەیتەرەی، جاشەک لۆلایمە هات، خوا ڕەحمی کرد خزمی سایەقەکەی بوو، گۆتی: ئەوە ئەتوو چدەکەی لێرە؟ گۆتی: وەڵلا لە هیران و نازەنینێ دێمەوە، گۆتی: وەرە دەربازت کەم وەرە، هەی نەگبەت، ئەوە وەختە ئەنگۆ بێرە دادێن! خوا ڕەحمی کرد جاشەکە ڕێی لۆ کردینەوە و دەرباز بووین، دەنا سەتا سەت لەگەر ئەو زەلامانە گووللە باران دەکراین، کە لە سەیتەرەی گیرابوون و قۆر بەستیان کردبوون، لە سەیتەرەی دوورکەتینەوە و هەناسەکمان هەرکێشا و شوکری خوامان کرد، کابرا گۆتی: ئەوجارەش قورتار بووین، خوا کەریمە لۆ جارەکیدیش، گۆتم: وەڵلاهی ئەتوو خدری زیندە بووی لۆمن پەیدابووی!
خوا ڕەحمی کرد هەموو سەیتەرەکانمان بە ئاسانی بڕی و گەیشتینەوە هەولێرێ، لەکن خەستەخانەی جمهوری دابەزیم، پارەم لۆ کابرای ڕاگرت، هەرچەند کردم وەرینەگرت، گۆتی: ئەمن ئیشی تەکسی ناکەم، بەران نازانم لۆ وەکی ئەتوو دەستت ڕاگرت درم نەرمبوو هەرتگرم، دەنا پێشی توو چەند کەسی دەستی لێ ڕاگرتم و ڕانەوەستام، زۆر مەمنونی بووم و خواحافیزیم لێکرد و لە جادەی پەڕیمەوە و شۆڕ بوومەوە لۆلای مارێ، گەیشتمەوە مارێ و سەلامم لە داک و بابم کرد، دیتم بابم جلکی گۆڕیە و بە بێتاقەتی ڕاوەستەیە، سەلامیان لەمن وەرگرتەوە و گۆتیان: ئەلحەمدولیللا کوڕم بەسەلامەتی هاتیەوە، وەڵلا درمان لە دووڕ دەستی بوو هەتا هاتیەوە! گۆتم: ئەدی خێرە ئەوها بێتاقەتن دەرێی چشتەک بووە؟ بابم گۆتی: وەڵلاهی کوڕم چت لێبشارمەوە، قادرە فەندی ئەمری خوای بە جێهینایە و وەفاتی کردیە، وا چاوەڕێی قادر قرپەستووریمە بێ بچینە ماری قادرە فەندی! زۆر بێتاقەت بووم بە مردنی قادرە فەندی، چونکە زۆر تەئکید بووم لە خەمی زریانی کوڕی و هەورینی مردیە، ئاخر ئاسان نیە کوڕەکت لە بن تەعزیبی شێت ببی و کیژەکی نازداریشت بەزۆری زۆرداری لەبن دەستی دەرینن، ئەوجە لۆ کێشبی، لۆ جاشەکی خۆفرۆش، قادرە فەندی پیاوەکی خیندەوار و ڕۆشنبیر بوو، مندارەکانی زۆر بە جوانی پەروەردە کردبوو، هەموویان هێمن و لەسەرخۆ و خیندەوار بوون، فەوزیە خانی خێزانیشی ژنەکی زۆر خانەدان و تێگەیشتی بوو، جارەکی هەورین بە منیگۆ: بە بیرم نایێ داک و بابم لێک توڕەبووبن و کردبیانە هەرا، ئەگەر بابم توڕە با، داکم بێ دەنگ دەبوو، ئەگەر داکیشم میزاجی تەواو نەبا، بابم دەستی لەملی دەکردو ئاشتی دەکردەوە، دەیگۆ: فەوزیەی من! کوو درت دێ ڕووی خۆت لەو پیاوەی گرژکەی، کە ئەتووی لەناو دری خۆی هەرگرتیە و قوفلەکی گەورەی لێدایە و کلیلەکەی هاویشتیتە ناو بەحرێ، ئیدی داکم زەردەخەنەکی دەکرد و دەیگۆ: وەی قادر وەی قادر، بەخوای قەت دەرەقەتی توو نایێم! لەگەر ئەو قسانەی هەورینی فرمێسک بە هەردوو چاوم داهاتە خوارێ لۆ ئەو پیاوەی لە بنی دریەوە حەزی دەکرد ئەمن ببمە زاوای! گۆتمە بابم: ئەمنیش لەگەرتان دێم، گۆتی: ناکوڕم نا، با ئەو سەرۆک جاشە لەوێ نەتبینی و چشتەکت لێبکا، ئەوانە بێنامووسن و نە شەرەفیان هەیە نە پیاوەتی، بەخودای گێی لێنیە لەسەر قەبران بتداتە بەر گووللان و بتکوژی!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!