قوماش 149
نووسینی: #ئوسامە جەمیل#

دختۆر شێرۆ بووە یەک قەترە ئاو، نەیزانی چبرێ، بەینەکی باش چاوی بڕیە سوکانی تڕومبێلی، ئەوجە بە توندی دەرکەی تڕومبێلی کردەوەو چووە پشتەوە، تەماشامکرد سندوقی کردەوەو دەبە بەنزینەکی دەرهینا ڕاست سەری کردەوەو هەمووی بە تڕومبێلی داکرد، ئەوجە شقاتەکی لە بەڕکی دەریناو گۆتی: لە بەدە بێدەرپێی کەمتربم، ئەگەر ئێستا ئاگرت تێبەرنەدەم، ئەمن و چەکدارەکە غارمانداو تووند دەستی دختۆر شێرۆمانگرت، گۆتمان: بکە لە ڕاهی خوای و ئەو تڕومبێلەی مەسووتێنە، گۆتی: بمکوژن و بمبڕن هەر دەیسووتێنم، وەکی ئیشم پێیە ئیش ناکا، وەکی ئیشیشم پێنیە، بە سلفەکی هەردەبی! هەر کووی هەبوو تانیمان شقاتەکەی لە دەستی دەرینین، کابرای چەکدار گۆتی: کاکە بڕۆ لەکۆرمان بەوە بەس ئەو تڕومبێلەی مەسووتێنە، بڕۆن چاوەکەم بڕۆن، هیچ ئیشمان بەنگۆ نییە! شێرۆم هێور کردەوەو چووینەوە ناو تڕومبێلی، گۆتم: ئەو تڕومبێلەت هەموو کردتە بەنزین، ماژۆ هەتا هیشک دەبتەوە، دەنا ئەمەش لەناوی دەسووتێین، گۆتی: زۆری مەرێ، دختۆر شێرۆ بەخۆی ئیشی خۆی دەزانی و هەر بەخۆشی دەزانی چدەکاو چناکا، گۆتم: باشە کاکە باشە، ئەمن چ قسان ناکەم، بەس ئەتوو بمگەینەوە هەولێرێ، شێرۆ پێی لە بەنزینی ناو بەسەکەت لۆلای کۆڕێ.
لە لۆفەکان بەسەکەتین گەیشتینە مەسیفی، لەوێ لەکن بەنزین فرۆشەکی ڕایگرت دوو دەبە بەنزینی بکڕی، گۆتم: چاوەکەمی تڕومبێلی مەکوژێنەوە نەکوو ئیش نەکاتەوە، گۆتی: وەڵلا ئەو بەرازە لێیدێ، هەر بغەزری دەغەزری! بەنزینەکەی کڕی و سواربۆوەو بەڕێکەتین، گەیشتینە سەیتەرەی مەلا ئۆمەری، هەتا لەسەیتەرەی دەربازبووین، سعاتەکمان پێچوو، دختۆر شێرۆ گۆتی: بەس سەیتەرەی شاوێسی مایە، لەوێ دەرچین، تەواو، گۆتم: ئیشاڵلا دەردەچین، گۆتی: بەتەمای خوای، باشبوو خوا ڕەحمی کردو لەوێش دەربازبووین.
ئەوجە هاتمەوە سەرەخۆو درم کەتە قرتوفرت، یاڕەبی خوایە دەبی چبووبی، کێ تووشی کێشەکی بووبی، شێرۆ لۆ ئەوها بەپەلە هاتەدووم؟ وەلحاسر درم ئۆقرەی نەکردو لەسەر هەزاری لێیدەدا، هەتا گەیشتینەوە لای مارێ بووە پاش مەغریبەکی درەنگ و دنیا تاریکبوو، شێبەشی هەولێرێ کارەبای نەبوو، تاریکستانەک بوو نەبیتەوە، چونکە شەڕی ناوخۆشبوو، هەر لەگەر ڕۆژئاوابوونێ جادەو بازاڕ چۆلدەبوو، دنیا بەتەواوی کش و ماتبوو، گەیشتینەوە لای مارێ، لە دووری تەماشامکرد، دیتم گەڕەک هێمنەو شتەکی وا دیارنییە کە جێی ترسێبی، وەلەو ترسەکی زۆرم هەبوو، شێرۆ لەپێش دەرکەیمە ڕایگرت و گۆتی: یاڵلا دابەزە، ئاوڕم داوە لای شێرۆی، دیتم هەردوو چاوی پڕی فرمێسکن، زانیم شتەکی گەورە ڕوویدایەو شێرۆ بەزۆر خۆی گرتیە هەتا پێمنەرێ، یەکسەر دابەزیم و بێئەوەی جانتاو کەلوپەلەکانم بینمە خوارێ، غارمدا لۆ ماری خۆمان، دەرکەم کردەوە، دیتم داکم و بابم لە حەوشێ دانیشتینە، کە ئەوانم دیت سەلامەتن، بڕەک هاتمەوە سەرەخۆ، داکم کە چاوی بەمن کەت، قیت بۆوەو بە گریان لۆلای من هات، تووند باوەشی پێکردم و گۆتی: وەی لۆت کۆرەبم ڕۆرە، ئەوجە لەوەپاش کێ پێتبرێ پرتەقار!

وەکی داکم ئەو قسەی کرد، لەجێی خۆم تاسام و هیشکبووم، ئەوەی تەڕاتیبی لە قوڕگم نەما، بابم لێم نێزیک بۆوەو بە چاوی پڕ لە فرمێسک گۆتی: وەرە دانیشە کوڕم، با دوو قسەت لۆبکەم، گۆتم: پێمبرێ هەورین چیلێهاتیە، مایە یان نا؟ بابم قۆری گرتم و داینیشاندم، بەینەکی باش بێدەنگبوو، داکم هەر دەگریاو لە چۆکی خۆی دەدا، بابیشم سەری نووی کردبوو و فرمێسکی دەباراند، دختۆر شێرۆش زۆر بە خەمباری لە دووری ڕاوەستابوو و تەماشا مەی دەکرد، گۆتمە بابم: دە قسەم لۆبکەو پێمبرێ هەورین مایە یان نا؟ بابم سەری برند کردو گۆتی: کوڕی گەورەم، هەرچی خوا بینی دەبی شوکربین و پێ ڕازیبین، هەموومان عەبدی خواینەو خواش مادام ژیانی دانابی، مردنیشی دانایە! گۆتم: بابە لۆ پێچوپەنای لەگە من دەکەی، ڕاست و ڕاست پێمبرێ هەورین مایە یان نا؟ داکم دەستی لە ملی کردم و گۆتی: وەڵلا کوڕم چت پێبرێم، ناوەڵلا نەمایەو مردیە! لەگەر ئەو قسەی داکم تاسام و ئەوەی ڕوحبی لەبەرم نەما، پێش چاوم تاریبوو، نەمزانی و نەمتانی چبرێم، هەر ئەوەندە نەبی هەستامەوەو غارمدا ژۆرەکەی خۆم، دەرکەم کردەوەو چوومە ژۆرێ، یەکسەر ڕەسمەکەی هەورینم دەریناو بە دەموچاوم وەناو لە پڕمەی گریانێم دا، داکم و بابم و شێرۆ هاتنە ژۆرێ و دانیشتن و لەگەمن زۆر گریان، ئەو گریانەی هەر چارمان، ئاگری هەمووی دنیای دەکوژاندەوەو چیای لەبنوپۆتکەوە هەردەتەکاند، وەزعەکم بەسەرهات، بەس بەسەر ئەوانەدێ کە دە ساری تەمەنی خۆیان بە قوربانی عەشقەکی زۆر پاک کردیە، هەر چەند کردم نەمتانی بێدەنگبم و نەگریێم، بابم لە خەمان و لۆ ئەوەی وەزعەکەی هێور کاتەوە، دەستی بە قورئان خیندنێ کرد، ئەو جێیانەشی دەخیند کە باسی مردنی خۆشەویستان دەکەن و ئەو کەسانە کە سەبر دەگرن چ پاداشتەکیان هەیە، داکم لەمن زیاتر دەگریا، شێرۆ هەر خۆی نەهێشت و هەتا هەتایێ ئەو فرمێسکە پڕ لە وەفاو خۆشەویستییانەی دختۆر شێرۆم لەبیر ناچی.
بابم هەر قورئانی دەخیندو ئەمن هەر دەگریام، ناهەق نەبووم، هەورین هەموو ژیانی داگیرکردبووم، هەرچی بەسەریهات و بەسەرمهات دەرەنجامی ئەو عەشقەی بوو، ئەو قوربانی بە ژیانی خۆیدا هەتا ئەمن لەژۆری ئیعدامی بێمەدەرێ، ئەو هەموو ژیانی خۆی کردە قوربانی یەک هەناسەی من، ئێستاش وا چووە بن خاکی و بەجێی هێشتم، بە تاقی تەنێ ئەمنی لەو دنیایەی هێشتەوە لۆ خەموخەفەتان، ئای لە ئاگری عەشق کو ئادەمیزادی تەفروتونا دەکاو دەیکاتە مشکی(خۆڵەمێش).
هەتا برێی بێتاقەت بووم و وێرانبووم، نە ژیانم ماو ناخواردن و خواردنەوە، تاکە ئیشی من بەس گریانبوو لە دیار ڕەسمەکەی هەورینی، ئەو ڕەسمەی ڕۆژگارەکبوو سوکنایی درم بوو، ئەوڕۆش بوویتە خەنجەرەکی دەبان و لەتوپەتم دەکا، ژیان ئەوەی ناخۆشە، لەپڕ خۆشەویستانت لە دەست دەدەی، لە وەختەکی کە قەت لە خەیارت نەبووە لە دەستیان بدەی.
دوو شەوو دوو ڕۆژ لەو ژۆرەی کەتم و کارو پیشەی من بەس گریانبوو، هەر چەند داکم دەهات و نانی لۆ دەهینام، نەمدەتانی هیچ بخۆم، بابم زۆر ڕجای دەکرد پارەکی بخۆم، ئەوجە لەبەر خاتری وان پارە نانەکم لە زارم دەنا، ئەویش لەگەر گریان و فرمێسکی هەر دوو چاوەکانم تێکەر دەبوون، گۆتم: بابە دەپێمبرێ هەورین کوو مرد؟ بابم فرمێسکی چاوی سڕیەوەو گۆتی: کوڕم، وەکی هەورین بیستی هەناری خوشکی زەهیر(ژەهر)خواردی کرایەو مردیە، کوڕی سەرۆک جاشەکەش پێی گۆتبوو: ئەوها هەناری دەکوژم، مادام لۆمن نەبوو کوو دێلم لۆ ئێکەکیدیبی، هەورین زۆر تێکدەچی و بڕیار دەدا تۆرەی ئەو هەموو زوڵمەی بکاتەوە، پاشی دە دوازدە ڕۆژی فرسەت دەینی و کوڕی سەرۆک جاشەکەی دەداتە بەر گوللان و دەیکوژی، دوو فیشەکیش لە سەرۆک جاشەکەی دەدا، ئەویش دەبانچەی ڕادەکێشی و هەورینی دەداتە بەر گوللان و دەمودەست دەیکوژی!

گۆتم: سەرۆک جاشەکە مردیە؟ گۆتی: لە عینایە موڕەکەزەی کەتیەو لەو ڕۆژیوە ئاگای لەخۆ نییە، گۆتم: ئەدی مەیتی هەورینی چیلێهات؟ گۆتی: بردیان لە تەنیشت داک و بابی شاردیانەوە، گۆتم: دەتانم بچمە سەر قەبری؟ گۆتی: جارێ پێمباشە نەچی تەئکیدم کوڕەکانی ئەو سەرۆک جاشەی دووربەدووری دانووساینە، دەترسێم بچی و بتکوژن، جارێ سەبرەکی بگرە هەتا وەزعەکە هێور دەبیتەوە! هەر چەند ئەمن بەمردنی هەورینی تەفروتونابووم و ئاگر لە هەناوم بەربوو، بەران داکم و بابم دە ئەوەندەی من وەزعیان تێکچوو، بە تایبەتی داکم، لەو ماوەی مردنی هەورینی ڕەنگە دە کیلۆ کەمیکردبی، هیچی پێنەدەخورا، هەموو ڕۆژێ لەسەر نانی دەستی بە گریانێ دەکردو هەردەستاو دەچووە ژۆرەکەی خۆیی و بابم و تێر تێر دەگریا، ئەو ڕۆژە پڕ خەمانە قورئان خیندنەکەی بابم سوکناییەکی زۆری دەدا بەمن، ئاگری درم بەس بە دەنگە خۆشە پڕ لە فرمێسکەکانی بابم دادەمرکا، ئەگەر داک و بابەکی ئەوها بە هێزو توانام نەبایە، سەتاسەت لەگەر بیستنی مەرگی هەورینی بەزگم دەدا، ڕۆژانە قادر قرپەستور و زەکیەی خێزانی و دختۆر شێرۆ و جیرانەکانیدی سەریان لێدەدام و دریان دەدامەوە، دوعای خێریان لۆ دەکردم و داوایان لە خوای گەورە دەکرد سەبرو ئارامیم پێببەخشی.
شەوەکی پاش نوێژی عیشایێ بە دختۆر شێرۆم گۆ: لۆ لەگەرم نایێی بچینە سەر قەبری هەورینی؟ گۆتی: بەو شەوەی خەتەر نییە؟ گۆتم: تەئکیدم ئێستا کەسی لێنییە، قابیلە ئەو جاشانە بەو شەوەی لەوێبن! گۆتی: ڕاست دەکەی، یاڵلا با بڕۆین، گۆتم: چەکت هەیە؟ گۆتی: کلاشینکۆفەکم هەیە، گۆتم: دەبڕۆ بینە، ئەمنیش دەبانچەم پێیە، نەوەک خوانەخواستە شتەک ببی، با بتانین بەرگری لەخۆمان بکەین، گۆتی: زۆر باشە، شێرۆ چۆوە ژۆرێ و هەندەی پێنەچوو کلاشینکۆفەکەی هینا، سواری تڕومبێلی بووین و بەڕێکەتین لۆ سەر قەبران.
چووینە ناو قەبرستانی و گۆتم: پێدەزانی؟ گۆتی: بەرێ، گۆتم: مادام لە تەنیشت داک و بابیبی ئەمنیش پێدەزانم، بەینەکی ڕۆیشتین و دیتمانەوە، لە تڕومبێلی هاتینە خوارێ و نێزیک بووینەوە لە قەبرەکان، شێرۆ دەستی لۆ قەبری هەورینی درێژکردو گۆتی: ئەوە هەوە، قەبرەکە هێشتا کێلی لۆ نەکرابوو، بلۆکیان لەوسەر و ئەو سەری دانابوو، چوومە سەر قەبرەکەیی و لای سەری دانیشتم و بە چاوی پڕ لە فرمێسکەوە گۆتم: هەورین، هەورین! شێرۆ لۆ ئەوەی وەزعەکەی بگۆڕی گۆتی: الفاتحە! ئیدی دەستم بە فاتیحەی کردو لە نیوەی پێم تەواو نەکراو لە هۆڕژنی گریانێمداو خۆم بەسەر قەبرەکەی دادا، شێرۆش خۆی پێنەگیراو وەکی من دەستی بەگریانێکرد، هەردووکمان هەتا فرمێسکمان لە چاوی دابوو گریاین، چەندی گازمکرد: هەورین کچێ هەورین، ئەوە ئەمنم پرتەقار، دە وەرامم بدەوە، هیچ نەبوو، نە دەنگی هەبوو نە هەست، گۆتم: ئای هەورین، چ ژیانەکی پڕ خەمت بەڕێکرد، چ خەمەکت لۆمن بەجوێهێشت، ئای هەورین، ئەوجە کێ گازم بکا بە پرتەقار! ئەوجە درم بەچی ئەو دنیایەی خۆشکەم، ئای هەورین برینی دابڕانت چەند قۆرە، ئای هەورین کوو مارت وێرانکردم! دختۆر شێرۆ قۆری گرتم و گۆتی: سڵاوەتەکی لێدەو ناوی خوای بینە، دوعای لۆبکە خوای گەورە ڕەحمی پێبکاو لێی خۆشبی و ئیشاڵلا لەو دنیای پێکدەگەنەوە! لەگەر ئەو قسەی دختۆر شێرۆی بڕەک هاتمەوە سەرەخۆو قورئانەکەی گیرفانم دەریناو دامە بەر ڕۆناکی لایتەکەی تڕومبێلی دەستم بە خیندنی کرد، دەوری نیو سعاتی قورئانم خیندو دختۆر شێرۆ گۆتی: دەوجە با هەستین بڕۆین، بەینەکی باش تەماشا قەبرەکەیم کردو پێشی هەستم چەنگە خۆرەکی سەر قەبرەکەیم هەرگرت و لە گیرفانم ناو هەستامەوە بە چاوی پڕ لە گریان فاتیحەکیدیم خیندو داهاتمەوە دوو سێ جار قەبرەکەم ماچکردو خواحافیزیم لێکردو ڕۆیشتین.
گەیشتینەوە لای مارێ دیتم داکم و بابم لە پێش دەرکەینەو زۆر بە مشەوەشی ڕاوەستاینە، وەکی چاویان بەمە کەت بڕەک هاتنەوە سەرەخۆ، داکم گۆتی: ئەوە بەو وەزعە ناخۆشەی کێوە چووبووی؟ گۆتم: وەڵلا لەگەر دختۆر شێرۆی ئیشەکمان هەبوو، بابم گۆتی: ئیشتان هەبوو یان چووبوونە سەر قەبری هەورینی؟ فرمێسک لە چاوم هاتە خوارێ و گۆتم: ئەرێوەڵڵا چووبووینە سەر قەبری هەورینی، گۆتی: کورە کوڕم زۆرت ئاگا لەخۆبی، با ئەو دڕندانە زەڕبەکت لێنەدەن و نەتکوژن! گۆتم: بابە، ئەوجە پاشی مردنی هەورینی ئەمن ژیانم لۆچیە!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!