شاعېرێ شوڕشگېڕ، ئازادیواز، عینایەت کوڕو هیدایەتی پاوەیین. سەرەتاو ژیوایش وەردەسو تاتەیشەنە دەسش بە وانای کەردەن، دمایی جە حوجرەکاو خانەقاکاو (بیارۍ) و (سنە)ی وانایش تەمامنان. عینایەتی شاېرو شوڕشگېڕ بە هوکارو پەشتگیری کەردەی بەگزادەکا هۆرامانی و جوانڕۊی،ماوەو(10)دە ساڵا جە ئەسفەهان زیڼانی بیەن.
ئاغای عینایەتی هەڵای ئەوەڵو عومریش بیەن کە سایەو ئەڎاو تاتەیش سەرۆ نەمەنەن، ئاڎ بە زارۊڵەیی هەتیم کەوتەن، پەوکەی بۍ پەروا لوانەنە چېرو گرد زەحمەتیەکان و ژیوای، جە شېعرێنە پەیمان باس کەرۊن و ماچۊ:
هېمای نەفامام، هەوای گەرم و سەرد
داخڵ وە فیرقەی بەدبەختانم کەرد
فرسەتش نەدام، بزانوون دەردان
جە ئەداو بابۆ، مەحروومش کەردان
نامدار، پیێوە پیایانە، خاوەن یانەو مېمان، سفرەو خوان، ئازایی، سوارچاک، تفەنگچی.
ئاغای عینایەتی دمای هەشت ساڵا زیڼانی، گرفتارەن و دەسش نمەیاۊو هیچ یاگێ. ئاڎ زیڼانەنە تەنیا دۊسش(شەماڵەن). مەگنۊ گفتوگۊ چەنیش و حاڵو وەزعو وېش پەیش بەیان کەرۊن. دماتەر پېسە پەیکێ شارەزای داواش وەنەمەکەرۊن پېسە فریادڕەسێ پەی ئەرزوحاڵ یاونایش پەی لاو دوسو ڕەفېقاش.
یەک ڕۊ نیشتەبېم نە گۊشەی زیندان
ڕەنگ زەردو زایېف، تەن لوخت عوریان
دڵ پەڕ نە زوخاو دەردی نیهانی
سەر نیام وە بان کاسەی زرانی
دەس کەمەند کەردم، نە دەوری زانوو
نە دەریای بۍ پەی هەر باڵ مەشانوو
قامەت خەمیدە لوول وەردەن وە هەم
تاویای بۊتەی هەتیتەی ستەم
بۍ قەدرو قیمەت، بۍ یار، بۍ یاوەر
کەسیف و موحتاج، مەبغووزی نەزەر
ڕەنگم چوون خەزان پایېزان زەردەن
سەرتاپای تەنم ئالوودەی دەردەن
هەر دەردەن مەدۊم وە ڕووی زەمیندا
هەر ڕۊ دەردێ تەر ها نە کەمیندا
یەک دەم ئاسایېش پەیمان نەمەندەن
هەر ساتێ سەڎ جۊر گیان لېمان سەندەن
هەشت ساڵەن وەی تەور، نەی زیندانی تار
گرفتاری دەس زاڵم و ئەغیار
شەماڵ فیدات بام گرانەن دەردم
فەریاد ڕەسی کەر، وەرنە ها مەردم
شەماڵ ئامانەن مەدارا مەکەر
ڕاگەی ویلایەت بگېرە نە وەر
یاخوڎا وېران بۊ ئەسفەهان تەمام
بییەن وە دۊزەخ ئېمە، خاس و عام
دماتەر هەر بە شەماڵی ماچۊ:
ئامانەن شەماڵ نە ویرت نەشۊ
کافیەن وەسەن، ڕەحمش بجۊشۊ
دمای عەرزوحاڵ ئەوجا نیگا کەر
چەپ و ڕاس یەکسەر باوەر وە نەزەر
تەمام دیارەن کوساران جە دوور
داڵەهو، بەمۊ، دەشتی شارەزوور
هەورامان، پاوە، وە ئاتەشگاوە
شمشېرو سەریاس، قشڵاخ تا شاوە
شەماڵ بوویەرە، دەردی دڵ بېشەن
ئەر شاه، ئەر وەزیر، ئەگەر دەروېشەن
جوانڕو وەشەن، بېهتەر وڵاتەن
شەماڵ دەیلەن، گیانم فیداتەن
مەکان وە مەکان، بگېڵە پېشدا
یاگەی کۍ بیەن، کۍ گېڵۊ تېشدا
چەشمە و سەراوان، یەک یەک بگېڵە
گشت یاگەی خانان، مەنزڵگای خېڵە
ئاخېز کەر پەرێ دەشتی هەسێران
پەی سەیری کاوات، یاگەی ئەمیران
نیگا کەر کاوات، ئاوش چەن سەردەن
گرەوش نە ئاو، گرد دنیا بەردەن
دما بەیتەنە بە شاماڵی ماچۊ سەرێ بڎە یانەکەو من، بزانە کۍ مەنەن، یانەو کۍ بیەن، ئیسە کېش چەنەن؟
سەر بکېش ئەوجار، بزانە کۍ مەنەن
یاگەی کۍ بیەن، ئیسە کېش چەنەن؟.
ئاغای عینایەتی جە زیڼانەنە بە موناجاتێ درېژ مەلاڵیۊوە خوڎای پەی ڕزگار بیەیش، چن بەیتێ جە موناجاتەکەیش:
بە پایەی بڵند پېغەمبەران گشت
بە چەشمەی کەوسەر، بە ڕەوزەی بەهەشت
بە سیدقی سدیق، بە عەدلی عومەر
بە شەرمی عوسمان، بە بازووی حەیدەر
بە ناڵەی مەستان سووب سەحەرگاهی
سەرشارەن وە جام، بادەی ئیلاهی
بە سیڕڕی سینەی سافی سوفیان
مەوانان تەوحید، نە ڕاگەی نیهان
بە ئەندوی عوششاق، یانەی دەروون ڕېش
بە عیشوەی شوخان، ڕیشەی جگەر کېش
بە کەریمی وېت، کەرەم فراوان
دەلیلی خەیرێ، بکەری ڕەوان
خالق وە زاتت غەیر جە لوتفی وېت
ڕای ئومېد قەتعەن، مەخفی نیەن لېت
یا ڕەب بۊ بە عەشق خاسان دەرگات
غەریب و بۍ کەس، دوور کەفتەی وڵات
مەزڵوومی ئېمە، جە حەد ویەردەن
ئیحیامان کەرە، هەناسەم سەردەن
عینایەت فەردت، کول موناجاتەن
سەر تا وە پایېن، دوعای حاجاتەن.
ئارەزووم ئېدەن یا حەیی داوەر
نەی زیندانی سەخت، باوەریم وە بەر.
[1][2]