محسن عەبدلڕەحمان
ب هندەک سالۆخەتێن جەستەی و گیانی مرۆڤ وەکهەڤن، لێ وەکو پەنچەمورێ ژ ئالیێ دی ژێکجودانە، هەروەسا د ئاستێ دیتن و تێگەهشتن و هزرکرنێ دا مرۆڤ جیاوازن، وەکو کرمی ژیێ خوە هەمی خوە دخشینیت، لێ کرمۆک خوە دخشینیت و ل دوماهیێ دبیتە پەلاتینکەکا جوان و بلند دفریت! ئەڤە من ژ مام نادرێ گەهوەری زانی، ئه و دەستپێکا سالا من یا ئێکێ و یا وی یا داویێ بوو، یێ چاڤەڕێی بڕیارا خانەنشینکرنێ بوو، وێ شەڤا زڤستانییا سڕێ دنیا کرییە بەستیگرەکا گەردوونی، د دەرگەهی دا راوەستیا هەچکو تشتەکی بێهن دکەت یان دەنگەک دوور دبهیسیت، بەری هەڤال گازیکەنێ مام نادر(دەرگەهی بگرە)، ل تەنیشت راوەستیام، بەرێ وی ل چیایێ ژ بەفرێ هوونی، بێی ل من بزڤڕیت، چەند لبێن مێویژان کرنە د پەحنکا دەستێ من دا و گۆت: ئەز ل ژیێ تە و نها بووم د شەڤەکا ژ ڤێ سارتر دا، د نۆبەیا زێرەڤانیێ دا هەچکو ئەز د بورجەکا کەلا دمدم دا، ژ شانازیێ هەموو هەستێن من دگەل تڤەنگێ د ئێکگرتی بوون، لبەکا مێویژێ د ناڤ تبلێن خوە دا بادا (و ب تبلێن بەران، شەهدێ و ناڤیچێ من پەرچقاند، دۆپا وێ من د سمبێلێن خوە دا و ئەڤراز بادان)!
– چ.. تە مویوێژ د سمبێلێن خوە دا!؟
– ئەز نادرێ گەهوەرێ یێ ئێکانەبووم، ژ زیرەکیێ دگۆتنە من ئێکانە، ئانکو نێرێ بەرازی، سێڤێ خویشکا هەشت برا و لەشکرەکێ پسمامان، نە دانە من، ئێڤارییەکێ ل رێیا ئاقاری پارزینێ وێ ل سەر کەڤری و ئه و ل سەر ملێ خوە من دانا..
– ئانکو تە رەڤاند؟
هۆسا ژ رێنچبەری بۆ مە زڕتەکێ ئاغایی ب رۆژ و ب شەڤ زێرەڤانێ مالا وی، سال د بۆرین و ئەز رژدتر دبووم، تاکو ژ زیرەکی و هەم ژ دلسۆزی بوومە جهێ باوەری و متمانەیا ئاغای.
– مام نادر.. ب راست تو رەشەکێ ئاغای بووی، پا چاوا بوویە پاسەوانێ فەرمانبەریێ!؟
– د شەڤەکا ساهییا ژ ڤێ سارتر دا وەکو گۆرگی یێ هشیاربووم، شەڤ یا درێژ و هەر تشتێ بێدەنگ بوو، من مێویژەک پەرچقاند و د سمبێلێن خوە ددا، دەنگێ ئاغای هات ئەوێ دگۆتە کۆڕێن خوە: بابو گوهێ هەوە ل دەنگێ سا بیت، هەکە ژ دوور هات، بکەڤنە پێشییا زەلاما و هەرەن نەترسن، لێ هەکە دەنگێ سا ژ نێزیک هات ناڤ د رەشەک و خۆلامان بدەن؛ و بدەن پێشییا خوە!
گۆهشیم و د ناخێ خوە دا من گۆتێ: هەی سەیێ گۆڕێ وی سەی، ژنا من رەڤاندی و زارۆکان بهێلمە د کۆلکی ڤە و زێرەڤانیێ ل تە و ژنا تە بگرم، هەی قەدا ب من بکەڤن، من دەستا بەفرێ و د سمبێلێن خوە هۆسی تاکو چڕاتییا مێویژێ بەردای، سپێدێ من تڤەنگ دانا و گۆتە ئاغای، ئەڤە ئەز چووم و هێش ئەزێ دچم![1]