دیدار، شاکر ئەتروشی:
مەسعود خالد گولی، سەرنڤیسەرێ کۆفارە سڤۆرە، کو ئەڤە ماوەکێ کێمە ئه و پوست وەرگرتی، د دیدارەکا تایبەت دا ل گەل ڕۆژناما ئەڤرۆ ئاشکر کو کو ئێک ژ ئاریشێن هەرە مەزنێن وان نەبوونا چو میکانیزمێن گونجایە بۆ بەلاڤکرنا کۆفارێ و ب گۆتنا وی بەرێ و نوکە ژی وەک پێدڤی کۆفار نەگەهشتیە هەموو جهان، لەورا هندەک جاران هزر ا داخستنا وێ ژی هاتیە کرن، دەربارەی ڤەکرنا کەنالەکێ تەلەفزیۆنی یێ تایبەت ب زارۆیان ڤە ب ناڤێ (کەنالێ سڤۆرە یێ زارۆیان) کو گرێداری کۆڤارا وان بیت، گۆت: بۆ ڤەکرنا کەنالەکێ وەسا جه و ئامیرە و ستاف و مەزاختیەکێ زۆر پێ دڤێت، لەورا دڤی دەمی دا دێ یا ب زەحمەت بیت،، لێ چێدبیت دەمێ زەمینە خوەش دبیت، جڤاتا ناڤەندێ ب هەڤکارییا تەلەڤزیۆنا دهۆک و کۆڤارا سڤۆرە پێکڤە بشێن ڤێ بزاڤێ بکەنە ڕاستی.
ئەڤرۆ: پشتی تۆ بوویە سەرنڤیسەر، پلانا هەوە چیە بۆ پێشخستنا کۆڤارێ د هەر وارەکی دا؟
پێشخستنا کۆڤارا مە دەرگەهەکێ ب تنێ ب خوە ڤە ناگرت، چونکو د سالێن بۆری دا، د گەلەک واران دا کۆڤارا مە ڤە مابوو، و پترییا ڤێ ڤەمانێ ژی پەیوەندی ب ڕەوشا نالەبارا سیاسی و ئابووری و ساخلەمییا وەلاتێ مە ڤە هەبوو، کو خراب بوونا ڤێ ڕەوشێ، مە بڤێت نەڤێت کاریگەری ل سەر هەموو وارێن ژیانا هاولاتیێن مە کربوو، ئەم ژی وەک کۆڤار ژ ڤێ کاریگەریێ بێ بەهر نەبووین. لێ نوکە وارێن کو مە ل بەرە هەولا پێشخستنا وان بدەین، دێ ئەڤێن خوارێ بن:
د وارێ هزری ڤە: مە پەیوەندییێن مەیدانی ب هندەک دەروونناس و مامۆستا و نڤیسەر و خەمخۆرێن وارێن زارۆیان، هەروەسا هندەک ڕێکخراوێن کو گرنگیێ ددەنە پاراستن و گەشەکرنا زارۆیان، کرینە، ئه و ب زارەکی یان ب نڤیسین، هاریکار و ڕێنیشاندەرێن مە بووینە بۆ بکارئینانا دروستترین سەرەدەری ل گەل ڤێ توێژا نازک و دارشتنا هێژاترین نڤیسین کو ل گەل هزر و تەمەنێن جودا جودا یێن زارۆک و خواندەڤانێن کۆڤارا مە بگونجت.
د وارێ نڤیسینێ دا: هەتا بەری نوکە کەسێن کو بۆ کۆڤارا مە دنڤیسین، پتریا وان نڤیسەرێن گەنجێن سنورێ پارێزگەها دهۆکێ بوون، لێ نوکە ژ لایەکی ڤە مە پەیوەندی ب نڤیسەرێن باژێرێن دی یێن هەرێمێ، هەروەسا یێن پارچێن دی یێن کوردستانێ ژی کریە و ژ لایەک دیڤە ستافێ نوو یێ کۆڤارێ ژی خودان هزرێن هێژا و قەلەمێن تازەنەفەسن، ب باوەرا مە ئەڤە دێ وە کەت کو بابەتێن جۆراو جۆرتر و بژارەتر د کۆڤارێ دا بهێنە وەشاندن.
د وارێ هونەری دا: مە دیزاینا کۆڤارێ ژ ڕه و ڕیشال یا گۆهارتی و ئەڤ دیزاینە د هەموو هژمارێن داهاتی دا دێ بەردەوام بت. هەروەسا دێ د ئایندەی دا هەول دەین پتریا نیگارێن کۆڤارێ ژ بەرهەمێ نیگارکێشێ مە بخوە بن و کێمتر ژ کۆڤارێن بیانی و ئینتەرنێتێ مفای وەربگرین.
ئەڤرۆ: هەوە بەحسێ نڤیسینێ کر، ئەرێ ب دیتنا هەوە، هوون چاوا دبینن، زارۆک بۆ زارۆکی بنڤیست یان مەزن بۆ زارۆکی بنڤیست، و هون ل کۆڤارا خوە گرنگیێ ددەنە کیژک ژ وان؟
مسۆگەر زارۆکی هندی نڤیسەرێن ب تەمەن، پاشخانا هزری و زانستی و ئەدەبی نینە، کو بشێت بۆ هەڤتەمەنێن خوە بنڤیست، لێ ئەڤە نائێتە وێ واتایێ کو نابت ئه و بنڤیست، مە د ڤی واری دا، ل کۆڤارا خوە سێ دەرگەه یێن ڤەکرین. دەرگەهێ ئێکێ کو پتر ژ نیڤا لاپەرێن کۆڤارێ یێن بخوەڤە گرتین، مەزن بۆ زارۆکی دنڤیسن، دەرگەهێ دویێ ژی شەش لاپەر مە یێن تەرخان کرین بۆ بزاڤێن زارۆیان بخوە، دا بشێن بەرهەمێن خوە یێن ئەدەبی و هونەری تێدا بەرچاڤ بکەن، و مە ئەڤ دەرگەهە یێ بۆ وان ڤەکری وەک پشتەڤانییەک بۆ وان دا بشێن ل پاشەرۆژێ ببنە هونەرمەند یان نڤیسەرێن هەژی، لێ د ڤی دەرگەهی دا ژی ئەم بژارەترین بەرهەمێن وان هەلدبژێرین و مایێ خوە د هزر و بۆچوونێن وان ناکەین، لێ ژ لایێ ڕێنڤیسێ ڤە، هەکە وان شاشی کربن ئەم بۆ وان پەیڤێن وان ڕاستڤە دکەین و ژنوو بەلاڤ دکەین. هەروەسا دەرگەهێ سێیێ ژی مە بۆ بێهنڤەدان و دلخوەشکرنا زارۆیان یێ تەرخان کری، کو ئه و ژی شەش لاپەران بخوەڤە دگرت، و هندەک ژ ڤان شەش لاپەران، بۆ نموونە گۆشا گڕنژین ژ لایێ زارۆیان بخوەڤە دهێتە بەرهەڤکرن و هندەک ژ ڤان شەش لاپەران ژی ژ لایێ مەزنان ڤە دهێنە ئامادەکرن.
ئەڤرۆ: ئەرێ وە د وارێ بەلاڤکرنا کۆڤارێ دا ئاریشە هەبوون؟
بەلێ بێگومان، بەرێ و نوکە ژی، مەزنترین ئاریشا مە بەلاڤکرنا کۆڤارێ یە، و ب ڕاستی بەری نوکە ئەڤ ئاریشەیە هند مەزن بوو کو هندەک جاران هزر ل دائێخستنا کۆڤارێ دهاتە کرن. ئاریشە ئەوە کو بەلاڤکەرێن مە دشیان و دشێن کۆڤارێ بگەهیننە پرتووکخانەیان، لێ زارۆک ناچنە بازارێ پرتووکفرۆشان و پترییا دایک و بابێن وان ژی، وان نابەنە پرتووکخانەیان دا بۆ خوە پرتووک و کۆڤارا بکڕن، دیسان ئه و دشیان و دشێن کۆڤارێ ببەنە مارکێتان، لێ پترییا مارکێتان ب بهانەیێن جۆراوجۆر کۆڤار ژێ وەرنەدگرتن و وەرناگرن، ئه و دشیان و دشێن کۆڤارێ بگەهیننە کتەکا گەلەک کێم ژ قوتابخانەیان، و بۆ ڤێ مەبەستێ ڕێڤەبەرییا پەروەردێ هاریکار نەبوویە و نوکە ژی هێژ چ هیڤی نینن کو ئه و د هاریکار بن، هەروەسا گەهاندنا کۆڤاران بۆ باژێر و باژیرکێن دی یێن هەرێمێ ب زەحمەت بوو و نوکە ژی ب زەحمەتە، چونکی تێچوویێ گەهاندنێ ژ مفایێ کۆڤارێ پترە.
ئەڤرۆ: پا نوکە وە چ هەول داینە بۆ باشترکرنا ڕەوشا بەلاڤکرنا کۆڤارا خوە؟
نوکە مە هندەک سەرەدانێن مەیدانی یێن بۆ قەزا و ناحیێن سەر ب پارێزگەها دهۆکێ ڤە کرین و ئەم ل گەل هندەک پرتووکخانەیان یێن ڕێکەفتین، کو ئەم ب هەڤڕا کۆڤارا سڤۆرە بگەهینینە سنۆرەکێ بەرفرەهتر، و دێ ئەڤ هەولە د بەردەوام بن دا خواندەڤان و پشکدارێن مە زێدەتر لێ بهێن، هەروەسا ژبەرکو نوکە بینەر و خواندەڤانێن سۆشیال میدیایێ ژی یێن گەلەک زێدە بووین، مە ژی هەم وەک ناڤەندا خانی و هەم وەک کۆڤارا سڤۆرە پەیچ و سایتێن تایبەت ب خوە یێن ڤەکرین و ئەم کۆڤارا خوە تێدا دوەشینین، هەرچەندە ئەڤ پێنگاڤە یا نوویە، لێ ڕۆژ بۆ ڕۆژێ بینەر و خواندەڤانێن مە ل سۆشیال میدیایێ ژی یێ زێدە دبن.
هەژی گۆتنێ یە کو پتریا خواندەڤانێن کۆڤارا مە ل بەرێ و نوکە ژی، قوتابیێن هێژا بووینە، لێ مخابن ژ بەر ڕەوشا ساخلەمیێ و هاتنا کۆرۆنایێ، و گرتنا دەرگەهێن قوتابخانەیان، و هەتا ڕادەکێ خەمسارییا مە و بەلاڤکەرێن مە، ئەم نەشیاین هژمارەکا بەرفرەه ژ کۆڤارا خوە چاپ و بەلاڤ بکەین، لێ سەرەرایی بەلاڤکرنا وێ د سایتی دا، ئەم دیسان ئەم یێ هەول ددەین کو هەیڤ بۆ هەیڤێ تیراژێ کۆفارێ زێدەتر لێ بکەین، و ئەڤە ژی گرێدایە ب باشبوونا ڕەوشا ساخلەمیێ، هەروەسا بەندە ب وان ل هەڤهاتنان یێن کو ئەم ل گەل پەرتووکخانە و پەروەردێ و فرۆشگەهێن قوتابخانەیان دکەین.
ئەڤرۆ: ئەرێ د هزرا وە دا هەیە کو کۆڤارا سڤۆرە بکەنە نیڤ هەیڤانە، ئانکو هەر پازدە ڕۆژان جارەکێ دەرکەڤیت؟
هەکە ئەم د گەلێک ڕاستگۆ بین، ب وێ کەفتن یان ب وێ ئێخاندنا کو مە و گەلەک ژ سازیێن ڕاگەهاندنێ یێن دەڤەرا بەهدینان دیتین، بۆ ڤێ دەلیڤێ ب زۆر ئەم بشێین د وارێ ئاماژەپێکریێن سەری دا، هەولا ڕابوون و پێشڤەچوونێ بدەین، لێ بۆ پاشەرۆژێ، وەکو دبێژن هەکە دنیا ببتە شاما شەریف، ئارەزوویێن مە ژی ژ پازدە ڕۆژ و حەفتییانەکرنێ هێژ وێڤەترن. بۆ نموونە مە پرۆژەکێ چاپکرنا کۆڤارێن زارۆیان هەبوو، و مە بیست پرتووک چاپ کربوون، لێ پشتی هاتنا داعش، ئەڤ پرۆژە یێ ڕاوەستیای، له و ب بۆچوونا مە، شوونا ئەم کۆڤارێ بکەینە پازدە ڕۆژان جارەکێ، ئەم دێ پرۆژێ خوە یێ چاپکرنا پرتووکان ڤەژینینەڤە.
ئەڤرۆ: ل دەمەکی هندەک بزاڤ هەبوون کو کەنالەکێ زارۆیان یێ گرێدای ب کۆڤارا سڤۆرە ڤە هاتبا ڤەکرن، ئەرێ چ لێ هات؟
کۆڤارا سڤۆرە ئۆرگانەکا ناڤەندا خانی یا ڕەوشەنبیری و ڕاگەهاندنێ یە، و د دەستهەلاتێن کۆڤارێ دا نینە ئۆرگانەکا دی ڤەکەت، لێ هزرەکا وەسا هەبوو کو ناڤەندا خانی ئۆرگانەکا دی (مەرەمامە کەنالەکێ دی یێ زارۆیان) ڤەکەت، لێ د ڤی ماوەی دا ناڤەندا خانی ب باشتر زانی (کەنالەکێ وەرزشی) و (وەشانخانەیەکا پرتووکان) هەروەسا (ئاژانسا خانی یا دەنگوباسان) ڤەکەت، و هەرچەندە هێژ چ پێنگاڤ بۆ ڤەکرنا کەنالەکێ زارۆیان نەهاتیە هاڤێتن؛ چونکی ڤەکرنا وی کەنالی ژی، جه و ئامیر و ستاف و مەزاختییەکێ زێدە پێ دڤێت، لێ چێدبیت دەمێ زەمینە خوەش دبیت، جڤاتا ناڤەندێ ب هەڤکارییا تەلەڤزیۆنا دهۆک و کۆڤارا سڤۆرە پێکڤە بشێن ڤێ بزاڤێ بکەنە ڕاستی.[1]