یارێ مە پوڕ نیشان و سوڕ، سیما ژ دوڕ دێم کەوکەبە
ئەو لەب شەکەر نازک بەشەر، جەبهەت سەحەر کاکول شەبە
شەب کاکولە خال فلفلە، چین سونبولە داڤا دلە
من غەفلەتێ دی قبلەتێ، وەک ماه د تیسا غەبغەبە
من دی ب خەف سوحبەت ب دەف، شاهێ ب خەف فنجان د کەف
نوونێن ژ یەنگ بەردان خەدەنگ، وێ پوڕ ژ تەنگ شیرین لەبە
دئانی زوهوور دێمێ ب نوور، خالێن د هوور جاما تەهوور
ساقی وەرین جاما زەرین، ئەو سوڕ شرین جام مەشرەبە
خال و خەتێ شۆخ قامەتێ، مە ژ ڤێ کتێب و دەستخەتێ
هەردەم ژ نەو دل فەیزە ئەو، ئەڤ عشق و سەودا مەزهەبە
من بێ قەدار ئەڤ سڕ ڤەشار، عشقا غەدار سوهتی ستار
مهرا بوتان خال و خەتان، سەندووقە جان و مەقلەبە
دێمێ ب خال ئەو نوون و دال، ئسمێ جەلال بەژنا شەپال
یەکتا ئەلف نایێ وەسف، من عەقلێ تفلێ مەزهەبە
حەتتا نەمام سالک تەمام، شیرین کەلام ما دا مە جام
بێ جەهد قەت تێن ئەمر و خەت، هەر چ کو مەتلەب مەنسەبە
دەرماندەییم حەیران تەییم، پیرانەییم خوەش بەندەییم
زازا ب سڕ دل ژێم ڤەکر، دەرحەق مە پڕ ئەرزان مەبە
بەرگێن گولێ ئەو مسکە لێ، هوور هوور وەلێ دەرحەق مەلێ
بێ پەردە و خوەش مەعدە و، یەک وەعدە و پوڕ شەفقە بە
#مەلای جزیری# [1]