پێغەمبەر لە جێ هەستا مەلەک لە پێشی وەستان
بوڕاق و بەیداغ لەوێ لە کنی حازر بوون عەیان
هاتە سەفی مەحشەرێ بە تەرتیب و بە ئەرکان
ئایەتی، (لا تقنطوا) دەگەڵ سوورەی (الرحمان)
دەیخوێند بە دەنگی بڵیند دەیدا لە داد و فوغان
ئوممەتم گونەهکاران، غەرق بوون لە عیسیان
خودا ڕۆژی ئەزەلێ بە مەیدا عەهد و پەیمان
ئوممەتی من ببەخشێ، قەتعەن نەبێ چ نوقسان
ئەمنیش حەق پێغەمبەرم، دەیفەرموو حەیی سوبحان
ئەی حەبیبم محەممەد دڵت نەبێ پەریشان
لیوای ئەحمەدی بە دەس بگرە، بڕۆ بە ئاسان
لەسەر پردی سیڕاتێ دەگەڵ هەموو ئوممەتان
(محەممەد) ساکین دەبوو، دڵی خۆش بوو لە غەمان
وەپێش ئوممەتێ دەکەوت بە دڵێکی شادمان
لە سیڕاتی دەچنە دەر ژن و پیاو لەگەڵ ئینسان
بەحرێکی گەورە لەوێ پێی دەڵێن (هند الحیوان)
مەلەی دەکەن هەموو کەس، هەموویان دەبن جەوان
مەلاییک دێن ئەو دەمی موژدەی دەبەن بۆ حۆریان
ئەو حۆری دە نازەنین دێن لە تەڵەبی میوان
هەموو دەفتەریان هەیە، فڵانی کوڕی فڵان
ماشەڵڵا زۆر عەجاییب شادن لە باغی گوڵان
داخڵی بەهەشت دەبن دڵ بە زیکر و لێو خەندان
ئەو بەهەشتی دە ڕەنگین، ئەو بەهەشتی خۆش و جوان
جێگەی شادیی دڵانە، پڕە لە حوور و غیلمان
دەکەن حەمەد و سەنایی خالیقی حەیی مەننان
داییم لە کەیف و خۆشی و سەیر و سەفایی جەننەت
خواردنیان لێ کەم نابێ، زۆرە تەعام و نیعمەت
ئەنواعی میوەجاتیان بۆ دێتە پێش بێ میننەت
بۆ هەمووی گۆشتی تەیران دێتە پێشێ بێ موددەت
دەکەن سەیر و سەفایە دڵیان نابینێ میحنەت
چوار جۆگەی تێدا جاری حەوزی کەوسەری مەشهوور
بەحری (تَحتِهِ الأنهار)ی شیرین (شراباً طهور)
لاکین بە میسلی پادشا ساحێبی قەسر و قسوور
غەرقی ئەنعامی کەڕەم سوحبەت دەکەن لە حزوور
تاریکایی نابینن چونکە ڕووناکن لە نوور
نەخۆشی و مردن نابێ، بەدەنیان ساغ وەک بلوور
جار جارە دەنگیان بۆ دێ، نیدایی حەیی غەفوور
ئەسسەلام یا عەبدینە موژدە لەنگۆ بێ و سروور
قەت هیچ کەس لێو ناستێنێ ئەو بەهەشتی کەسک و سوور
بەو موژدە دڵخۆش دەبن، دڵیان پڕ دەبێ لە نوور
بەهەشتم دە ڕەنگینە خۆش بکەن تەماشایە
بۆنگۆ دەکەم زیافەت لە بن داری تۆبایە
تەخت و سەندەڵی و کورسی شۆقیان وەکوو چرایە
پاکی ڕیز دەکرێ لەوێ، حۆری دەکەن سەمایە
هەموو مەخلووق کۆ دەبن دەکەن حەمد و سەنایە
چی لە سیڕات کەوتە خوار ئەو ئوممەتی گونەهکار
(و قنا عذاب النار) خالیق هەر بە تۆم هاوار
هێندێک موعەللەق دەڕۆن تا هەزار ساڵ بێ ئەژمار
بۆ عەزابی جەهەننەم زۆر ئەسیر و گرفتار
وەکوو گۆشتی قەسسابی لە قوللاب دەدرێ ئەوجار
گۆشتی نەرمی جەندەکی پاک دەخوا دووپشک و مار
ئێسکی ڕەقی دەمێنێ کار و پیشەی ئاه و زار
مردنی زۆر پێ خۆشە ئەمما نامرێ ناچار
بە زبان تێی دەخوڕێ، نرکەی وەک هەوری بەهار
گۆشتی ئەعزای وی دیسان دروست دەکرێ بە پەرگار
ئەوجار دەڵێ تۆبەمە ئەو عەبدی بەدبەختی شووم
هەناوم پاک سووتاوە، زوو ئاوێ بێنە لەبووم
خێرا ئاوی بۆ دێنن ئەو لە زەریح و زەقووم
وەک دەیخوا پاک دەسووتێ نێوزگ و جەرگ و حەلقووم
----------
بەحسی عەزابی زۆرە نایەتە بەحس و بەیان
ئومێدن هەر خودایە، هەم ڕەحیم و هەم ڕەحمان
(ئەحمەدی کۆر)ی فەقیر زۆر عاجزە و ناتەوان
----------
پەنا و ڕەحمەتن ئەتۆی یا حەننان و یا مەننان
#ئەحمەدی کۆر# [1]