وەلی دېوانە
چراغم نە سەر، چراغم نە سەر
هەر من نیم سەودای عەشق تۊ نە سەر
قیبلەم گشت عاڵەم جە من زېیادتەر
نە سەودای عەشقت وېڵەن دەربەدەر
وە هەر جا مەشۊن هەر باس تۊ بۍ
هەر کەس دیم نە فېکر هەراس تۊ بۍ
نامت نە دەفتەر دڵبەران تاجەن
شاهان حەسرەتمەند، گەدا موحتاجەن
چەن موسڵمانت وەناحەق کوشتەن
نیگات نە جەرگ چەند بېدڵ نیشتەن
چەند موڕشید شەیدا، چەند سۊفییان مات
ماتن نە سەودای عەشقت گشت خېڵات
(فەقی)ت ڕسوا کەرد، (مەڵا) سەرگەردان
(دەروېش) دڵڕېش وېڵەن نە هەردان
پەروانە دەستۇر بوڵبوڵ شەیداتەن
دڵەی دەردەدار هەر نە سەوداتەن
قیبلەم چۇن تەسویر تەرسای جام جەمین
شېخی (سەنعان)ت وەرگەڕان جە دین
خوداوەند ئەو ڕۊ حوسنێ وە تۊ دا
سۊفییان ساف گشت دا وە کۊدا
جە چەمەن هەی داد، نە سەحرا هەی ڕۊ
داد و بېدادەن گرد نە دەسی تۊ
نە خېڵان غەوغا، نە شاران شۊرەن
هەر کەس دیم هەر دیم تۊشەش زەرۇرەن
ئەر فەرهاد ئەر قەیس بزانان خەبەر
دۇبارە جە خاک (ئەڵحەد) مەدان سەر
مەیۊن وەی غەوغای قېیامەتەوە
وە سەیر باغچەی ئیقامەتەوە
تاکە زندەنان شای شەم جەمینم
دېوانە و غەمبار دڵ ماتەمینم
[1]