باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و وېس و حۆتەمە
دمای یاونای پېخامەکەیش بە محەمەدی(ص)، جوبرەئیل دەسودیمش گېرت و دوۍ ڕکاتۍ نماش چەنی محەمەدی کەردە، پەی فېربېیەی گرنگتەرین بنەماکاو ئیسلامی کە نمانە.
باز هەم واقیع بیی تەغییری حاڵەت
سەروەر و شاڎی و عەجز و مەڵاڵەت
ئاخر، جوبرەئیل، چوون شنۊی نەسیم
وات: بسم اللە الرحمن الرحیم
بە قەولی ناقل، عولەمای سییەر
یەکیەک، جە مەکتووب، وەیتەور دان خەبەر
وە شارای ئەوەڵ، نەفسی ئەممارە
بەر کەرد، نە دەروون، ئەو شەم ڕۊخسارە
سانی، هەم سیفات، نەفسی لەوامە
دوور وست، نە جەستەی ئەو جەمین جامە
سالیسەن، سیفات، بەسەریی، بەدەو
مەحوو کەرد، جە قەلب، هەمایونی ئەو
چەو دما دیسان، هەم ڕوحەلئەمین
پاژنەی پای وېش، دا نە ڕووی زەمین
وە ئەمری قودرەت، پادشای باریی
یەک چەشمە، زەڵاڵ، ئاو بیی جاریی
جوبرەئیل وزووء، سەندش بەو ئاوە
تەعلیم کەرد، حەزرەت، هەر بەو سەراوە
ماڵا، وە ساعید، سفیدی، پەڕ نوور
وزووء سەندەوە، مەلائیک دەستوور
جوبرەئیل نییەت، ئیمامەت، ئاوەرد
حەزرەت، هەم جە پەشت بەو ئیقتدا کەرد
دەردەم، جەماعەت، چەنی جوبرەئیل
دوو ڕکات نماز، کەردەن بە تەعجیل
هەر ئەو دوو ڕکات، دایېم مەکەردش
تاکەی قەرار دان، پەنج فەرزە کەردش
سا چوون، ئەی سوورەت، واقع بی جەودەم
حوجرەی دەروونش، پەرواز بیی جە خەم
واتش: مەبادا، یە خیانەت بۊ
سیحر، یا ئەفسوون، یا کەهانەت بۊ
چەو غایلەی سەخت، شی پەی قوللەی کۊ
وە چاری ناچار، وېش هەوا دەرۊ.[1]