$سێ خاڵی کورت سەبارەت بە ئەنفال$
نووسینی: #ئیدریس مستەفا#
$یەکەم:$ ئێمە تاکو ئێستاش بکەرەکانی ئەنفالمان بە درووستی دیاری نەکردووە. هێزی کورد وەک بەعس بکەرێکی سەرەکی بووە لە ئەنفالدا. ورووژاندنی شارەزەردەواڵە لە پێوەدانی زەردەواڵەکە خراپترە. هەموو دۆکیومێنت و ڕووداوەکان باس لەوەدەکەن کە ئەوانەی شارە زەردەواڵەکەیان ورووژاندا لە خەڵکی کوردستان ئەوانە هەمان موسەببکاری سەرەکی ئەنفالن و دەبێ بە هەمان ئاستی بەعس و سەرکردەکانی بەعس لە قەڵەم بدرێن. هەر تێگەیشتنێک و هەوڵێک بەم ئاڕاستەیەدا نەبێ ئەوا بە ناقس ناساندنی ئەنفالە وەک جینۆسایدێک کە چەندان بکەری هەبووە.
$دووەم:$ ئەنفال سڕینەوەی ناسنامەی نەتەوەیی بوو وەک پڕۆسەیەکی زەمەنی چەندان هەفتەیەکی خایاند، بەڵام ئەنفالی حەقیقی لەسەر دەستی هێزی کوردی لە دوای 91 ەوە دەستی پێکردوو و ئێستاش بەردەوامە. ئامانجی نەتەوەیی بۆ مرۆڤ ئازادی و یەکسانی و ژیانێکی شایستە بە هاووڵاتیانی وڵاتی ئازادکراوە. کاتێک ئەمانە نەبوو مرۆڤ نەک هەر تووشی ئیغترابێکی سیاسی و کۆمەڵایەتی دەبێ بەڵکوو ڕوحی ئەنفال دەکرێ، چونکە ناسنامەی نەتەوەیی بوون نەک لە هیچ شتێک بەهرەمەندی نەکرد بەڵکوو لە هەموو بەهرەیەک و ماف و ژیانێک بێ بەشی کرد. کەڵکەڵەی کۆچ، وەک دیاردەیەکی هەم سوودبەخش و هەم زیانبەخش، بووە ناسنامەی مرۆیی و نەتەوەییەکەی. کۆچی بە کۆمەڵی هاندەران لە سی ساڵی ڕابردوودا، کە ئێستاش بەردەوامی هەیە، نەک هەر مانای ڕەتکردنەوەی ناسنامەی نەتەوەییە نییە بەڵکوو ئەنفال کردنی ڕوحی مرۆڤی کوردە.
سێیەم: زمان و کەلتور و فەرهەنگ ناسنامەی نەتەوەیین، جا کاتێک مرۆڤ بزانێ زمانەکەی بێ بایەخ دەکرێ و چیتر زمانی ئیش و خوێندن و میدیاکەی نیە؛ و کاتێک کەلتورەکەی نابوت بکرێ و فەرهەنگەکەی بشێوێندرێ و بە کەلتور و فەرهەنگێکی کۆنەپەرستی یان کۆڵۆنیاڵیستی پڕ بکرێتەوە، ئەو مرۆڤە جگە لە ئەنفالکردنی ڕوحی هیچ شتێکی تری لە بەردەمدا نامێنێتەوە. مرۆڤی کورد سێ دەیەیە ئاوها ئەنفالی ڕوحی دەکرێ و ئەم ئەنفالە بەردەوامی هەیە. [1]