باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و سی و پەنجەمە
دمای موددەتێ، وەرەقە وەفاتش کەرد، بەڵام خەدیجە هەر گوماناوییە بۍ، یەقینش جاگیر نەبۍ، پەوکەی پەناش بەردە پەی لاو(عەداس)ی، کە کاهینێ شارەزا بۍ، ئاڎییچ ماچۊ: سیفەتەکا جوبرەئیلی بەیان کەرە پېم.
غەرەز، جە بازی کەچبازی چەپگەرد
بەعد، موودەتێ، وەرەقە وەفات کەرد
بەڵام حەدیث، فەرموودەی حەزرەت
شەیتان بە وەرەقە نەبەردەن زەفرەت
بەهەشتی باقی، ئەعلا جاش مەبۊ
سەهەندی تووبا، تەکیەگاش مەبۊ
خەدیجە، نە خەیاڵ، نە فیکر و وەسواس
تەشریف بەرد وە لای کاهین (عەداس)
بەحسی جوبرەئیل، بەیان کەر پەرېم
نیشانش چېشەن، یەکیەک، واچە پېم
عەداس) سەوگەند وەرد بە زاتی ئەقدەس)
تا جە تۊ، مەتڵەب نەیاوۊم بە دەس
جە ڕۊحەلئەمین، خاترت جەم کەر
هەرچی بزانۊم مدەرووم خەبەر
خەدیجە واتش: زینهار سەڎ زینهار
حەرفم جە لای کەس، نەکەی ئاشکار
وە ئاینی وېش، (عەداس)، عەهدش بەس
هەنی ئەی ڕازە، نەواچم بە کەس
خەدیجە واتش: بە ئیسمی ئەڵڵا
ئېشەو محەمەد، ئیبن عەبدوڵڵا
جوبرەئیل، وە لای ئەو نازڵ بېیەن
مەتڵەب، هەرئېدەن، خیلافش نېیەن
عەداس)، وات: جە سەر زاتی ئەو سەروەر)
ئامای جوبرەئیل، نامووسی ئەکبەر
ئەگەر بەو مەنزڵ، نزوول کەردە بۊ
مەبۊ، خەیرێ خاس، هەم ئاوەردە بۊ
لاکین، جە شەیتان، خاتر پەڕ خارم
خەیاڵات خەیلێ مەڎۊ، ئازارم
نەک وە ئاسانەش، سەری ساوا بۊ
دووربا، ئاسیبێ، پەنەش یاوابۊ
یاخۊ، وە مەکرێ هۊشش بەردەبۊ
سەودای جنوونێ، حاسڵ کەردبۊ
ئەی کیتابی من، پەڕ، جە بەشارەت
ببەر، پەرێ، ئەو کەرۊش زیارەت
تاکە سالم بۊ، جە سیحری ئەفسوون
جە مەکری شەیتان، جە سەودای جنوون.[1]