بەپاو سەرچەمە مېژووییەکا و وەڵینەکا، سەرەتاو ئیسلامی
سەردەمێ ئاڵتونی بېیەن.
مۊئەرېخە ئەوروپیەکۍ نویستەنشا: کە ئەندەلوس چېرو سایەو حکومەتداری ئیسلامینە چراوێ ڕۊشنە و دلۍ سەڎە تاریکەکا ئۆروپای بېیەن، کە داڎگەری و ئاوەڎانی دوۍ تایبەتمەندیۍ دەسەڵاتی بیېنۍ.
جە ئەوەڵو دەسەڵاتو ئیسلامینە، یانی سەڎەی یۊوەمەنە، کۊیلایەتی نەمەن، جە ڕاو بازرگانە مۊسڵمانەکاوە کە سەرڕاسی و پاکی و ڕاس واچی جە تایبەتمەندیەکاشا بېیەن، ئیسلامشا یاونان فرەو یاگە دوورەکا.
چا سەردەمەنە خەڵک کېشەی دینداریش نەبېیەن، کېشەو حۊکمداری و جابەجاکەردەی ئەحکامەکا و حدودەکاش نەبېیەن، قورئان چەنین بېیەن، ئەپاسە حوکم کریان، جە وەختێنە نە ئیمامو نە مەزهەبو نە مېژوو نویس وجودشا نەبېیەن، بەڵام دماتەر دمای بەرکۆتەی ئیمامەکاو مېژوو نویسەکا پېسە ئبن ئسحاقی و بەرکۆتەی ڕاویەکا، دینو ئیسلامی کە سەرچەمێ پاکو سازگارۆ هۊرقۊڵیابۍ، ڕاو دەشتو دەریش گېرتەوەر و تېکەڵ بی بە خاکو دارو تەوەنی، سازگاری و تام و سافی ئەوەڵ جاریش نەمەن.
یانی وەختێ دین تېکەڵ بی چەنی حەزەکاو ئارەزوەکاو ویرەکا مرۊڤی، ئەسڵەکەش جە ئنسانی گوم بی، چوونکم مرۊڤ کائېنێن نمەتاوۊ ئانەی وەرشگېرۊ پېسە وېش دۊشۆ، بەڵکم بارگاوی بونە بە قەناعەت و هەم بە حەزو ئارەزوەکاش، هەر کەسێ یام هەر میللەتێ بەپاو ئاست و ویرکەردەیۆو یاوانەیش دینش چەنە ڕەنگ مڐۊوە کە ئینەیچ ئارۆو وېیەردەنە دینش وستەن دلۍ گېژاوێ کە بەرشېیەی چەنەش زەحمەتا.
گەر ئەوەڵو ئیسلامینە تاکە کەسێ فتواش دێبۊ، ئارۊ هەزارەها مۊفتیۍ ئینێ سەرو مېمبەریۆ، وەختێنە بڕێشا ماچا وېنە حەراما چڼی تەرشا بە حەراڵش مزانا، بەعزێ ماچان موسیقا حەراڵەن، بەڵام بڕێتەر بە حەرامش مزانا.
یاگێ مۊرتەد و زیناکار بە کۊشتەی مەحکۊمېنۍ، یاگێ تەر بە نۊعێ تەر، لاو باعزێشاوە ڕیش بە ئیشە، کەچی باعزێ تەر بە سیماو پیایی و بە واجبش مزانا، دماجار خەڵکی دیندار سەرش وەنە شېویانو ڕای ڕاسەش چەنە گۊمە بیېنە.[1]