ئېشه و قیبلەکەم...
میرزا ئۆلقاڎر، جە شەوەی دەیجوورەنە هەم بۍ هازەن، هەم دیڎەش زیاتەر بېنوورەن، شەوەی تەنیاییە، دوور جە ئازیزی، دوور جە باڵای زەریفیش، تازیەبارەن، ئەسرین جە دیڎەش بە تاوەن، ئەقڵ و فام و هۊش چەنەش هەراسان.
ئېشه و قیبەلکەم لە من کەفتەن دوور
دووربۊ جە دیڎەش، دیڎەم بېیەن کوور
ئېشه و نازارم لە من پېوارە
عەقڵ و فامی من، بېیەن ئاوارە
ئېشه و قیبلەکەم، دنیا و دینەکەم
مەحبوب شیرین، مەهجەبینەکەم
باڵای زەریفش، لېم نادیارەن
کوورەی دەروونم، شەرارەی نارەن
ئېشه و مەواچی عەزاداریمەن
جە داخ دڵبەر دەرد کاریمەن
ئېشه و شه و نېیەن، زاج دەیجورەن
جە دووری باڵات، دیدڎەم بۍ نوورەن
کاشکای نەکەردام ئەی ئاشنایی
وەیتەور نەچەشتام مەزەی جیایی
کاش وەڕۊی ئەزەڵ، تۊم نەدڎیا وە چەم
تا وەی تەور یەقیر، نەبیام چەنی خەم
یاخودڎا کەس بادەی، هیجران نەنۊشۊ
جەرگش وە ئایېر حیرمان نەجۊشۊ
ئۍ شەو واڎەی مەرگ دەرد کاریمەن
بۍ سەبر و بۍ تاو بۍ قەراریمەن
ئۍ شەو جە دیدڎەم ئەسرین وە تاوەن
ئەسرین دیدڎەم ماچی لافاوەن
ئۍ شەو یە پەی چېش، خەو لېم تەواسا
پەی چېش عەقڵ و هۊش لە من هەراسا.[1]