دمای نامەشېعریەکی میرزا ئولقاڎری، موحەممەد بەگو وەکېڵی جوابش مڎۊوە. موحەمەد بەگو وەکېڵی دڵ وەشی وېش بەرمەوزۊن بە یاوای نامۍ دۊسەکەیش، جەخت مەکەرۊوە چانەی کە عاجزی و ئېشی زامانش هەر جە دووری لەیلەن، وەختەن گېیانش بسۊچۊن، شەماڵ بووڵە و گەردەو لاشەیش بشانۊ، ماچۊ: منت کەردەن بە قەیسی شېت و شەیدا، گەر وەسڵت نزیک نەبۊن، ئانە مەرگم نزیکەن.
قاڎر هەم یاوا قاڎر هەم یاوا
نامەی دڵ وەشی قیبلەکەم یاوا
سەر تا وە دامان وە د یڎەم ساوا
وانام تۊ تۊی دڵ وە هەم شکاوا
بڵېسەم بەرزبی هەرتاکە تاوا
کۊکۊی دووی دەروون وە گەردوون یاوا
سا تۊ پەرسابېت عاجزیت چېشەن
دووبارە پەی چېش خاترت ڕېشەن
چېش واچوو میرزا جە ئېش دەردم
دووکەڵ مەخېزۊ جە ئاهی سەردەم
یا جە نامەی لەیل دەستم پەڕخارەن
یا جە کاری تەر زامم ئەوگارەن
قاڎر غەیر جە لەیل شای شیرین‌شېوە
من کەردەن وە قەیس لېویای لېوە
جە ئه و زیاتەر نېیەن خەیاڵم
پەی ئه و سەرتاپا سۊتەی زوخاڵم
خوڎا مەزانۊ بە حاڵ دەردم
ها وەختەن شاڎ بۊ، شەماڵ وە گەردم
مەعلووم عاجز ییم هەر جە لای لەیلەن
دەروونم چەندە جە زوخاڵ کەیلەن
ئاخر بۍ ئینساف سزای من تا کەی
تاقەت تاق بېیەن وەی وە یانەم وەی
نەمەندەن ئارام تاو تەوانام
قاڎر سیوای تۊ وەکۍ بۊ هانام
چینەی زیاتەر مەڎەم دەردیسەر
یا مەرگ یا تاقەت یا وەسڵ دولبەر
ڕۊشن کەر و مەیل جۊی سەرچەمەی لېڵ
بېڎار بۊ دیسان فریشتەی وەکېڵ.[1]