عەلەیکە سەلام...
میرزا ئۆلقاڎر جە وەتەنی دوور بۊن، موددەو چن مانگێ جە پاوەشاری دوورگنۊوە، هامسەرەش ۋیرېش کەرۊن، نامێوەش پەی کیانۊن، وەختێ بۊی عەبیر ئاساش مڎۊ وە دەماخش، ئیتر میرزا عەشقش تازەمەبۊوە، تاسەو هامسەرېش کەیلش کەرۊن، بەڵام پاسەدیارەن میرزا داراو هیچ سەوقاتیێ مادی نەبېیەن بکیانۊش پەی هامسەرېش، یان هیچ سەوقاتێ مادیش بە شایانو ئاڎۑش نەزانان، پەوکەی بە نامە شېعریێ سەنگینە تەماموو دنیێ و هەر حۆت ئەقلیمەکەی کەرۊن بە سەوقاتی و پەیش کیانۊن.
عەلەیکەسەلام فریشتەی ئەنوەر
ڕشتەی لیقای هەق حەیی تەوانگەر
وەش ئامای وە خەیر ئەی بەرگوزیدە
سا قەدەم باوەر وە بان دیدە
ئېران تا تووران دنیا سەرانسەر
پایەندازت بۊ سەوڵ نازپەروەر
ئەسەموڵ پېشکەش نیم‌نیگای دیڎەت
ئەسفەهان ئەبرۊی قەڵەم کەشیڎەت
مووسڵ وە مەودای موژەی خەمیدەت
بەسرە وە بینی دڵ پەسەندیدەت
حەڵەب وە حەڵقەی حەی تار گیسووت
قازان وە قەدبەند باریکتەر جە مووت
پاریس وە پرشەی پېشانی پاکت
خاوەر وە خەرام خەشم خەمناکت
شام وە شەرت و شۊن وەفای شەریفت
بەغدا وە بەرزی باڵای زەریفت
کشمیر وە گۊنای گوڵ‌غونچەی ڕەندت
کابول وە کاڵای ئاڵا پەسەندت
شیراز وە شەوبۊی شەوق شەمامەت
جام وە بۊی بخوور عەبیر جامەت
چین وە چین زوڵف سیای چین چینت
ماچین وە یەک ماچ جام جەمینت
زەڕکۊ زەرافەت تەشریف ئاوردەت
تاران وە تای تار وە تۊمار کەردەت
خەتا وە خەندەی مەیل ساڵانت
خوتەن وە نوختەی ۋردە خاڵانت
قەندەهار وە قەند خونچەی دەهانت
یەمەن وە یەک حەرف لەعل لەبانت
غەزنەین وە غەمزەی هیچ‌کەس نەکەردەت
نەیشابوور وە گاز ڕاز بۍ پەردەت
زاوە بە زنجی زەریفی نافت
کرمان وە گەردەن سوراحی سافت
خۆی وە خولقەتی خوڵک و خۊی گەرمت
سەڵماس وە سینەی سفیدی نەرمت
تەبرېز وە ڕېزەی ڕاز قەشەنگت
داغستان وە داغ تەئسیر دەنگت
نەهاوەند وە ناف موشک تاتارت
گەنجە هەم وە گەنج شاهان نەدارت
ڕوان وە نەرمی بلووری ڕانت
وەگەردەنم بۊ فیتنەی چەمانت
شیروان وە شەوکەت تافتەی شەوخاوت
عەشق ئاباد وە عەشق نەزەرگای چاوت
زابول وە زانوی ساف سیمینت
خەم وەردەی باهۊی قەیس خەمینت
سابڵاخ هەم وەساق ساف بیخەوشت
کاشان وە ئەنگوشت سەرپەنجەی کەوشت
قەزوین وە قیمەت قوَلەوانەی قۊڵت
لەندەن وە تای لونگ زەڕباف کۊڵت
لاهور چەنی هند وە لەنجە و لارەت
ئەستامبوڵ گشت فەدای ئیشارەت
کوردستان وە گەرد تۊز پاڵاکەت
کرماشان وە تەرک باڵای ئاڵاکەت
هەفت ئەقلیم تەمام نەونەمام نۊ
نەدارۊ قیمەت بەژن باڵای تۊ
مودەی عومر وېم هامسەران یاران
هەر ئه و ڕۊ وە شاد دنیام ۋیاران
جه و ساوە قیبلەم سەڵامش کەردەن
زیندەگیم جە حاڵ مەردەن ویەردەن
(قاڎر) وېنەی تەیر بی وە دامەوە
تا مەحشەر بەندەن به و سەڵامەوە.[1]