چناری هەوڵی
بەشۊ نۊهەمۍ
چنارو هەوڵی دمای باسکەردەی سەروەختو گەنجیش و کۊچکەردەیش پەی(هەوڵی)، مەگنۊ باسو ژیوای ۋېش، ئا زەمەن و دۆرانا پەی میرزای باسکەرۊن کە تەمەنشەنە دیېنېش، سەنگتاشی فەرهاد، نەقاشی شاپوور، عامرشای عەرەب(مەجنوون)، شا عەباسی سەفەوی، ۋېران بیەو ئێرانی، کەریم خانو زەندی، نادر شاو ئەفشاری، جام جەهان نماو جەمشیدی، چڼان والیۍ ئەردەڵانی، چن پاشایان داڎ پەروەر، زاڵم، چڼەها خەڵکۍ مەزڵوومۍ، من ئانېمە گرد دیېنۍ، میرزام تۊ چېش مزانی، من چېم دیەن.
میرزام من شاڎییم تازەگی نیەن
تۊ چېش مەزانی من چېشم دیەن
نەقاشی قەڵەم شاپوورم دیەن
سەنگتاشی فەرهاد فەغفوورم دیەن
زەمزەمەی پەروېز لاڵ پۊشم دیەن
شیرینی شیرین مەی نۊشم دیەن
نەکیسای چەنگی پەڕسۊزم دیەن
سەڎای باربودی دڵ‌دۊزم دیەن
شەش تاق ئەیوان جامڕېزم دیەن
پای ئەبریشم بەند شەودېزم دیەن
عامرشای عەرەب دوجەیلم د یەن
لەیلی نازەنین پەڕ مەیلم دیەن
مەجنوون چۊڵ‌گەرد کاوانم دیەن
عوزرای زوڵف عوزار باوانم دیەن
جام جەهانبین شای جەمم دیەن
کەرەم کرداران حاتەمم دیەن
شاعەباس شای ئێرانم دیەن
چن دەفعە ئێ ران ۋېرانم دیە ن
من شا ئیسماعیل سەفەویم دیەن
من شا عەبدوڵڵا دەهلەویم دیەن
کەریم‌خان زەند هەیهاتم دیەن
نادرشای ئەفشار پەڕ زاتم دیەن
حەربەی مەرارەی گۊپاڵم دیەن
زەڕەی زەربەی تېغ تۊپاڵم دیەن
موحەممەدشام دی، ناسرشام دیەن
چن میر چن وەزیر. چن گەڎام دیەن
چن عولیا جەناب چن عالیم دیەن
چن وەلی دەستوور، چن والیم دی
حەسەن عەلی خان ئەسڵ کاشیم دی
میرزا مەهدیخان مونشی باشیم دی
ئەمانەللەهی سەهمگینم دی
والی خەسرەوخان وەش‌نگینم دی
ڕەزاقوڵیخان شۊخ و شەنگم دی
بەزم غوڵام‌شا خۊش ئاهەنگم دی
تەیمور خانم دی، سەرهەنگم دیەن
مەحموودخانەکەی دڵ تەنگم دیەن
بەزم موحەممەد سادق‌خانم دی
ئاداب نەجەف قوڵیخانم دی
عەلی ئەکبەرخان بەو مەقامەوە
بەو حوکم شیرین ڕەوای عامەوە
بەو باڵای ئاڵای عەرعەر بېزەوە
بەو ڕېزەی ڕازان، شەکەر ڕېزەوە
بەو شان و شەوکەت شەهلای شەنگەوە
بەو دەست و چەوگان چۊی خەدەنگەوە
هەر ساڵ یەک باری تەشریفش ماوەرد
ئېمە منەتبار سەرئەفراز مەکەرد
مەنیشت جە سایەم پەی باڎە نۊشی
مەگرتش دیوان گەوهەر فرۊشی
حوکمش جە تەیموور گره و بەردەبۍ
دیوان شاهان باتڵ کەردەبۍ
جەردە جە خۊفش عیبادەت مەکەرد
ڕهزەن هەر مودام نام هەق مەبەرد
هەر نابەکار بۍ بېسەنا و تەوبېخ
بېپەروا مەشی وە خانەقای شېخ
شەوگەرد هەر خەریک شەوبېڎاریش بۍ
عاشق جە مەعشووق وېش بېزاریش بۍ
گورگ و مېش جە یەک خاتر کەردەن جەم
سیغەی ئیخوانی وەنەشان وە هەم
هەر دوو نە یەک جا بازی مەکەردەن
سەوگەند هەر وە گیان یەکتر مەوەردەن
ئیستە ئەو شەرەف ملووک ئێرانەن
سەرهەنگی سوپای دەنگ دلېرانەن.[1]